អឺរ៉ុបនិយាយមិនត្រូវគ្នាក្នុងការដាក់ទណ្ឌកម្មបន្ថែមធ្ងន់លើរុស្ស៊ី
រកមិនឃើញការព្រមព្រៀងគ្នាដោយល្អូកល្អើន ដើម្បីដាក់ទណ្ឌកម្មបន្ថែមលើរុស្ស៊ី ដែលធ្វើព្យុះធ្វើភ្លៀងលើអ៊ុយក្រែនទេ។ ជួបប្រជុំគ្នាក្រៅផ្លូវការនៅក្រុងរីហ្កា រដ្ឋមន្ត្រីការបរទេសទាំង២៨របស់សហភាពអឺរ៉ុបបានត្រឹមត្រូវរ៉ូវគ្នាកាយកប់គំនិតខ្វែងគ្នាខ្លាំង ដោយរក្សាការដាក់ទណ្ឌកម្មលើឥស្សរជនរុស្ស៊ី និងអ៊ុយក្រែនស្និទ្ធនឹងរុស្ស៊ី១៥១នាក់តាមរយៈការបង្កទ្រព្យធននិងមិនផ្តល់ទិដ្ឋាការឱ្យធ្វើដំណើរ។ តែយុទ្ធសាស្ត្រអឺរ៉ុបប្រឈមនឹងរុស្ស៊ីនៅតែជាប្រធានបទនៃការតស៊ូមតិដដែល។
ចុះផ្សាយនៅថ្ងៃ៖
ស្តាប់ - ០២:០១
“យើងសម្គាល់ឃើញស្ថានភាពនៅភាគខាងកើតអ៊ុយក្រែនប្រសើរឡើងបន្តិចហើយ ប៉ុន្តែយើងបន្តប្រុងប្រយ័ត្នជានិច្ច!” នេះជាប្រសាសន៍របស់លោករដ្ឋមន្ត្រីការបរទេសបារាំង នាឱកាសជំនួបប្រជុំគណៈរដ្ឋមន្ត្រីការបរទេសហភាពអឺរ៉ុប នៅថ្ងៃសុក្រនិងសៅរ៍ទី ៧ មីនានេះ។
សម្រាប់លោកប្រមុខការទូតបារាំង គេត្រូវតែបន្តដំឡើងសំឡេងដាក់រុស្ស៊ីជានិច្ច ព្រោះបទឈប់បាញ់ចុះហត្ថលេខានៅទីក្រុងមីនស្កិ៍ ប្រទេសបេឡារ៉ុស មិនត្រូវគោរពបានដោយពេលលេញមែន តែអាវុធធុនធ្ងន់ត្រូវបានដកចេញសមរភូមិហើយ។ ដូច្នេះបើគ្មានរំលោភជាទ្រង់ទ្រាយធំ វាគ្មានន័យឡើយដែលត្រូវបន្ថែមទណ្ឌកម្មប្រឆាំងនឹងរុស្ស៊ីនោះ។ បណ្តាប្រទេសនៅអឺរ៉ុបខាងត្បូង ដូចជាអេស្ប៉ាញ ឬអ៊ីតាលី... ចង់និយាយអំពីទណ្ឌកម្មរុស្ស៊ីនៅខែមិថុនាឬកក្កដា ព្រោះទណ្ឌកម្មនេះរំខានដល់ការនាំចេញរបស់ពួកគេ។ ចំពោះប៉ារីស ក្នុងបរិបទដ៏ពុះកញ្ជ្រោលបែបនេះ គេមិនត្រូវលើកទណ្ឌកម្មដែលមានស្រាប់ ឬបន្ថែមទណ្ឌកម្មថ្មីទេ។ នេះជាជម្រើសជាផ្លូវការរបស់សហភាពអឺរ៉ុប បើ ទោះបីមិនគំនិតខ្វែងគ្នា ប៉ុន្តែខាងក្រុមដែលដឹកនាំដោយអង់គ្លេស និងក្រុមប្រទេសនៅតំបន់បាល់ទិកនិងប៉ូឡូញ ពួកគេចង់ពន្យារទណ្ឌកម្មទុកជាមុនចាប់ពីខែមីនានេះតែម្តងទៅ ដើម្បីដាក់គំនាបលើរុស្ស៊ី។ រដ្ឋមន្ត្រីការបរទេសលីទុយនី ដែលគាំទ្រឱ្យមានការផ្តល់អាវុធដល់អ៊ុយក្រែន អះអាងថាធ្វើបានឆាប់ប្រសើរជាងទុកឱ្យជ្រុលយូរ។
សូមបញ្ជាក់ថាក្នុងជំនួបក្រុមប្រឹក្សារយៈពេលពីរថ្ងៃនេះ សមាជិកសហភាពអឺរ៉ុប បានពិភាក្សាថាតើត្រូវបន្តដាក់ទណ្ឌកម្មសេដ្ឋកិច្ច ប្រឆាំងធនាគារ និងក្រុមហ៊ុនថាមពលធំៗរបស់រុស្ស៊ី ឬយ៉ាងណា។ ប៉ុន្តែជំនួបប្រជុំបានត្រឹមពិភាក្សា! ការជជែកគ្នានឹងលើកទៅបន្តនាឱកាសជំនួបប្រជុំថ្នាក់រដ្ឋមន្ត្រីការបរទេសជាថ្មីម្តងទៀតនៅថ្ងៃទី ១៦មីនា មុនជំនួបកំពូលថ្នាក់ប្រមុខរដ្ឋ-រដ្ឋាភិបាលថ្ងៃទី ១៩មីនា នាទីក្រុងព្រុចសែល ដើម្បីកំណត់យុទ្ធសាស្ត្រអឺរ៉ុបប្រឈមនឹងរុស្ស៊ី។
ក្នុងដំណាក់កាលនេះ អឺរ៉ុបនិយាយមិនត្រូវគ្នាទេ។ ជាញឹកញយគឺលោកស្រីប្រមុខដឹកនាំអាល្លឺម៉ង់ជាអ្នកសម្រេចសេចក្តី តែរហូតមកទល់ពេលនេះ អាល្លឺម៉ង់គ្មានបញ្ចេញប្រតិកម្មអ្វីសោះ។ យ៉ាងណាក៏ដោយ សហភាពអឺរ៉ុបនឹងរកឃើញកិច្ចព្រមព្រៀងគ្នាមួយ គ្រាន់តែគ្នាច្រើនត្រូវពេលវេលាយូរបន្តិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ