បារាំង៖ ថ្ងៃឃោសនាចុងក្រោយមកដល់ លោកម៉ាក្រុង សង្ឃឹមឈ្នះនាំមុខកាន់តែច្រើន
ចុះផ្សាយនៅថ្ងៃ៖
ស្តាប់ - ០៨:០៥
ថ្ងៃសុក្រទី៥ឧសភា នេះ គឺជាថ្ងៃចុងក្រោយ នៃការឃោសនាបោះឆ្នោត របស់បេក្ខជនប្រធានធិបតីបារាំង ទាំងពីររូប គឺលោកស្រី ម៉ារីន ឡឺប៉ែន និង លោក អេម៉ានុយអ៊ែល ម៉ាក្រុង។ ការបោះឆ្នោតប្រធានាធិបតីបារាំង អាណត្តិនេះ ត្រូវបានគេតាមដានយកចិត្តទុកដាក់បំផុត ជាពិសេសពីសំណាក់ប្រទេសសមាជិកសហភាពអឺរ៉ុប ព្រោះ លោកស្រី ម៉ារីន ឡឺប៉ែន ដែលមកពីគណបក្សស្តាំនិយមជ្រុលនេះ បានទទួលសន្ទុះគាំទ្រខ្លាំងបំផុតមិនធ្លាប់មានទេ។ សម្រាប់សហភាពអឺរ៉ុប កម្មវិធីនយោបាយរបស់លោកស្រីឡឺប៉ែន គឺជានយោបាយបំផ្លាញសហភាពអឺរ៉ុប និងបំបែកបំបាក់សាមគ្គីភាព។ មានមន្ត្រីសហភាពអឺរ៉ុប កាន់តែច្រើន ដែលបានចេញមុខមកគាំទ្របេក្ខភាពលោក អេម៉ានុយអ៊ែល ម៉ាក្រុង។
Greenpeace លួចចងបដានៅលើTour Eiffel
នៅព្រឹកថ្ងៃសុក្រទី៥ឧសភា ក្រុមសកម្មជនរបស់អង្គការ Greenpeace បានឡើងទៅលើTour Eiffel ហើយបានចងបដា សរសេរបវចនាជាតិបារាំង Liberté Egalité Fraternité។ តាមរយៈបដានេះ អង្គការ Greenpeace បានបរិហារកម្មវិធីនយោបាយរបស់លោកស្រី ឡឺប៉ែន ថាអាចជាគ្រោះថ្នាក់ខ្លាំង ដល់សង្គមបារាំង ពោលគឺ តំលៃធំៗទាំងបី របស់សង្គមបារាំង ដូចជា សិទ្ធិសេរីភាព ភាពស្មើភាពគ្នា ព្រមទាំងការស្រលាញ់រួបរួមគ្នាជាបងប្អូន ក្នុងសង្គម ដោយមិនប្រកាន់ពូជសាសន៍នោះ អាចនឹងត្រូវបានកាត់បន្ថយ បើសិនជាលោកស្រី ម៉ារីន ឡឺប៉ែន ឈ្នះឆ្នោតនៅថ្ងៃអាទិត្យនេះ។
សាលាក្រុងប៉ារីស បានចេញសេចក្តីប្រកាសមួយ ថ្កោលទោសសកម្មភាពរបស់ក្រុមសកម្មជនអង្គការ Greenpeace ថាបានធ្វើបំពានច្បាប់ បំពានលើវិធានការសន្តិសុខ ចូលទៅទីតាំងតំបន់ទេសចរណ៍ដ៏ធំបែបនេះ ដោយគ្មានការអនុញ្ញាត។ ខាងសាលាក្រុងបានចាត់វិធានការ ស្វែងរកពីប្រភពនៃចំណុចខ្សោយផ្នែកការពារសន្តិសុខ ដែលបណ្តោយឲ្យក្រុមសកម្មជនទាំងនោះ អាចបន្លំខ្លួន ឡើងទៅចងបដាបាន។
ដោយឡែក សាលាក្រុងប៉ារីស បញ្ជាក់ថា សាលាក្រុងគាំទ្រជានិច្ចរាល់សកម្មភាពរបស់អង្គការGreenpeace ក្នុងន័យការពារយុត្តិធម៌ សន្តិភាព និងបរិស្ថាន តែសាលាក្រុងមិនអាចអត់ឱនឲ្យបានទេ ចំពោះទង្វើដែល អង្គការនេះ យកទីតាំងTour Eiffel ដែលជាសម្បត្តិបិតិកភណ្ឌ មកធ្វើជាឧបករណ៍នយោបាយ។
លោកស្រីឡឺប៉ែន បញ្ឆេះពាក្យចចាមអារ៉ាម ថាលោកម៉ាក្រុង មានគណនីលាក់លុយ
បើនិយាយពីបរិយាកាសទូទៅ យើងឃើញថា មានភាពល្អក់កករខ្លាំង រវាងភាគីទាំងពីរ។ ភាពល្អក់កករ គឺកើតឡើងខ្លាំងបន្ទាប់ពីបេក្ខជនទាំងពីរ បានធ្វើការដេញដោលយោបល់គ្នា នៅក្នុងកម្មវិធីទូរទស្សន៍ កាលពីថ្ងៃពុធទី៣ឧសភា។ ក្នុងឱកាសនោះ លោកស្រី ម៉ារីន ឡឺប៉ែន បាននិយាយចោទប្រកាន់ ជាច្រើនលើកច្រើនសា មកលើរូបលោក អេម៉ានុយអ៊ែល ម៉ាក្រុង ដែលភាគច្រើនគឺជាការចោទប្រកាន់ ដោយគ្មានមូលដ្ឋាន ដោយគ្មានភស្តុតាង ហើយថែមទាំងបាននិយាយ បែបស្មានៗ បំប៉ោង ឲ្យកើតជាពាក្យចចាមអារ៉ាម។ ជាក់ស្តែង លោកស្រី ម៉ារីន ឡឺប៉ែន បាននិយាយបែបបញ្ឆិតបញ្ឆៀងថា លោក អេម៉ានុយអ៊ែល ម៉ាក្រុង ប្រហែលជាមានបើកគណនីធនាគារលួចលាក់ នៅក្រៅប្រទេស ដើម្បីលាក់លុយគេចពន្ធ។
សម្តីក្នុងន័យបំផុសឲ្យជារឿងចចាមអារ៉ាមនេះ បានហុចផលពិតមែន ដោយបន្ទាប់មកភ្លាមៗ នៅតាមបណ្តាញសង្គម មនុស្សម្នាចាប់ផ្តើមនិយាយ និងចែកចាយតៗគ្នា ពីរឿងនេះ។ អ្នកដែលចែកចាយ បំប៉ោងបន្ថែមនៅតាមបណ្តាញសង្គម គឺភាគច្រើន សុទ្ធតែជាបណ្តាញបក្សពួក របស់គណបក្សស្តាំនិយមជ្រុលនេះឯង។
នៅព្រឹកថ្ងៃសុក្រនេះ លោកអេម៉ានុយអ៊ែល ម៉ាក្រុង បានដាក់ពាក្យបណ្តឹងទៅតុលាការក្រុងប៉ារីស ស្តីពីបទផ្សព្វផ្សាយព័ត៌មានមិនពិត និងបរិហារកេរ្តិ៍។ ខាងរដ្ឋអាជ្ញាបារាំង ក៏បានរៀបចំចាត់ចែងបើកការស៊ើបអង្កេតភ្លាមៗដែរ។ បើទោះបីជាក្នុងបណ្តឹង គេមិនលើកឡើងពីឈ្មោះលោកស្រី ម៉ារីន ឡឺប៉ែន ឬគណបក្សស្តាំនិយមជ្រុល ថាជាប្រភពនៃពាក្យចចាមអារ៉ាមនេះក៏ដោយ តែវាពិតណាស់ ដែលថាបណ្តឹងរបស់លោក អេម៉ានុយអ៊ែល ម៉ាក្រុង បានសំដៅវាយប្រហារតបទៅវិញ ទៅនឹងយុទ្ធសាស្ត្រ របស់លោកស្រី ម៉ារីន ឡឺប៉ែន។ នៅថ្ងៃសុក្រនេះ បេក្ខជនទាំងពីរ បានត្រៀមផ្តល់បទសម្ភាសន៍ ជាមួយនឹងអ្នកកាសែត ជាច្រើននាក់។
ចរិកមិនសម ក្លាយជាប្រធានាធិបតី
ការជជែកដេញដោល មួយទល់មួយ រវាងបេក្ខជនឈរឈ្មោះទាំងពីរ គឺជាឱកាស ដែលអាចឲ្យប្រជាជន ជាពិសេសអ្នកបោះឆ្នោត ដែលមិនទាន់ធ្វើការសម្រេចចិត្តច្បាស់នោះ អាចពិចារណា ជ្រើសរើសបេក្ខជនណាមួយ។ តាមរយៈការជជែកដោលគ្នានេះ យើងអាចឃើញពីបុគ្គលិកលក្ខខណៈ គំនិតប្រាជ្ញា ភាពឆ្លៀសវៃ និងអំណះអំណាងរបស់បេក្ខជននីមួយ។ ហើយវាគឺជាឱកាស ដែលបេក្ខជនម្នាក់ៗ ត្រូវពន្យល់ពីកម្មវិធីនយោបាយរៀងៗខ្លួន ថាចង់ធ្វើយ៉ាងណា ហេតុអ្វីបានជាចង់ធ្វើបែបហ្នឹង ហើយធ្វើដោយវិធីណាជាដើម។
ក៏ប៉ុន្តែ មតិទូទៅជារួម សង្កេតឃើញ ថា លោកស្រី ម៉ារីន ឡឺប៉ែន គឺជាអ្នកបរាជ័យ ក្នុងការដេញដោលយោបល់កាលពីថ្ងៃពុធ ទី៣ឧសភា។ លោកស្រី ម៉ារីន ឡឺប៉ែនបរាជ័យ ព្រោះលោកស្រី មិនបានយកវេទិកានេះ មកបង្ហាញពីកម្មវិធីនយោបាយគាត់ទេ តែបានយកវេទិកានេះ ដើម្បីឆក់ឱកាសវាយប្រហារ និងចោទប្រកាន់គូប្រកួត ទាំងដែលការចោទប្រកាន់ខ្លះ គ្មានមូលដ្ឋាន មិនសមហេតុផល។ មិនត្រឹមតែប៉ុណ្ណោះ គេសង្កេតឃើញថាលោកស្រី ឡឺប៉ែន មិនមានការយល់ដឹងច្រើនទេ ក្នុងសំណុំរឿងសេដ្ឋកិច្ច ហិរញ្ញវត្ថុ។
ក្នុងក្រសែរភ្នែកប្រជាជនទូទៅភាគច្រើន លោកស្រីឡឺប៉ែន បានបញ្ចេញឥរិយាបថ កាច ច្រង៉េងច្រង៉ាងគ្មានហេតុផល ក្រអឺតក្រទម មិនផ្តល់តំលៃនិងកិត្តិយសដល់គូប្រកួត។ ពោលគឺមានចរិក មិនសមនឹងក្លាយជាមេដឹកនាំប្រទេសទាំងមូលទេ។ សូម្បីតែមនុស្សក្នុងបក្សលោកស្រី ក៏បានរិះគន់ ពីបរាជ័យនេះដែរ។
យ៉ាងណាមិញ យោងតាមស្ទាបស្ទង់មតិ នៅមួយថ្ងៃក្រោយវេទិកាដេញដោលនេះ យើងឃើញថាចេតនាបោះឆ្នោតឲ្យលោកស្រីឡឺប៉ែន របស់ប្រជាជនបារាំង បានថយចុះ មកត្រឹមតែ៣៨% ហើយចំណែកលោកម៉ាក្រុងវិញ មានការគាំទ្រប្រមាណ៦២%។ តែយ៉ាងណា បក្សទាំងពីរ កំពុងតែព្យាយាមឃោសនាអូសទាញ អ្នកបោះឆ្នោត ដែលធ្លាប់បានបោះឆ្នោតឲ្យបេក្ខជនផ្សេងទៀត កាលពីជុំទីមួយ មានដូចជាអ្នកគាំទ្រ លោក ហ្វ៊ីយ៉ុង និងអ្នកគាំទ្រលោក ម៉េឡង់ឆុង។ បើតាមការស្ទាបស្ទង់មតិ អ្នកបោះឆ្នោតទាំងនោះ អាចនឹងបោះឆ្នោតសភាគច្រើន ពោលគឺមិនបោះឲ្យនរណាទាំងអស់ រឺមិនទៅបោះតែម្តងក៏មានដែរ។
ម្នាក់ចង់បំផ្លាញអឺរ៉ុប ម្នាក់ចង់លើកស្ទួយនឹងកែទំរង់អឺរ៉ុប ឲ្យកាន់តែល្អ
ប៉ុន្មានថ្ងៃចុងក្រោយនេះ មានសមាគមន៍សិល្បៈករ គ្រូបង្រៀន រឺមន្ត្រីរដ្ឋការបារាំង នឹងឥសរជនជាច្រើននាក់ បាននាំគ្នាអំពាវនាវ ឲ្យប្រជាជនទៅបោះឆ្នោត ដើម្បីធ្វើយ៉ាងណា បង្អាក់កុំឲ្យលោកស្រីម៉ារីន ឡឺប៉ែន ដែលមកពីបក្សស្តាំនិយមជ្រុលនេះ អាចឈានទៅកាន់អំណាចបានឲ្យសោះ។ យ៉ាងណាមិញ លោក បារ៉ាក់ អូបាម៉ា ទើបបានធ្វើសារវីដេអូ ថ្លែងគាំទ្របេក្ខភាពលោក អេម៉ានុយអ៊ែល ម៉ាក្រុងដែរ។
ការបោះឆ្នោតបារាំងលើកនេះ ត្រូវបានសហភាពអឺរ៉ុប តាមដានយ៉ាងជាប់ស្អិតបំផុត ។ វាមិនមែន សំខាន់សម្រាប់តែបារាំងខ្លួនឯងទេ តែក៏សំខាន់សម្រាប់សហភាពអឺរ៉ុបដែរ។ ជាក់ស្តែងវេទិកាជជែកដេញដោលរបស់បេក្ខជនទាំងពីរនេះ ត្រូវបានផ្សាយផ្ទាល់នៅអាល្លឺម៉ង់ទៀងផង។ បារាំងនិងអាល្លឺម៉ង់ គឺជាបង្គោលធំបំផុត ដែលទ្រទ្រង់សហភាពអឺរ៉ុប។
កម្មវិធីនយោបាយរបស់បេក្ខជនទាំងពីរ មានលក្ខណៈផ្ទុយគ្នាស្រលៈមេឃនឹងដី។ ម្ខាងលោកម៉ាក្រុង ដែលមានគំនិតសេរីនិយម គាំទ្រសហភាពអឺរ៉ុប និងសកលភាវូបនីយកម្ម។ តែសម្រាប់លោកស្រី ឡឺប៉ែនវិញ មានកម្មវិធីនយោបាយ ដែលបិទទ្វារបារាំង បិទទ្វារព្រំដែន ចាកចេញពីតំបន់ចាយប្រាក់អឺរ៉ូ ហើយអាចនឹងនាំបារាំង ឲ្យចេញពីសហភាពអឺរ៉ុបផង ក៏ថាបាន។
សម្រាប់លោក Michel Barnier អតីតរដ្ឋមន្ត្រីនិងជាអ្នកតំណាងឲ្យសហភាពអឺរ៉ុបក្នុងការចរចាលែងលះជាមួយអង់គ្លេសនោះ បានមានប្រសាសន៍ បារាំងអាចខ្លាំងបាន អាចមានទំងន់លើឆាកអន្តរជាតិបាន លុះណាតែបារាំងនៅជាមួយសហភាពអឺរ៉ុប។ ការដើរចេញពីសហភាពអឺរ៉ុប ការឈប់ចាយប្រាក់អឺរ៉ូ នឹងធ្វើឲ្យបារាំង ទន់ជង្គង់ នៅតែម្នាក់ឯង គ្មានបង្អែក ខណៈដែលប្រទេសដ៏ទៃគេរួបរួមសាមគ្គីគ្នា។ អ្នកជំនាញសេដ្ឋកិច្ច និងហិរញ្ញវត្ថុជាច្រើន សុទ្ធតែបានអះអាងថា កម្មវិធីនយោបាយរបស់លោកស្រី ឡឺប៉ែន គឺជាកម្មវិធីនយោបាយ បំផ្លាញ ផ្តួលរំលំអឺរ៉ុប បំបែកបំបាក់សាមគ្គី បំផុសគំនិតជាតិនិយមជ្រុលដែលបន្តិចម្តងៗ វានឹងក្លាយជាការប្រឈមមុខដាក់គ្នា។
ដូច្នេះហើយ បានជាអ្នកជំនាញ និងមន្ត្រីធំៗនៅសហភាពអឺរ៉ុបទាំងអស់ បានអំពាវនាវគាំទ្រលើបេក្ខភាពរបស់ អេម៉ានុយអ៊ែល ម៉ាក្រុង។ លោកម៉ាក្រុង បានស្នើឲ្យអឺរ៉ុបធ្វើកំណែទំរង់ជាច្រើន ដើម្បីផ្តល់សន្ទុះសេដ្ឋកិច្ច ដូចជាការបង្កើតឲ្យមានសភាសម្រាប់ប្រទេសចាយប្រាក់អឺរ៉ូ បង្កើតឲ្យមានតំណែងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរបស់ប្រទេសចាយប្រាក់អឺរ៉ូ ជាដើម។ ទាំងអស់នេះ សុទ្ធតែជាចំណុចវិជ្ជមាន ដែលសហភាពអឺរ៉ុបសង្ឃឹមថា រដ្ឋាភិបាលលោកម៉ាក្រុង ប្រាកដជាចាប់ដៃគ្នា ជាមួយអាល្លឺម៉ង ជួយជ្រោមជ្រែងសហភាពអឺរ៉ុប ឲ្យដំណើរការល្អឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ