ជំនួបកំពូលអ៊ុយក្រែន-សហភាពអឺរ៉ុបនៅក្រុងគៀវ
នេះជាជំនួបកំពូលអ៊ុយក្រែន-សហភាពអឺរ៉ុបលើកទី១៧ ប៉ុន្តែជាលើកទី១ បើគិតតាំងពីនៅអ៊ុយក្រែនមានផ្ទុះឡើងជាវិបត្តិបណ្តាលមកពីប្រធានាធិបតីសម័យនោះ គឺលោកយ៉ានូកូវិច មុនដំបូងថ្លែងថា សុខចិត្តចុះសន្ធិសញ្ញាស្តីអំពីការភ្ជាប់រដ្ឋអ៊ុយក្រែនទៅនឹង “លំហពាណិជ្ជកម្មសេរី“ ជាមួយសហភាពអឺរ៉ុប ប៉ុន្តែបន្ទាប់មក គាត់ស្រាប់តែមិនព្រមចុះទៅវិញ ហេតុដែលបានញ៉ាំងឲ្យមានរលកបះបោរតវ៉ានៃពួកបាតុករអឺរ៉ុបនិយមនៅចំកណ្តាលក្រុងគៀវអស់ ៣ខែជាប់ លុះទាល់តែផ្តួលរូបគាត់ធ្លាក់ពីអំណាចទៅ។
ចុះផ្សាយនៅថ្ងៃ៖
ស្តាប់ - ០២:០៣
ជាការរំលឹកក្នុងក្របខ័ណ្ឌជំនួបកំពូលនៃ ”ភាពជាដៃគូរបស់សហភាពអឺរ៉ុបជាមួយ ៦ប្រទេសនៃអតីតសហភាពសូវៀត គឺអ៊ុយក្រែន ម៉ុលដាវី បេឡារុស អាមេនី ហ្ស័កហ្ស៊ី និងអាស៊ែរប៊ែដហ្សាន“ ស្ថិតនៅខាងកើតទ្វីបអឺរ៉ុបដែលបានប្រព្រឹត្តទៅ នៅក្រុងវិលញូសរដ្ឋធានីលីទុយអានី ថ្ងៃទី២៨ វិច្ឆិកា ឆ្នាំ២០១៣ លោកប្រធានាធិបតីអ៊ុយក្រែនកាលណោះ គឺលោកយ៉ានូកូវិច ស្រាប់តែប្រកែកមិនព្រមចុះហត្ថលេខាលើសន្ធិសញ្ញាស្តីអំពីការភ្ជាប់រដ្ឋអ៊ុយក្រែនទៅនឹង“លំហពាណិជ្ជកម្មសេរី“ ជាមួយសហភាពអឺរ៉ុប ក្រោយពីឮលោកប្រធានាធិបតីរុស្ស៊ី ពូទីនព្រមានថា បើក្រុងគៀវហ៊ានចុះមែន នោះអ៊ុយក្រែនលែងអាចភ្ជាប់ខ្លួនមកនឹង “សហភាពឥតពន្ធគយ“ ដែលមានរុស្ស៊ី បេឡារុស កាហ្សាក់ស្ថានជាសមាជិក។
កាលណោះ លោកយ៉ានូកូវិចបានសំណូមពរថា មុននឹងចុះឯកសារនេះទៅកើត គប្បីបើកធ្វើទៅជាកិច្ចចរចាត្រីភាគីអ៊ុយក្រែន សហភាពអឺរ៉ុប រុស្ស៊ី ពីព្រោះអ៊ុយក្រែនមានចំណងសេដ្ឋកិច្ចសាំញ៉ាំគ្រប់ជ្រុងជ្រោយជាមួយរុស្ស៊ី ដោយមិនអាចកាត់ផ្តាច់ចំណងនេះយ៉ាងផុយឡើយ។ សហភាពអឺរ៉ុបបានច្រានចោលសំណើអ៊ុយក្រែននេះ ដោយចាត់ទុកវាជារឿងមិនធ្លាប់មានឡើយក្នុងប្រវត្តិខ្លួន។ ប៉ុន្តែក្រោយពីលោកយ៉ានូកូវិចធ្លាក់ពីអំណាចទៅនៅថ្ងៃទី២២ កុម្ភៈ ឆ្នាំ២០១៤ រដ្ឋាភិបាលថ្មីនៅអ៊ុយក្រែនក៏បានចុះហត្ថលេខាមែនលើសន្ធិសញ្ញាស្តីអំពីការភ្ជាប់រដ្ឋអ៊ុយក្រែនទៅនឹង“លំហពាណិជ្ជកម្មសេរី“ ជាមួយសហភាពអឺរ៉ុបនៅថ្ងៃទី២១ មីនា។ ហើយជំនួបត្រីភាគីអ៊ុយក្រែន សហភាពអឺរ៉ុប និងរុស្ស៊ីក៏បានប្រព្រឹត្តទៅជាលើកទី១ គឺថ្ងៃទី១១ កក្កដានៅក្រុងព្រុចសែល។
រួចបន្ទាប់មកនៅថ្ងៃទី១២ កញ្ញាក៏មានប្រព្រឹត្តទៅជាលើកទី២ ជំនួបត្រីភាគីនោះដោយបានអនុម័តយកកិច្ចព្រមព្រៀងស្តីអំពីការព្យួរទុកសិន យ៉ាងហោចណាស់រហូតដល់ថ្ងៃទី១ កមរា ឆ្នាំ២០១៦ នូវការអនុវត្តន៍តាមសន្ធិសញ្ញាស្តីអំពីការស៊ីជម្រៅសមាហរ័ណកម្មសេដ្ឋកិច្ចអ៊ុយក្រែនទៅក្នុងលំហសហភាពអឺរ៉ុបដើម្បីទុកលទ្ធភាពឲ្យអ៊ុយក្រែនប្រើប្រាស់របបអនុគ្រោះក្នុងលំហពាណិជ្ជកម្មសេរីនៃសហគមន៍រដ្ឋឯករាជ្យហៅកាត់ថា CEI៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ