ការប្រយុទ្ធប្រឆាំងភេរវកម្ម ៖ អឺរ៉ុបធ្វើដំណើរឆ្ពោះទៅរកយុទ្ធសាស្ត្ររួម
ចុះផ្សាយនៅថ្ងៃ៖
ស្តាប់ - ០៥:៣៤
រដ្ឋមន្ត្រីការបរទេសអឺរ៉ុបទាំង២៨ប្រទេស ត្រូវជួបប្រជុំគ្នានៅថ្ងៃនេះ នៅទីក្រុងព្រុចសែល ប្រទេសបែលហ្សិក។ កិច្ចប្រជុំដែលមានទិសដៅបង្ហាញអំពីឆន្ទៈដាច់ខាត ក្នុងការធ្វើឱ្យប្រសើរឡើងផ្នែកសហប្រតិបត្តិការរវាងប្រទេសជាសមាជិកទាំង២៨ ក្នុងវិស័យស៊ើបអង្កេត ផ្តោះប្តូរព័ត៌មានដើម្បីប្រយុទ្ធប្រឆាំងនឹងអំពើភេរវនិយមជីហាត។ រដ្ឋមន្ត្រីការបរទេសបារាំងបានពាំនាំទៅជានូវផែនការសកម្ម ៧ចំណុច ដូចជាពង្រឹងការត្រួតពិនិត្យតាមព្រំដែន តាមដានជាប់ជនមាននិន្នាការជ្រុលនិយមក្នុងពន្ធនាគារ តាមអ៊ីនធ័រនែត ឬក៏បង្កើតបញ្ជីឈ្មោះអ្នកដំណើរតាមផ្លូវអាកាស ។ល។និង។ល។
ក្រៅអំពីត្រូវពិភាក្សាអំពីទំនាក់ទំនងជារុស្ស៊ីដ៏តានតឹង ប្រធានបទដែលសំខាន់និងធំបំផុតនៃកិច្ចប្រជុំគឺស្វែងរកការពង្រឹងកិច្ចសហប្រតិបត្តិការប្រយុទ្ធប្រឆាំងភេរវកម្ម ដោយមានអគ្គលេខាធិការសម្ព័ន្ធអារ៉ាប ជាភ្ញៀវពិសេសចូលរួមជាមួយផង។ អឺរ៉ុបចង់បង្ហាញឆន្ទៈដាច់ខាតផង និងបង្ហាញពីឯកភាពគ្នាផងលើវិស័យការពារសន្តិសុខជាតិ ប្រឆាំងនឹងភេរវកម្មមិនមែនត្រឹមថ្នាក់អឺរ៉ុបឡើយ។
វាមិនមែនជាការកម្រទេ ដែលជំនួបប្រជុំថ្នាក់រដ្ឋមន្ត្រីការបរទេស លើកមកជជែកអំពីការប្រយុទ្ធប្រឆាំងភេរវកម្ម។ ប៉ុន្តែនៅថ្ងៃនេះ បន្ទាប់ពីបានប្រកាសតាមប្រព័ន្ធឃោសនា បន្ទាប់ពីមានសំណើផ្សេងៗពីសំណាក់អ្នកឯកទេស បក្សប្រឆាំង ប្រមុខរដ្ឋាភិបាល ផែនការសកម្មថ្នាក់អឺរ៉ុប ត្រូវបានលើកយកមកលាតត្រដាង នៅលើតុ ដើម្បីពិភាក្សារកយុទ្ធសាស្ត្ររួម និងសហការគ្នា។ សហភាពអឺរ៉ុបមានឆន្ទៈជាងពេលណាៗទាំងអស់ ប្រែក្លាយជំនួបប្រជុំថ្ងៃនេះ ឱ្យទៅជាសកម្មភាពជាក់ស្តែងឱ្យបានកាន់តែឆាប់។
ប្រធានបទដែលអាទិភាព និងដែលត្រូវយកជជែកគ្នាស៊ីជម្រៅ មានជាអាទិ៍ ៖ កិច្ចសហប្រតិបត្តិការផ្នែកស៊ើបអង្កេត បង្កើតបញ្ជីឈ្មោះអ្នកដំណើរផ្លូវអាកាសរួមថ្នាក់អឺរ៉ុប ការប្រយុទ្ធប្រឆាំងនឹងការជួញដូរអាវុធ ការតាមដានបម្រើបម្រាស់តាមអ៊ីនធ័រនែតរបស់ក្រុមផ្តាច់ខ្លួនធ្វើជាអ្នកជ្រុលនិយម។
ប្រធានបទទាំងអស់នេះ ជាសមត្ថកិច្ចរបស់រដ្ឋមន្ត្រីក្រសួងមហាផ្ទៃច្រើនជាង ប៉ុន្តែនៅក្នុងចំណោមផែនការ៧ចំណុច របស់រដ្ឋមន្ត្រីការបរទេសបារាំង មានស្នើឱ្យត្រួតពិនិត្យតាមព្រំដែន (ខាងក្រៅ) ព្រំដែនរបស់អឺរ៉ុប ជាពិសេសព្រំដែនខាងត្បូង តាមបណ្តោយសមុទ្ទមេឌីទែរ៉ាណេ។
ម្យ៉ាងវិញទៀត ជំនួបថ្ងៃនេះ គឺជាដំណាក់កាលដំបូង មុននឹងឈានដល់ជំនួបប្រជុំថ្នាក់រដ្ឋមន្ត្រីក្រសួងមហាផ្ទៃអឺរ៉ុបនៅថ្ងៃទី ២៨មករា និងជំនួបកំពូលថ្នាក់ប្រមុខរដ្ឋប្រមុខរដ្ឋាភិបាលនៅថ្ងៃទី ១២ កុម្ភៈ២០១៥ខាងមុខនេះ ស្តីពីការប្រយុទ្ធប្រឆាំងភេរវកម្មនិងយុទ្ធជនជីហាតមកពីស៊ីរីនិងអ៊ីរ៉ាក់។
លើសពីនេះទៅទៀត ដើម្បីជាសក្ខីភាពនៃការរួបរួមអន្តរជាតិ ប្រមុខការបរទេសអឺរ៉ុបក៏នឹងអញ្ជើញ ទៅចូលរួមនៅទីក្រុងឡុងដ៍ប្រទេសអង់គ្លេស ក្នុងជំនួបអង់គ្លេសអាមេរិក ព្រមទាំងប្រទេសជាសមាជិកសម្ព័ន្ធអន្តរជាតិប្រឆាំងនឹងអង្គការជីហាតរដ្ឋអ៊ីស្លាម នៅអ៊ីរ៉ាក់និងនៅស៊ីរី។
ឆន្ទៈនយោបាយ
ភ្នាក់ងារអង្កេតរបស់រដ្ឋជាសមាជិកនីមួយៗ ធ្លាប់ និងសហការគ្នា យ៉ាងជិតស្និទ្ធតែរហូតមក ហើយក៏មានដំណើរការយ៉ាងរលូនដែរ។ ព្រោះគ្រប់គ្នាសុទ្ធតែយល់ និងដឹង ថាមានពាក់ព័ន្ធនឹងការគំរាមកំហែងភេរវកម្មដូចគ្នា ប៉ុន្តែប្រទេសនីមួយៗមានច្បាប់ខុសគ្នា។ វិធានការចង់បង្កើតបញ្ជីឈ្មោះអ្នកដំណើរផ្លូវអាកាសអឺរ៉ុប ដែលនឹងអនុញ្ញាតឱ្យភ្នាក់ងារស៊ើបការណ៍អាចដឹងបានភ្លាមអំពីការធ្វើដំណើររបស់ជនសង្ស័យជីហាត ត្រូវជាប់គាំងនៅសភាអឺរ៉ុប។
ត្រឹមចំណុចនេះ យើងអាចនិយាយបាន នៅខ្វះតែឆន្ទៈនយោបាយប៉ុណ្ណោះ ក្នុងការបន្ស៊ីច្បាប់ឱ្យត្រូវនិងស្របគ្នា ជាពិសេសជុំវិញច្បាប់ប្រឆាំងភេរវកម្ម និងច្បាប់ប្រឆាំងនឹងឧក្រិដ្ឋកម្មជាក្រុម ព្រមទាំងការជួញដូរអាវុធ។ គេមិនអាចគិតគូរតែអំពីការប្រយុទ្ធប្រឆាំងភេរវកម្ម ដោយមិនទប់ស្កាត់ការជួញដូរអាវុធដែលឧក្រិដ្ឋកម្មរៀបចំជាក្រុមបានឡើយ។
ហេតុដូច្នេះហើយបានជារដ្ឋមន្ត្រីក្រសួងការបរទេសបារាំង និងប្រមុខការទូតអឺរ៉ុប ចង់ឱ្យសភាអឺរ៉ុបបើកភ្លើងខៀវព្រមឱ្យមានបង្កើតបញ្ជីឈ្មោះអ្នកដំណើរតាមផ្លូវអាកាសរួមថ្នាក់អឺរ៉ុប ឯចំណែករដ្ឋមន្ត្រីការបរទេសបែលហ្សិកចង់ឱ្យមានការផ្តោះប្តូរព័ត៌មានគ្នា ដើម្បីអាចតានដានរួមគ្នាដានធ្វើដំណើររបស់ជនសង្ស័យ។
ពង្រឹងការត្រួតពិនិត្យព្រំដែនអឺរ៉ុប
ការត្រួតពិនិត្យព្រំដែនក្រៅ ព្រំដែនអឺរ៉ុប គួរតែត្រូវពង្រឹង។ ប្រសិនបើ អឺរ៉ុបមានការត្រួតពិនិត្យព្រំដែនបានហ្មត់ចត់ និងមានបញ្ជីឈ្មោះរួម គេនឹងអាចបានដឹងអំពីដំណើរទៅ-មករបស់ភេរវជនចេញទៅធ្វើជីហាតនៅប្រទេសស៊ីរី ឬអ៊ីរ៉ាក់ ... ហើយសេរីភាពនៃការធ្វើដំណើរក្នុងផ្ទៃអឺរ៉ុប អាចត្រូវចោទជាបញ្ហា។
ទាក់ទងនឹងការត្រួតពិនិត្យព្រំដែនអឺរ៉ុបនេះ កិច្ចសហប្រតិបត្តិការជាមួយប្រទេសជិតខាងអឺរ៉ុប គួរតែបានគិតគូរ។ តួកគីត្រូវបានគេចង្អុលមុខជា អំពី កង្វះឆន្ទៈក្នុងការកិច្ចសហប្រតិបត្តិការ ជាមួយអឺរ៉ុបជាពិសេសនៅពេលដែលជនជីហាត ឆ្លងកាត់តាមតួកគីសំដៅនិងមកពីស៊ីរីឬអ៊ីរ៉ាក់។ ការវិវឌ្ឍន៍ចលនាជីហាតនៅលីប៊ី ក៏ជាកង្វល់របស់អឺរ៉ុបដែរ ព្រោះអឺរ៉ុបយល់ច្បាស់ថាលីប៊ីដែលគ្មានការគ្រប់គ្រងត្រឹមត្រូវ ត្រូវការអន្តរាគមន៍យោធា នៅថ្ងៃណាមួយ ប៉ុន្តែអឺរ៉ុបគ្មានកម្លាំង។ រដ្ឋាភិបាលខ្លះបានចោទសួររួចទៅហើយ ថាដល់វេលាដែលអឺរ៉ុបត្រូវបង្កើនថវិកាផ្នែកការពារជាតិ។ ប្រទេសខ្លះបានសម្រេចតែម្នាក់ឯងរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ