លោក Loukachenko ដែលឈ្នះឆ្នោតជាថ្មី លែងខ្វល់នឹងមតិទិតៀន
ចុះផ្សាយនៅថ្ងៃ៖
ស្តាប់ - ០៦:៥២
បស្ចឹមលោកបន្តទិតៀនថា ការបោះឆ្នោតកន្លងទៅនៅបេឡូរុស្ស៊ីមិនឆ្លើយស្របនឹងស្តង់ដារប្រជាធិបតេយ្យ ហើយថាលទ្ធផលវា មិនអាចយកជាការបាន។ មិនតែប៉ុណ្ណោះ បស្ចឹមលោកថ្កោលទោសកងកម្លាំងរបស់រដ្ឋអំណាចបេឡូរុស្ស៊ី ដែលបានវាយបង្ក្រាបគ្មានប្រណីពួកបាតុករខាងបក្សប្រឆាំង ដែលបានត្រូវចាប់ខ្លួនញាត់បញ្ចូលទៅក្នុងកន្លែងឃុំឃាំងដល់ជាង៦០០នាក់ឯណោះ។ លោក Loukachenko មិនខ្វល់នឹងមតិទិតៀនថែមទាំងកំញើញចេញផ្សាយឯកសារសម្ងាត់នានា ដែលបរិហារអាក្រាត រាល់នរណាដែលស្ថិតនៅពីក្រោយខ្នងបក្សប្រឆាំងនៅ បេឡូរុស្ស៊ីទៅផង។
ពួកបាតុករដែលតាមសំដីលោក Loukachenko ផ្ទាល់ គឺមានគ្នាដល់ ៦៣៤នាក់ឯណោះ ថ្ងៃ២១ធ្នូម្សិលមិញ ត្រូវបានតុលាការក្រុង Minsk កាត់ទោស ឲ្យនៅជាប់ក្នុងកន្លែងឃុំឃាំងនៃពន្ធនាគារទីក្រុងនោះ ម្នាក់ៗគឺពី៥ដល់១៥ថ្ងៃ ចំពោះការប្រព្រឹត្តបទល្មើសរដ្ឋបាលបង្ខូចសណ្តាប់ធ្នាប់សង្គម កាលពីល្ងាចថ្ងៃ១៩ធ្នូកន្លងទៅ ពេលគេតវ៉ាទល់នឹងលទ្ធផលដែលថា លោក Loukachenko ឈ្នះឆ្នោតដោយមានសម្លេងគាំទ្រដល់ជិត៨០%ស្អីណា។
គួរនិយាយថា ក្នុងចំណោមនោះ មានទាំងជាតិរុស្ស៊ី ៩នាក់ផង ដែលម្នាក់ៗត្រូវបានកាត់ទោសឲ្យជាប់ឃុំឃាំង១០ថ្ងៃ រួចម្សិលមិញដដែល មានតំណាងស្ថានទូតរុស្ស៊ីបានទៅសួរសុខទុក្ខគេទៅផង។ តាមសំដីជាតិរុស្ស៊ីទាំងនោះ ល័ក្ខខ័ណ្ឌឃុំឃាំងគេ គឺធម្មតាគ្មានអំពើហិង្សាអ្វីណាលើរូបគេឡើយ។ ទាក់ទងនឹងរឿងនេះ ក្រសួងការបរទេសរុស្ស៊ី បន្តទាមទារពីអាជ្ញាធរបេឡូរុស្ស៊ីឲ្យដោះលែងពលរដ្ឋរុស្ស៊ីទាំងនោះជាបន្ទាន់ ដោយចោទភាគីបេឡូរុស្ស៊ី ថាបំពានយ៉ាងកម្រោលលើសេរីភាពបញ្ចេញវោហារ។ រីឯ ក្នុងចំណោមបេក្ខជនប្រធានាធិបតី៥នាក់ ជាមេដឹកនាំបក្សប្រឆាំងនានា ដែលថ្ងៃនោះឯងត្រូវបានចាប់ឃុំឃាំងដែរ ២នាក់ត្រូវបានព្រលែងឲ្យមានសេរីភាពវិញ។ ព្រមជាមួយនេះ ក្រសួងយុត្តិធម៌បេឡូរុស្ស៊ី បានព្រមានថា នឹងហាមឲ្យឈប់ដំណើរការ បក្សប្រឆាំងណាដែលហ៊ានបំបះគ្នីគ្នាខ្លួន ឲ្យធ្វើបាតកម្ម បង្ខូចសណ្តាប់ធ្នាប់សង្គម។
លោកLoukachenko មិនខ្វល់នឹងការទិតៀនរបស់បស្ចិមលោកឡើយ។ មូលហេតុ ជាបឋម គឺមកពីស្ថានភាពភូមិសាស្ត្រនយោបាយរបស់បេឡូរុស្ស៊ី។ ដូចគេឃើញស្រាប់ ប្រទេសនេះស្ថិតនៅប៉ែកខាងលិចបង្អស់នៃអតីត សហភាពសូវៀត គឺនៅជាប់នឹងព្រំប្រទល់ខាងកើតបំផុត របស់ប្រទេសប៉ូឡូញជាសមាជិកបក្សសម្ពន្ធOTAN បានន័យថា គឺពិតជាដែនដីបេឡូរុស្ស៊ីដែលដើរតួ ជាទ្រនាប់ម្យ៉ាងខ័ណ្ឌបក្ស OTAN ពីប្រទេសរុស្ស៊ី។ អ៊ីចឹងហើយ បានជាលោក Loukachenko យល់ដឹងក្នុងចិត្តថា រុស្ស៊ីតែងត្រូវការ ដែនដីបេឡូរុស្ស៊ីជានិច្ចសំរាប់ដាក់ឲ្យប្រចាំការ គឺប្រព័ន្ធការពារដែនអាកាសហៅថានៅ “ជួរមុខ” សំរាប់ទប់ស្កាត់ជាមុន នឹងការវាយប្រហារជាយថាហេតុពីខាងកងកាំជ្រួចមីស្ស៊ីលរបស់ OTAN។ មិនតែប៉ុណ្ណោះ ដែនដីបេឡូរុស្ស៊ី ក៏ដើរតួសំខាន់ដែរ សំរាប់បង្ហូរឧស្ម័នរុស្ស៊ីឆ្លងកាត់ ទៅផ្គត់ផ្គង់ឲ្យ៣ប្រទេសនៃសហភាពអឺរ៉ុប ពោលគឺ លីទុយអានី ប៉ូឡូ្ញញនិង អាល្លឺម៉ង់ ទោះបីការបង្ហូរនេះ គឺតែក្នុងទំហំ ២០%ប៉ុណ្ណោះ នៃបរិមាណឧស្ម័នដែលរុស្ស៊ី លក់ទៅឲ្យសហភាពអឺរ៉ុបទាំងមូល។ដោយយកចិត្តបេឡូរុស្ស៊ី តាំងពីសហភាពសូវៀតរលាយទៅក្នុងឆ្នាំ ១៩៩១ រុស្ស៊ីតែងលក់ទៅឲ្យប្រទេសនេះ នូវឧស្ម័នខ្លួន តាមថ្លៃថោកជាងគេឆ្ងាយ។
រីឯបស្ចិមលោកវិញ ទោះបីចោទលោក Loukachenko ថាជាអ្នកកាន់អំណាចផ្តាច់ការក្តី ក៏ប៉ុន្តែ ផលប្រយោជន៍ផ្នែកភូម៌សាស្ត្រនយោបាយគឺមានន័យខ្ពស់ជាងលទ្ធិប្រជាធិបតេយ្យដែលគេតែងថ្លែងក្តែងៗ។ មិនមែនចៃដន្យទេ ដែលសហភាពអឺរ៉ុបបានសន្យា ផ្តល់ជំនួយសេដ្ឋកិច្ច ទំហំដល់ ៣.៦០០លានដុល្លារអាមេរិកឯណោះ ក្នុងករណីបើការបោះឆ្នោតនៅទីនោះបានប្រព្រឹត្តទៅ ដោយយុត្តិធម៌ត្រឹមត្រូវ។ ប៉ុន្តែ ជំនួយនេះដែលតាំងគោលដៅ ទាក់ទាញ បេឡូរុស្ស៊ីឲ្យជំនិតនឹងបស្ចិមលោក តាមមើលទៅ នឹងពុំត្រូវផ្តល់ទៅទេ ព្រោះបេឡូរុស្ស៊ី មិនគោរពឯណាតាមស្តង់ដារប្រជាធិបតេយ្យ ក្នុងការបោះឆ្នោតកន្លងទៅ។
គោលជំហរទីក្រុងម៉ូស្គូ ត្រូវបានរំលេចឲ្យឃើញ ដោយលោកប្រធានាធិបតីMedvedev ផ្ទាល់គឺថា ៖“ ការបោះឆ្នោតនៅបេឡូរុស្ស៊ី ជាកិច្ចការផ្ទៃក្នុងរបស់ប្រទេសនេះទេតើ។ ខ្ញុំសង្ឃឹមថា ជាលទ្ធផលនៃការបោះឆ្នោតនេះ បេឡូរុស្ស៊ីនឹងក្លាយទៅជា រដ្ឋទំនើបទាន់សម័យ ដែលបន្តលូតលាស់ តាមផ្លូវប្រជាធិបតេយ្យនិងចងមិត្តភាពជាមួយគ្រប់ប្រទេសជិតខាងខ្លួន។ សំរាប់រុស្ស៊ី ដោយមិនអាស្រ័យឡើយ តើនរណាជាអ្នកកាច់ចង្កូតដឹកនាំប្រទេសនេះ បេឡូរុស្ស៊ី បន្តស្ថិតនៅជារដ្ឋមួយដ៏ជំនិតបំផុតរបស់រុស្ស៊ី ភ្ជាប់ជាមួយរុស្ស៊ី ទាំងដោយប្រវត្តិសាស្ត្រ ទាំងដោយវប្បធម៌ ទាំងដោយភាសា ទាំងដោយចំណងសេដ្ឋកិច្ច ទាំងដោយចំណងរាប់ពាន់ រាប់ម៉ឺន រវាងអ្នកស្រុកប្រទេសទាំង២។ ប្រាកដណាស់ ដែលសំរាប់រុស្ស៊ី មកពីមូលហេតុខាងលើ ការអភិវឌ្ឍន៍របស់រដ្ឋបេឡូរុស្ស៊ី និងការអភិវឌ្ឈន៍នៃប្រជាធិបតេយ្យក្នុងប្រទេសនេះ គឺមានន័យសំខាន់ណាស់។ ប៉ុន្តែ គោលជំហររបស់រុស្ស៊ី គឺនៅត្រង់ ឲ្យលទ្ធផលដែលនឹងត្រូវប្រកាសជាផ្លូវការនៅថ្ងៃមុខ ពិតជាឆ្លុះឲ្យឃើញមែន“ ឆន្ទៈអធិបតេយ្យរបស់ប្រជាជនបេឡូរុស្ស៊ី “។
រីឯលោកខាងលិចវិញ ទិតៀនក្នុងទម្រង់ខ្លាំងតែម្តង។ ជាបឋម គឺសេចក្តីសន្និដ្ឋានរបស់ក្រុមអ្នកសង្កេតការណ៍របស់អង្គការដើម្បីសន្តិសុខនិង សហប្រតិបត្តិការនៅទ្វីបអឺរ៉ុប ហៅថា OSCE ដែលមានឯកទេសកម្មខាងតាមដានការបោះឆ្នោត នៅតាមគ្រប់តែ៥៦ប្រទេសជាសមាជិក បូកទាំងបេឡូរុស្ស៊ីផង។ OSCE ដែលមានទឹកមាត់ប្រៃក្នុងបញ្ហានេះ បានវាយតម្លៃថា ការរាប់សន្លឹកឆ្នោតនៅបេឡូរុស្ស៊ី គឺមានលក្ខណៈ “ អាក្រក់ និង អាក្រក់ណាស់ “។ លទ្ធផលនេះ មិនត្រឹមត្រូវតាមច្បាប់ទេ ហើយមិនអាចយកជាការបានទេ។ មិនតែប៉ុណ្ណោះ តំណាងផ្លូវការនៃក្រសួងការបរទេស បែបយ៉ាង សរអា លីទុយអានី ប៉ូឡូញ នាំគ្នាចាត់ទុកការបោះឆ្នោតនោះថា “ មិនប្រជាធិបតេយ្យទេ “។
ចំណែកប្រទេស ដែលស្វាគមអបអរទៅហើយ ចំពោះលទ្ធផលដល់ទៅ ៧៩,៧% ដណ្តើមបានដោយលោក Loukachenko លើគូប្រជែងខ្លួន៩នាក់ទៀត គឺ Iran Venezuela ចិនGeorgie រួចពិតជាGeorgieនេះឯង ដែលជាសត្រូវរបស់រុស្ស៊ី គឺនឹងត្រូវលោក Loukachenko អញ្ជើញទៅធ្វើទស្សនកិច្ចមុនគេ ក្នុងពេលខាងមុខ។
យ៉ាងណាក៏ដោយ លោក Loukachenko និយាយដៀមដាមប្រជាធិបតេយ្យ នៅបស្ចិមលោក ថាជា“ ប្រជាធិបតេយ្យគ្មានដឹងខ្យល់ “ ហើយគាត់សង្ឃឹមថា ក្នុងប្រទេសបេឡូរុស្ស៊ីរបស់គាត់នឹងលែងមានទៀតឡើយ ប្រជាធិបតេយ្យបែបនេះ។ គាត់ថែមទាំងសន្យាមួលខ្ចៅបន្តឹងការត្រួតពិនិត្យលើអត្ថបទពួកអ្នកកាសែត បូកទាំងតាមទំព័រ Internet ផង។ មិនតែប៉ុណ្ណោះ គាត់នឹងវាយលុកទៅវិញ តាមវិធីចុះផ្សាយ ដូចគេហទំព័រ Wikileaks អ៊ីចឹង នូវអត្ថបទសម្ងាត់នានា ដែលសឲ្យឃើញពីកលល្បិចពួកអ្នកនៅពីក្រោយខ្នងបក្សប្រឆាំងបេឡូរុស្ស៊ី ចង់ផ្តួលរំលំគាត់ ពីមុខតំណែងប្រធានាធិបតី។ គាត់ថា រដ្ឋនីមួយៗ ប្រជាជននីមួយៗ មានសិទ្ធិជ្រើសយកមាគ៌ាអភិវឌ្ឈន៍របស់ខ្លួនផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ