រុស្ស៊ី បោះឆ្នោតសភាឌូម៉ានីតិកាលថ្មី ដែលពុំសូវមានការចាប់អារម្មណ៍
ចុះផ្សាយនៅថ្ងៃ៖
ស្តាប់ - ០៥:០៨
ថ្ងៃអាទិត្យ ១៨កញ្ញានេះ អ្នកស្រុករុស្ស៊ីដែលមានសិទ្ធិបោះឆ្នោត ចំនួន១១១លាន ៦សែននាក់ នាំគ្នាទៅកាន់ការិយាល័យបោះឆ្នោត ចំនួនជាង ៩ម៉ឺន៤ពាន់កន្លែង ដែលបើកនៅតាមខេត្តទាំង៨៥ចំណុះសហព័ន្ធរុស្ស៊ី លាតសន្ធឹង ពីកើតទៅលិច ចម្ងាយជាង ១ម៉ឺនគ.ម. ទាល់តែខុសម៉ោងគ្នា ដល់ទៅ១១ម៉ោងឯណោះ។
គេបោះឆ្នោតដើម្បីរើសសភាឌូម៉ានីតិកាលថ្មីមាន៤៥០អាសនៈ សម្រាប់ អាណត្តិ៥ឆ្នាំទៅមុខទៀត ដែលស្របនឹងការស្ទង់មតិ គឺបក្សកាន់អំណាចសព្វថ្ងៃ ឈ្មោះបក្សប្រទេសរុស្ស៊ីរួមធ្លុងមួយ ដែលគាំទ្របន្ទាត់នយោបាយវិមានក្រេមឡាំងពេញទី ដែលនឹងទទួលបានអាសនៈ ភាគច្រើនដដែល។ នេះ គឺក្រោយពីបានប្រព្រឹត្តទៅ យុទ្ធនាការបោះឆ្នោត ដែលមិនសូវនាំឲ្យបណ្តាជនចាប់ភ្លឹកណាស់ណាទេ ក្នុងប្រទេសរុស្ស៊ីសព្វថ្ងៃ ញាំញីដោយសេដ្ឋកិច្ចក្នុងស្ថានភាពដើរថយក្រោយ ទាំងក្រោមសម្ពាធនៃទណ្ឌកម្មបស្ចិមលោក មកពីរុស្ស៊ី បានភ្ជាប់យកទឹកដីគ្រីមេ ផ្តាច់ចេញពីអ៊ុយក្រែន កាលពី២ឆ្នាំកន្លះមុន។
ម៉្លោះហើយ បានជាការបោះឆ្នោត រើសសភាឌូម៉ា លើកនេះ ក៏ប្រព្រឹត្តទៅ ទាំងនៅលើដែនដី គ្រីមេផង ប៉ុន្តែអាជ្ញាធរក្រុងគៀវ បានអំពាវនាវបស្ចិមលោកទៅហើយ កុំឲ្យទទួលស្គាល់ លទ្ធផលនៃការបោះឆ្នោតនេះអី ដ្បិតវាប្រព្រឹត្តទៅ នៅលើដែនដី ដែលអ៊ុយក្រែនបន្តចាត់ទុកជាដែនដីខ្លួនដដែល ដែលស្ថិតនៅក្រោមការកាន់កាប់របស់ក្រុងម៉ូស្គូទេតើ។
ការបោះឆ្នោតនៅរុស្ស៊ីថ្ងៃនេះ តាមដានពិនិត្យមើល នៅផ្ទាល់នឹងការិយាល័យបោះឆ្នោត ដោយអ្នកសង្កេតការណ៍បរទេស ចំនួន ៦៧៤នាក់។
អំពីនីតិវិធី នៃការបោះឆ្នោតរើសភាឌូម៉ា
ថ្ងៃអាទិត្យ ១៨កញ្ញានេះ តាំងពីម៉ោង៨ព្រឹក រហូតដល់ម៉ោង៨យប់ ប្រព្រឹត្តទៅ ការបោះឆ្នោតរើសសភាជាន់ក្រោមនៃរដ្ឋសភារុស្ស៊ី ហៅថាសភាឌូម៉ា នីតិកាលថ្មី ដែលតាមលេខរៀង គិតពីឆ្នាំ១៩៩៣មក គឺជានីតិកាលទី៧។ បើគិតពីឆ្នាំ២០០៣មក លើកនេះ ជាលើក ទី១ ដែលការបោះឆ្នោតប្រព្រឹត្តទៅ តាមប្រព័ន្ធចម្រុះ គឺថា ពីក្នុងចំណោមអាសនៈចំនួន៤៥០ នៃសភាឌូម៉ា សម្រាប់អាណត្តិ៥ឆ្នាំទៅមុខទៀត ៖ ២២៥នាក់ ជ្រើសរើសតាមប្រព័ន្ធសមាមាត្រ ២២៥នាក់ទៀត ជ្រើសរើសតាមប្រព័ន្ធឯកតនាម។ ចូលប្រឡូកក្នុងការបោះឆ្នោត តាមប្រព័ន្ធសមាមាត្រ គឺ មានគណបក្សចំនួន១៤ ដែលបញ្ឈរឈ្មោះបេក្ខជនខ្លួនដល់ទៅ ជាង ៤.០០០ នាក់ ឬជាមធ្យម ១៥នាក់ ដើម្បីដណ្តើមយកបាន១អាសនៈ ហើយ តាមប្រព័ន្ធឯកតនាម គឺបេក្ខជន ជាង ២.០០០នាក់ ឬ ជាមធ្យម ៩នាក់ដើម្បីដណ្តើមយក១អាសនៈ។ សន្មត់ថា ជាប់ឆ្នោត តាមប្រព័ន្ធសមាមាត្រ លុះណាតែគណបក្ស នេះឬនោះ ចេះទទួលបានសម្លេងគាំទ្រអ្នកស្រុកម្ចាស់ឆ្នោត មិនតិចជាង៥%ឡើយ។ ចំណែកបេក្ខជនដែលឈរឈ្មោះតាមប្រព័ន្ធឯកតនាម នៅតាមមណ្ឌលបោះឆ្នោតចំនួន ២២៥មណ្ឌល ដើម្បីជាប់ឆ្នោតមានអាសនៈ ប្រចាំនៅសភាឌូម៉ា ត្រូវទទួលឲ្យបានសម្លេងគាំទ្រ ក្នុងចំនួន៥០%+១សម្លេងនៃអ្នកស្រុកម្ចាស់ឆ្នោតរស់នៅក្នុងមណ្ឌលនោះ។
នៅរុស្ស៊ី អ្នកស្រុកដែលមានសិទ្ធិបោះឆ្នោត មានចំនួន ១១១លាន៦សែននាក់ ពីក្នុងបណ្តាជនទូទាំងប្រទេសក្នុងចំនួន១៤៦លាន៥សែននាក់។ នៅតាមខេត្តទាំង៨៥ ចំណុះសហព័ន្ធរុស្ស៊ីមានបើកការិយាល័យបោះឆ្នោត ជាង ៩៤.០០០កន្លែង។ តាមប្រសាសន៍ លោកស្រី Ella Panfilova ការបោះឆ្នោតនេះ តាមដានពិនិត្យដោយអ្នកសង្កេតការណ៍បរទេស ចំនួន៦៧៤ នាក់។ លទ្ធផលត្រួសៗជាមុន នៃការបោះឆ្នោត នឹងត្រូវប្រកាសឲ្យដឹង គឺក្រោយ ពីនៅឯខេត្តប៉ែកខាងលិចបង្អស់នៃសហព័ន្ធរុស្ស៊ី ខេត្ត Kalinnongrad បិទឲ្យឈប់ដំណើរការការិយាល័យបោះឆ្នោត នៅម៉ោង៨យប់ ដែលត្រូវនឹងម៉ោង ៩យប់ម៉ោងនៅ រដ្ឋធានីម៉ូស្គូ។
គួរនិយាយថា ថ្ងៃអាទិត្យ ១៨កញ្ញានេះ ក៏ប្រព្រឹត្តទៅ ទាំងការបោះឆ្នោតរើសអភិបាលខេត្តថ្មី ចំនួន៩ និងរើសសភាខេត្តនីតិកាលថ្មី ចំនួន ៣៩ ពីក្នុងចំណោមខេត្តទាំង៨៥ ដែលចំណុះសហព័ន្ធរុស្ស៊ី។
តើហេតុអ្វីបានជាអ្នកស្រុកជាទូទៅ ហាក់បីមិនសូវអើពើចាប់អារម្មណ៍ទៅលើការបោះឆ្នោតថ្ងៃ១៨កញ្ញានេះ?
មូលហេតុ តាមមើលទៅមកពីគេដឹងជាមុនទៅហើយថា បក្សកាន់អំណាច ឈ្មោះ ប្រទេសរុស្ស៊ីរួមធ្លុងមួយ គង់នឹងឈ្នះឆ្នោតដដែលជាដដែល ហើយគ្មានអ្វីនឹងប្រែប្រួល ជាធំដុំទេ ក្នុងជីវភាពរស់នៅរបស់គេ។ ប៉ុន្តែសំខាន់សម្រាប់បណ្តាជន ដែលនឹងបោះឆ្នោត ឲ្យបក្សកាន់អំណាចសព្វថ្ងៃ គឺកត្តាជាគោល ដោយគេកក់ក្តៅក្នុងចិត្តថា បក្សនេះនឹងចេះរក្សា ស្ថានការណ៍ក្នុងប្រទេសឲ្យមានស្ថិរភាព មិនបោកកញ្ជ្រោក ដូចនៅតាមប្រទេសជិតខាងណា ដែលបានឆ្លងកាត់របស់ដែលហៅថា “បដិវត្តន៍ពណ៌” តួយ៉ាងអ៊ុយក្រែន ស៊ីជោរទៅតាមពន្យុះរបស់បស្ចិមលោក ដែលជ្រោងលើកឡើង នូវគោលការណ៍ “ប្រជាធិបតេយ្យ” សម្រាប់ជានុយទាក់ទឹកចិត្តប្រទេស ដែលធ្លាប់បានស្ថិតក្នុងសហភាពសូវៀត ហើយស្គាល់ដង្ហើមសេរីភាព ក្រោយពីបានឯករាជ្យពីសហភាពនេះ។
លោកពូទីន ប្រធានាធិបតីរុស្ស៊ី ដែលបន្តកេរ្ត៍ពីសហភាពសូវៀត ក្នុងបទអន្តរាគមន៍ តាមកញ្ចក់ទូរទស្សន៍ ទៅកាន់ប្រជាជាតិ បានអំពាវនាវអ្នកស្រុកឲ្យទៅកាន់ហឹបឆ្នោតដោយផ្ទាល់ ហើយដោយមិនអាស្រ័យ តើគេគាំទ្រដល់គណបក្សណាឡើយ ដោយបំពេញកាតព្វកិច្ចខ្លួន ជាពលរដ្ឋ គឺ ត្រូវទៅបញ្ចេញសម្លេងខ្លួន “ធ្វើជម្រើសរបស់ខ្លួន បោះឆ្នោតដើម្បីប្រទេសរុស្ស៊ីទៅ”។
ជាការកត់សម្គាល់ លោកពូទីន ដែលប្រជាប្រិយភាពគាត់ មិនដែលធ្លាក់ចុះក្រោម ៨០%ឡើយ ក្នុងសម្ភាសន៍ពេលថ្មីៗ ទៅទីភ្នាក់ងារពត៌មាន Bloomberg បានថ្លែងថា គាត់នៅមិនទាន់អារកាត់ក្នុងចិត្តនៅឡើយ តើគាត់នឹងបញ្ឈរឈ្មោះ ជាបេក្ខជនប្រធានាធិបតី ឬក៏ទេ ក្នុងការបោះឆ្នោតឆ្នាំ ២០១៨ សម្រាប់អាណត្តិទី៤ ពោលគឺសម្រាប់៦ឆ្នាំទៀត។
ប៉ុន្តែ បើបក្សកាន់អំណាច ដែលគាំទ្របន្ទាត់នយោបាយវិមានក្រេមឡាំង ដណ្តើមបានអាសនៈ ភាគច្រើនជាថ្មីទៀត ក្នុងសភាឌូម៉ា វានឹងក្លាយទៅជាសារ លើកទឹកចិត្តគាត់ដែល ទោះបីឥឡូវ មានអាយុ ៦៣ឆ្នាំក្តី ឲ្យឈរឈ្មោះជាថ្មីពុំខាន។
គួរនិយាយថា ក្នុងការបោះឆ្នោតសភាលើកនេះ ខុសពីការបោះឆ្នោតសភា ឆ្នាំ២០១១ វិមានក្រេមឡាំង ប្តេជ្ញាផ្តល់តម្លាភាពដល់វាក្នុងកម្រិតធំធេងទូលំទូលាយជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ