ដំណោះស្រាយវិបត្តិស៊ីរី៖អាមេរិកកំពុងសិក្សាលើជម្រើសផ្លូវទូត និងផ្លូវយោធា
ចុះផ្សាយនៅថ្ងៃ៖
ស្តាប់ - ០៦:២៣
នៅសហរដ្ឋអាមេរិក មួយថ្ងៃ បន្ទាប់ពីបានប្រកាសផ្អាកកិច្ចចរចាជាមួយរុស្ស៊ីស្តីពីកិច្ចព្រមព្រៀងឈប់បាញ់នៅស៊ីរីមក ក្រសួងការបរទេសអាមរិកទើបបានប្រកាសឲ្យដឹងនៅថ្ងៃពុធ ទី៥ តុលាថា អាមេរិកនឹងបន្តស្វែងរកដំណោះស្រាយឲ្យវិបត្តិស៊ីរីដោយកំពុងពិចារណាមើលលើគ្រប់ជម្រើសទាំងអស់ គិតទាំងជម្រើសផ្លូវទូត និងផ្លូវយោធា។ ការប្រកាសរបស់អាមេរិកពេលនេះបានធ្វើឡើង បន្ទាប់ពីក្រសួងការពារជាតិរុស្ស៊ីទើបបានប្រកាសឲ្យដឹងពីការដាក់ពង្រាយប្រព័ន្ធការពារផ្លូវអាកាសក្នុងទឹកដីស៊ីរី។
ការដែលអាមេរិកផ្តើមពិចារណាលើជម្រើសផ្ទាល់ខ្លួនសម្រាប់ដោះស្រាយវិបត្តិស៊ីរីពេលនេះ គឺមកពីអាមេរិកឆ្អែតឆ្អន់នឹងកិច្ចចរចាជាមួយអ្នកដទៃ ពិសេសជាមួយភាគីរុស្ស៊ី។ ដូចយើងដឹងហើយថា អស់ជាច្រើនឆ្នាំមកហើយ ពោលតាំងពីស៊ីរីបានធ្លាក់ក្នុងវិបត្តិហែកហួរគ្នាក្នុងឆ្នាំ ២០១១ មក សហគមន៍អន្តរជាតិ មានអាមេរិក និងរុស្ស៊ីផងបានព្យាយាមស្វែងរកដំណោះស្រាយឲ្យវិបត្តិស៊ីរី។ តែលើកណាក៏ដូចជាលើកណាដែរ ការខ្វែងគំនិតគ្នានៅបន្ត ហើយស្ថានការណ៍នៅស៊ីរីកាន់តែដុនដាប ពិសេសក្នុងវិស័យមនុស្សធម៌តែម្តង។
ថ្មីៗចុងក្រោយនេះទៀត កិច្ចព្រមព្រៀងឈប់បាញ់ដែលអាមេរិក និងរុស្ស៊ីជាប្រទេសហត្ថលេខីក្នុងថ្ងៃទី៩ កញ្ញាក៏មិនត្រូវបានគោរពពេញលក្ខណៈ និងនិងដែលទីបំផុតទៅ អាមេរិកក៏សម្រេចឈប់ចរចាអ្វីទាំងអស់ជាមួយរុស្ស៊ី។ នៅឯវេទិកាអង្គការសហប្រជាជាតិក៏ដូចជាក្រុមប្រឹក្សាសន្តិសុខទៀតសោត អាមេរិកក៏ពិបាកនិយាយបញ្ចុះបញ្ចូលអ្នកផ្សេង ពិសេសរុស្ស៊ី និងចិនឲ្យទទួលយកនូវសេចក្តីសម្រេចចិត្តអ្វីមួយក្នុងការបញ្ចប់អំពើហិង្សានៅស៊ីរី។ គឺផ្តើមពីចេញពីហេតុផលទាំងអស់ខាងលើនេះហើយដែលបានបង្ខំអាមេរិកឲ្យផ្តើមពិចារណាលើជម្រើសផ្ទាល់ខ្លួន។
នៅថ្ងៃពុធ ទី៥ តុលានេះ បណ្តាប្រមុខទីភ្នាក់ងារអាមេរិកដែលមានជំនាញខាងសន្តិសុខ និងនយោបាយការបរទេសត្រូវរួមប្រជុំគ្នាដើម្បីបញ្ជូនទៅឲ្យលោកប្រធានាធិបតីអូបាម៉ានូវគ្រប់ជម្រើសទាំងអស់សម្រាប់ដំណោះស្រាយវិបត្តិនៅស៊ីរី។ ជម្រើសទាំងនោះរួមមាន ជម្រើសផ្លូវទូត ជម្រើសផ្លូវយោធា ជម្រើសផ្លូវស៊ើបការណ៍សម្ងាត់ និងជម្រើសសេដ្ឋកិច្ច។ តែយ៉ាងណាក៏ដោយ អ្នកនាំពាក្យក្រសួងការបរទេសអាមេរិកបានថ្លែងគូសបញ្ចាក់ពីភាពចាំបាច់ក្នុងការដោះស្រាយបញ្ហាតាមផ្លូវនយោបាយ។
តើទឹកដីស៊ីរីកំពុងក្លាយជាសមរភូមិនៃការប្រឈមមុខគ្នាផ្លូវអាវុធរវាងអាមេរិក និងរុស្ស៊ីឬ?
អ្វីដែលច្បាស់ និងអាចនិយាយបាននៅចំពោះមុខពេលនេះគឺថា ទឹកដីស៊ីរីកំពុងក្លាយជាសមរភូមិនៃការបង្ហាញសាច់ដុំដាក់គ្នារវាងមហាអំណាចអាមេរិក និរុស្ស៊ី។ ក្រសួងការពារជាតិរុស្ស៊ីបានប្រកាសឲ្យដឹងពីការដាក់ពង្រាយប្រព័ន្ធមីស៊ីលការពារដែនអាកាសប្រភេទ S-៣០០ នៅស្រុកកំពង់ផែតារទូប៉ែកភាគពាយព្យប្រទេសស៊ីរី។ នេះជាប្រព័ន្ធមីស៊ីលការពារដែនអាកាសទី២ ដែលរុស្ស៊ីបានដាក់តាំងក្នុងទឹកដីស៊ីរី បន្ទាប់ពីប្រព័ន្ធមីស៊ីលការពារដែនអាកាសទី១ ប្រភេទ S-៤០០ ដាក់តាំងនៅមូលដ្ឋានទ័ពអាកាសក្នុងស្រុកកំពង់ផែម៉ីមីមកាលពីខែវិច្ឆិកា ឆ្នាំ ២០១៥។
ជាមួយនឹងវត្តមានប្រព័ន្ធមីស៊ីលការពារដែនអាកាសទាំងពីរនេះ រុស្ស៊ីនឹងអាចធានាសុវត្ថិភាពយុទ្ធនាការផ្លូវអាកាសរបស់ខ្លួនក្នុងទឹកដីស៊ីរី ពិសេសការពារមូលដ្ឋានទ័ពអាកាសក្នុងខេត្តឡាតាក់កេដែលរស្ស៊ីមានយន្តហោះទម្លាក់គ្រាប់បែកប្រមាណជា ១០គ្រឿង យន្តហោះចម្បាំង និងឧទ្ធម្ភាគចក្រជាច្រើនគ្រឿង។ បន្ទាប់ពីការប្រកាសរបស់ក្រសួងការពារជាតិរុស្ស៊ីរបៀបនេះ ក្រសួងការពារជាតិអាមេរិកក៏បានបញ្ចេញប្រតិកម្មភ្លាមៗដោយព្រមានថា អាមេរិកនឹងធ្វើការវាយបកចាស់ដៃចំពោះការប្រើប្រាស់ប្រព័ន្ធមីស៊ីលទាំងនេះដើម្បីប្រឆាំងនឹងយន្តហោះអាមេរិកាំងនៅស៊ីរី។
អ្នកនាំពាក្យក្រសួងការពារជាតិអាមេរិកលោក Peter Cook បាននិយាយទៅកាន់រុស្ស៊ី និងអ្នកដែលកំពុងជាប់ពាក់ព័ន្ធក្នុងវិបត្តិស៊ីរីទាំងអស់ឲ្យយល់ច្បាស់ថា អាមេរិកយកចិត្តទុកដាក់ខ្លាំងណាស់ចំពោះសន្តិសុខ និងសុវត្ថិភាពអាកាសយានិកអាមេរិកាំង។
ទ្វារនៃដំណោះស្រាយតាមផ្លូវនយោបាយឲ្យវិបត្តិស៊ីរីនៅបន្តបើកចំហ
ទន្ទឹមនឹងការបង្ហាញសាច់ដុំ និងដំឡើងសម្លេងដាក់គ្នា អាមេរិក និងរុស្ស៊ីសុទ្ធតែបានអះអាងថា ទ្វារនៃដំណោះស្រាយបញ្ហាដោយសន្តិវិធីនៅមិនទាន់បានបិទទាំងស្រុងទេ។ សម្រាប់អាមេរិក លោកប្រមុខការទូតចន ឃែរីបានថ្លែងពីទីក្រុងព្រុចសែល ប្រទេសបែលហ្ស៊ិកដោយបញ្ជាក់ជាថ្មីម្តងទៀតថា អាមេរិកមិនបោះបង់ចោលការប្រឹងប្រែងស្វែងរកសន្តិភាពឲ្យប្រទេស និងប្រជាជនស៊ីរីទេ។
ប្រសាសន៍លោក ចន ឃែរី ប្រែសម្រួលដោយ សេង ឌីណា
« ខ្ញុំចង់បញ្ជាក់ឲ្យគ្រប់គ្នាដឹងច្បាស់ថា យើងមិនបោះបង់ប្រជាជនស៊ីរីនោះទេ... យើងមិនបោះបង់ការប្រឹងប្រែងស្វែងរកសន្តិភាពយើងមិនបោះបង់កិច្ចខិតខំប្រឹងប្រែងខាងការទូតពហុភាគី... យើងនឹងនៅតែបន្តស្វែងរកច្រកចេញដើម្បីឈានទៅបញ្ចប់សង្រ្គាមនេះ។
យើងក៏មិនបោះបង់ចោលដែរនូវទំនាក់ទំនងជាមួយកងទ័ពរុស្ស៊ីដើម្បីបញ្ចៀសរាល់ការប៉ះទង្គិចគ្នា និងដើម្បីបង្កើនប្រសិទ្ធភាពក្នុងការប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម។
យើងនឹងបន្តខិតខំប្រឹងប្រែងដូចអ្វីដែលយើងធ្លាប់បានធ្វើពីមុនដើម្បីធ្វើយ៉ាងណាសម្រេចឲ្យបាននូវបទឈប់បាញ់មួយដែលធានាបាននូវការអនុវត្តនៅលើដីជាក់ស្តែង និងមានសុពលភាពយូរអង្វែង ហើយជាបទឈប់បាញ់ដែលមានវិសាលភាពទូទាំងប្រទេស ក្នុងនោះក៏មានដែរ ការបញ្ចប់ការវាយប្រហារតាមផ្លូវអាកាសពីសំណាក់កងទ័ពរដ្ឋាភិបាល និងរុស្ស៊ីទៅលើតំបន់មួយចំនួន »។
ឃើញថាពេលនេះ ទ្រឹស្តីក៏មាន ឆន្ទៈក៏មានដែរ តែការអនុវត្តជាក់ស្តែងយ៉ាងណានោះ គេត្រូវរង់ចាំមើលនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ