រដ្ឋអ៊ុយក្រែន មាន “យុទ្ធសាស្ត្រថ្មីនៃសន្តិសុខជាតិ” របស់ខ្លួន
លោកប្រធានាធិបតី ប៉េត្រូ ប៉ូរ៉ូឆេនកូ ទើបចុះហត្ថលេខាលើក្រិត្យអនុម័ត សេចក្តីសម្រេចស្តីអំពី “យុទ្ធសាស្ត្រថ្មីនៃសន្តិសុខជាតិអ៊ុយក្រែន” តាក់តែងឡើងដោយ “ក្រុមប្រឹក្សាសន្តិសុខជាតិនិងការពារប្រទេស” កាលពី១០ថ្ងៃមុន។ មុខព្រួញចម្បងនៃយុទ្ធសាស្ត្រនេះ គឺអ៊ុយក្រែនបន្តប្រកាន់យកបន្ទាត់ ឆ្ពោះទៅចូល ជាសមាជិកសហភាពអឺរ៉ុបផង បក្សសម្ព័ន្ធអូតង់ផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ស្របនឹងយុទ្ធសាស្ត្រថ្មីនេះ ទិសដៅជាគ្រឹះមូលដ្ឋាន នៃនយោបាយរដ្ឋអ៊ុយក្រែន ក្នុងវិស័យសន្តិសុខជាតិ គឺ ៖ ស្តារឡើងវិញបូរណភាពដែនដី ក្នុងបរិវេណនៃព្រំដែនរដ្ឋ ដែលទទួលស្គាល់ដោយច្បាប់អន្តរជាតិ, បង្កើតឡើងជាលំហសន្តិសុខ និង ការពារប្រទេស ដែលមានប្រសិទ្ធិភាព, បង្កើនសមត្ថភាពការពារប្រទេស បូកទាំងតាមផ្លូវស៊ីជម្រៅ សហប្រតិបត្តិការ យោធាបច្ចេកទេស ជាមួយបណ្តារដ្ឋ-សមាជិកបក្សសម្ព័ន្ធអូតង់ និង សហភាពអឺរ៉ុប ហើយសម្រេចឲ្យបាននូវឯករាជ្យពេញទី ពីប្រទេសរុស្ស៊ី ក្នុងបញ្ហាផលិតសព្វាវុធ និង គ្រឿងបច្ចេកទេសសឹក។
យុទ្ធសាស្ត្រថ្មី ក៏ប្រមើល ធ្វើកំណែទម្រង់ និងអភិវឌ្ឍន៍អង្គការឈ្លបយកការណ៍ អង្គការចារកិច្ច អង្គការមហាផ្ទៃខាងថែរក្សាសណ្តាប់ធ្នាប់សង្គម, ធ្វើកំណែទម្រង់ប្រព័ន្ធអភិបាលកិច្ចគ្រប់គ្រងរដ្ឋ និងប្រែនយោបាយប្រឆាំងអំពើពុករលួយ ឲ្យមានគុណភាពថ្មី។
ភារកិច្ចមួយជាគន្លឹះ ចោទដោយយុទ្ធសាស្ត្រថ្មី គឺ ធានានូវសមាហរ័ណកម្មរដ្ឋអ៊ុយក្រែន ទៅក្នុងសហភាពអឺរ៉ុប ហើយបន្ទាប់មកបង្កលក្ខណៈសម្រាប់ ចូលជាសមាជិកបក្សសម្ព័ន្ធអូតង់តែម្តង។ ត្រង់ចំណុចនេះ យុទ្ធសាស្ត្រថ្មីកត់សម្គាល់ថា សហប្រតិបត្តិការជាមួយអូតង់នឹងជំរុញឲ្យចាក់ឫសបានជាប់ ក្នុងប្រទេសអ៊ុយក្រែន គឺ រាល់អ្វីៗដែលជាតម្លៃប្រជាធិបតេយ្យ កសាងឡើងនៅអ៊ុយក្រែនជាស្ថានការណ៍ស្ងប់សុខស្រួលប្រកបដោយស្ថិរភាព ហើយសហប្រតិបត្តិការនេះ ជាឧបករណ៍ដ៏សំខាន់គាំទ្រ ដល់កំណែទម្រង់នៅអ៊ុយក្រែន។
ឯកសារទើបចុះហត្ថលេខាដោយប្រធានាធិបតីអ៊ុយក្រែន ក៏ប្រមើលធានាសន្តិសុខជាតិ ខាងវិស័យនយោបាយក្រៅប្រទេស ខាងសន្តិសុខសេដ្ឋកិច្ច សន្តិសុខថាមពល សន្តិសុខពត៌មាន និង ហេដ្ឋារចនាសម្ព័ន្ធ។
លោកប្រធានាធិបតី បានផ្ទុកផ្តាក់រដ្ឋាភិបាលអ៊ុយក្រែន ឲ្យតាក់តែងឡើងជាគម្រោង ឯកសារយុទ្ធសាស្ត្រ ជុំវិញបញ្ហាធ្វើកំណែទម្រង់កងកម្លាំងប្រដាប់អាវុធរបស់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ