វិបត្តិរវាងក្រិកនិងសហភាពអឺរ៉ុបជុំវិញបំណុលក្រិច
ចុះផ្សាយនៅថ្ងៃ៖
ស្តាប់ - ០៦:៣៧
រដ្ឋាភិបាលថ្មីរបស់ក្រិកដែលទើបនឹងជាប់ឆ្នោត ហើយដែលដឹកនាំដោយលោក អាឡិចស៊ីស ស៊ីប្រា បានធ្វើឲ្យសហគមន៍អន្តរជាតិខ្វល់ខ្វាយយ៉ាងខ្លាំង ជាពិសេសសហភាពអឺរ៉ុបតែម្តង។ ខ្វល់ខ្វាយគឺដោយសារ កន្លងមកគេបានដឹងយ៉ាងច្បាស់ថា បន្ទាត់នយោបាយរបស់លោក អាឡិចស៊ីស ស៊ីប្រា ដែលប្រឆាំងយ៉ាងដាច់អហង្ការ ទៅលើនយោបាយរឹតបន្តឹង ដែលអឺរ៉ុបបានដាក់គំនៀប ទៅលើរដ្ឋាភិបាលក្រិក ដើម្បីឲ្យក្រិក ធ្វើកំណែទម្រង់ នឹងសងបំណុល ដែលមានចំនួន ដ៏ច្រើនលើសលប់។ ការជួបចរចារវាង តំណាងសហភាពអឺរ៉ុប និងរដ្ឋាភិបាលថ្មីក្រិក បានចាប់ផ្តើមធ្វើឡើង បន្តែម្នាក់ៗបន្តឹងសរសៃករៀងៗខ្លួន។
ការចរចា ស្តីពីបំណុលក្រិក ទើបតែបានចាប់ផ្តើម ប៉ុន្តែ បើតាមមើលទៅ គឺមានការលំបាកណាស់ ព្រោះថា រដ្ឋាភិបាលថ្មីរបស់ក្រិកមានគោលជំហររឹងមាំណាស់។ បន្ទាប់ពីមានវិបត្តិសេដ្ឋកិច្ចពិភពលោក នៅឆ្នាំ២០០៨ មក ក្រិកបានរងផលប៉ះពាល់ យ៉ាងធ្ងន់ធ្ងរ ជាងគេនៅអឺរ៉ុប។ បំណុលរបស់ក្រិក បានកើនឡើងរហូតដល់ ១៧៥ភាគរយ នៃផលិតផលសរុបរួម។
ដើម្បីជួយស្រោចស្រង់ក្រិក ឲ្យងើបចេញពីវិបតិ្តនេះ សហភាពអឺរ៉ុប បានបង្កើតគម្រោងមួយហៅថា គម្រោង Troïka ដោយមានការចូលរួមពីបីភាគី គឺសហភាពអឺរ៉ុបផ្ទាល់ ធនាគារកណ្តាលអឺរ៉ុប និងមូលនិធិរូបីយវត្ថុអន្តរជាតិ។ គម្រោងនេះ គឺបានព្រមព្រៀងផ្តល់កញ្ចប់ថវិកាជាដំណាក់ៗ ដើម្បីជួយក្រិកយកទៅសងបំណុលគេ។ ប៉ុន្តែជាថ្នូរ រដ្ឋាភិបាលក្រិកត្រូវតែធ្វើកំណែទម្រង់ ជាច្រើនវិស័យ ជាពិសេសទាក់ទិនទៅនឹងវិស័យពន្ធដារ និងប្រព័ន្ធការងារជាដើម។ អឺរ៉ុបតម្រូវឲ្យក្រិកកាត់បន្ថយការចំណាយរបស់រដ្ឋ និងសេវាសាធារណៈផ្សេងៗ។ ប៉ុន្តែផ្ទុយទៅវិញ នរណាដែលជាអ្នករងគ្រោះ គឺប្រជាជនក្រិកតូចតាច ដែលជួបការលំបាក កាន់តែខ្លាំងទៅៗ។
ក្រិកមិនត្រូវការលុយរបស់អឺរ៉ុបទៀតឡើយ៖
អស់រយៈពេលជិត១០ឆ្នាំ មកហើយ ស្ថានភាពនៅក្រិកមិនបានល្អប្រសើរទេ ហើយបំណុលនៅតែមានច្រើនដដែរ។ ប្រជាជនក្រិកបានត្អូញត្អែរថា នយោបាយរឹតបន្តឹងដែលដាក់កំហិតដោយសហភាពអឺរ៉ុប គឺហាក់ដូចជាច្របាច់ក ប្រជាជនក្រិកអញ្ចឹង។ អត្រាអ្នកអត់ការងារធ្វើនៅក្រិក មានចំនួនច្រើនណាស់ ហើយអ្នកដែលមានការងារធ្វើទៀតសោត បានប្រាក់ខែតិចតួចបំផុត។ ដូច្នេះ ម្នាក់ៗគ្មានប្រាក់ បើរំពឹងទៅលើជំនួយ និងសេវាសាធារណៈរបស់រដ្ឋក៏មិនបាន ព្រោះអ្វីៗត្រូវកាត់ផ្តាច់ ដោយសារតែរដ្ឋក្រិក ត្រូវកាត់បន្ថយការចំណាយ ស្ទើរគ្រប់វិស័យ។ ទាំងអស់នេះហើយ ដែលធ្វើឲ្យ ប្រជាជនក្រិក ក្រោកប្រឆាំង ហើយបានបោះឆ្នោតជ្រើសរើសគណបក្សរបស់ លោក អាឡិចស៊ីស ស៊ីប្រា(Alexis Tsipras)មកឲ្យដឹកនាំប្រទេស ដើម្បីប្រឆាំងនឹងគំនៀបសង្កត់របស់សហភាពអឺរ៉ុប។
កាលពីថ្ងៃសុក្រ ទី ៣០ មករា រដ្ឋមន្រ្តីក្រសួងហិរញ្ញវត្ថុក្រិក បានជួបជាមួយអ្នកតំណាងអឺរ៉ូគ្រុប របស់សហភាពអឺរ៉ុប នៅក្រុងអាតែន។ ក្រិកបានប្រកាសឲ្យដឹងពីគោលជំហររបស់ខ្លួនថា ខ្លួនលែងចង់បានជំនួយ របស់គម្រោង Troïkaរបស់អឺរ៉ុបទៀតហើយ។ តាម ធម្មតា សហភាពអឺរ៉ុប នឹង ផ្តល់ប្រាក់ ចំនួន៧ពាន់លានអឺរ៉ូ ទៅឲ្យក្រិកនៅចុងខែកុម្ភៈនេះ។ ប៉ុន្តែក្រិចថា មិនត្រូវការលុយនេះទេ ហើយថាខ្លួន ប្រាថ្នាចង់ចរចា ជាថ្មីទាក់ទិនទៅនឹង របៀបវីរៈ នៃការសងបំណុល។
ការចង់បានរបស់ក្រិក៖ ស្តារជីវភាពប្រជាជន និងសុំឲ្យលុបបំណុល ២៣ពាន់លានអឺរ៉ូ
រដ្ឋាភិបាលថ្មីក្រិក បានដាក់ចុះ នូវគម្រោងជាច្រើនចំណុច ដើម្បីស្តារប្រទេសឡើងវិញ។ លោក ស្តាថាគីស(Stathakis) ដែលជាអ្នកជំនាញសេដ្ឋកិច្ច និងជាអ្នកផ្តួចផ្តើមគំនិត កំណែទម្រង់សេដ្ឋកិច្ចក្រិក បានមានប្រសាសន៍ឲ្យដឹងថា ក្រិកត្រូវតែឈរលើកម្លាំងខ្លួនឯង រស់ដោយខ្លួនឯង មិនមែនដកដង្ហើម ចាំតែឲ្យគេជួយ យ៉ាងត្រដរ ដូចកន្លងមកនេះទេ។ គាត់និយាយនេះ គឺសំដៅទៅលើ ជំនួយរបស់សហភាពអឺរ៉ុប ធនាគារកណ្តាលអឺរ៉ុប និងមូលនិធិរូបិយវត្ថុអន្តរជាតិនេះឯង។
គម្រោងដែល រដ្ឋាភិបាលលោក ស៊ីប្រា បានដាក់ចេញ គឺធ្វើយ៉ាងណា ជួយប្រជាជនក្រិកក្រីក្រ ឲ្យមានលទ្ធភាព និងជីវភាព ល្អប្រសើរឡើងវិញ មានជាអាទិ៍ តាមរយៈការតំឡើងប្រាក់ខែអប្បរមា ការតំឡើងប្រាក់ចូលនិវត្តន៍ ដល់មនុស្សចាស់ និងបន្ធូរបន្ថយពន្ធលើប្រាក់ចំណូលជាដើម។ ក្រិកមានគម្រោងតំឡើងប្រាក់ខែអប្បរមា ដល់៧៥០ អឺរ៉ូ និងផ្តល់ប្រាក់ខែទី១៣ ដល់អ្នកចូលនិវត្តន៍ ដែលមានប្រាក់ខែ ក្រោម៧០០អឺរ៉ូ។ ចំណែកឯពន្ធលើប្រាក់ចំណូលវិញ កាលពីមុន អ្នកដែលរកចំណូលបាន លើសពី៥០០០អឺរ៉ូ ក្នុងមួយឆ្នាំ ត្រូវបង់ពន្ធជូនរដ្ឋ បន្តែឥឡូវ ក្រិកមានគម្រោងតំឡើងរហូតដល់ ១ម៉ឺន២ពាន់អឺរ៉ូ។ គម្រោងនេះ បើគិតជាទឹកប្រាក់ រដ្ឋក្រិកត្រូវចំណាយប្រមាណជា ១២ពាន់លានអឺរ៉ូ។ យើងសួរថា តើក្រិក បានប្រាក់មកពីណា ដើម្បីអនុវត្តគម្រោងនេះ?
លោក ស្តាថាគីស ដដែលបានមានប្រសាសន៍ថា ក្រិកនឹងធ្វើការផ្ទេរប្រាក់ ពីមូលនិធិអឺរ៉ុបរបស់ខ្លួន ដែលមានទឹកប្រាក់ចំនួន ៦ពាន់លានអឺរ៉ូ។ បន្ថែមពីនេះ ក្រិកសង្ឃឹមថា នឹងប្រមូលប្រាក់ ប្រមាណជា៣ពាន់លានអឺរ៉ូ ដែលបានមកពីការផាកពិន័យដល់ការគេចពន្ធ និងការកេងប្រវញ្ញចំណូលរដ្ឋ។ ដូច្នេះ វានៅសល់តែ៣ពាន់លានអឺរ៉ូទៀតប៉ុណ្ណោះ ដែលក្រិកត្រូវរកឲ្យបាន។ បើតាមសម្តីលោក ស្តាថាគីស ដដែល គាត់ថា វាមិនសូវជាលំបាកប៉ុន្មានទេ។ មួយវិញទៀត រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុក្រិក បាននិយាយកាលពីល្ងាចថ្ងៃសុក្រ ទី៣០ មករា ថាក្រិកចង់សើររើ និយាយគ្នាជាថ្មី ទាក់ទិនទៅនឹងរបៀបវារៈ នៃការសងបំណុល។ តាមការកំណត់ ក្រិកត្រូវសងប្រាក់ ២៣ពាន់លានអឺរ៉ូ ក្នុងឆ្នាំ២០១៥នេះ។ ពេលនេះ ក្រិកចង់សុំឲ្យពិនិត្យជាថ្មី បើអាចធ្វើបាន គឺសុំឲ្យលប់បំណុលនេះ ចោលតែម្តង។
អាល្លឺម៉ង់ថា លប់បំណុលមិនបានទេ៖
រហូតមកដល់ព្រឹក ថ្ងៃសៅរ៍ទៅ ៣១មករា លោកស្រី អង់ហ្គេឡា មែកគែល (Angela Merkel) បានបញ្ជាក់យ៉ាងច្បាស់ថា គេមិនអាចលប់ចោលបំណុល ទាំង២៣ពាន់លានអឺរ៉ូ របស់ក្រិកដោយងាយៗបានឡើយ។ កន្លងមក ម្ចាស់បំណុល គេបានធ្លាប់លុបចោល នឹងសុខចិត្តខាត ដោយបានទទួលយក ការផ្លាស់ប្តូរភាគហ៊ុនថោកៗ របស់ក្រិក។ កាលពីឆ្នាំ ២០១២ ម្ចាស់បំណុលឯកជន បានលុបបំណុលក្រិក ប្រមាណជា ១០០ពាន់លានអឺរ៉ូ រួចមកហើយ។ ដូច្នេះ គេមិនអាច បន្តធ្វើបែបនេះ តទៅទៀតបានទេ។
អ្វីៗវាទើបតែចាប់ផ្តើមប៉ុណ្ណោះ ការចរចាររវាង ក្រិក និងសហភាពអឺរ៉ុប នៅបន្តយូរតទៅទៀត។ លោកនាយករដ្ឋមន្រ្តីក្រិក អាឡិចស៊ីស ស៊ីប្រា និងធ្វើដំណើរទៅបណ្តាប្រទេសធំៗនៅ អឺរ៉ុប ដូចជាបារាំង អង់គ្លេស និងអ៊ីតាលី ចាប់ពីថ្ងៃចន្ទ សប្តាហ៍ក្រោយនេះទៅ ដើម្បីស្វែងរកការគាំទ្រ។ ទោះបីជាយ៉ាងណា គេមិនបានបញ្ជាក់ថា គាត់មានគម្រោងទៅជួបលោកស្រី អង់ហ្គេឡា មែកគែល ប្រមុខរដ្ឋាភិបាលអាល្លឺម៉ង់ទេ។ សូមបញ្ជាក់ផងដែរថា កន្លងមក លោក ស៊ីប្រា នេះ ធ្លាប់បានរិះគន់ទៅលើគោលនយោបាយ របស់អឺរ៉ុប ដែលដាក់គំនៀបមកលើក្រិក និងប្រទេសជាប់បំណុលផ្សេងទៀត ហើយថា នៅអឺរ៉ុប ស្អីក៏ដោយ គឺតាមតែការសម្រេចរបស់លោកស្រី អង់ហ្គេឡា មែកគែល ទាំងអស់ ដែលធ្វើបែបនេះវា អយុត្តិធម៌ណាស់ សម្រាប់ប្រទេសតូចតាច ដែលគ្មានសម្លេងនឹងគេ។
ទោះបីជាយ៉ាងណា ពេលនេះ មិនមែនជាពេលដែលត្រូវឈ្លោះគ្នាទេ។ ក្រិក និងសហភាពអឺរ៉ុប ជិះទូកជាមួយគ្នា។ បើសិនជាក្រិកក្ស័យធន ហើយត្រូវដើរចេញពីរង្វង់ប្រទេសចាយលុយអឺរ៉ូ អ្នកដែលខាតបះជើង គឺសហភាពអឺរ៉ុបទាំងមូលតែម្តង។ ទាំងក្រិក ទាំងសហភាពអឺរ៉ុប ត្រូវតែចរចាគ្នា រិះរកវិធីស្រង់សេដ្ឋកិច្ចក្រិក ឲ្យងើបឡើងវិញ។ ស្តារសេដ្ឋកិច្ច មានន័យថា ស្តារជីវភាពប្រជាជនក្រិក ដូច្នេះ ផលប្រយោជន៍រួម និងការចង់បាន របស់ប្រជាជនក្រិក ត្រូវតែគិតជាអទិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ