តើការចំណាយរបស់គណបក្សក្នុងពេលបោះឆ្នោតមានឥទ្ធិពលលើកំណើនសេដ្ឋកិច្ចដែរឬទេ?
ចុះផ្សាយនៅថ្ងៃ៖
ស្តាប់ - ០៣:៤២
រដូវបោះឆ្នោតបានមកដល់។ ដូចរៀងរាល់អណត្តិ នៅក្នុងអំឡុងពេលនៃការឃោសនា អ្នកនយោបាយតែងតែបញ្ចេញថវិកាយ៉ាងគំហុក ដើម្បីទាក់ទាញអ្នកបោះឆ្នោត។ មន្ត្រីគ្រប់គណបក្សនយោបាយត្រូវបញ្ចេញថវិកាទៅតាមលទ្ធភាពរបស់ពួកគេរៀងៗខ្លួន។ តើការបញ្ចេញថវិកានៅពេលនេះ នឹងចូលរួមចំណែកជំរុញកំណើនសេដ្ឋកិច្ចដែរឬទេ? ប្រសិនបើវាបានរួមចំណែកមែននោះ តើការចូលរួមចំណែកនោះមានទំហំប៉ុណ្ណា?
មិនដែលមានការសិក្សា ឬការផ្សព្វផ្សាយជាផ្លូវការ អំពីទំហំទឹកប្រាក់ដែលត្រូវបានចំណាយដោយគណបក្សនយោបាយក្នុងរដូវ កាលបោះឆ្នោត ពិសេសក្នុងអំឡុងពេលឃោសនាបោះឆ្នោតនោះឡើយ។ ប៉ុន្តែ តាមរូបភាពជាក់ស្តែង គ្រប់គ្នាអាចមើលឃើញថា ការចំណាយទាំងនោះ មិនមែនតិចតួចឡើយ។
មន្ត្រីគណបក្សនយោបាយចូលរួមបោះឆ្នោតទាំង៨គណបក្ស តិច ឬច្រើនសុទ្ធតែបានត្រៀមថវិកាចំណាយទៅតាមលទ្ធភាពរបស់ពួកគេ។ ចំណាយលើការទិញវត្ថុអនុស្សារវីយ មានមួក អាវយឺត សារ៉ុង ថ្នាំពេទ្យ និងវត្ថុប្រើប្រាស់ផ្សេងៗ។ ការទិញ និងផ្តល់អំណោយទាំងនេះ ត្រូវបានធ្វើឡើងនៅទូទាំងប្រទេស ឬក៏នៅគ្រប់ឃុំ សង្កាត់ ទាំង ១៦៣៣ ឃុំសង្កាត់ ដែលជាទូទៅ មន្ត្រីគណបក្សនយោបាយ ចែកជាក្រុមការងារ ដើម្បីទាក់ទាញម្ចាស់ឆ្នោត។
ក្រៅពីការទិញដូរទំនិញទាំងនេះហើយ មន្ត្រីគណបក្សនយោបាយក៏នៅចំណាយសម្រាប់ធ្វើដំណើររបស់ខ្លួនឯងផងដែរ។ ការចំណាយទាំងនេះ មានដូចជា ប្រេងសាំង ការស្នាក់នៅ និងការបរិភោគជាដើម។ មើលទៅ ការចំណាយទាំងនេះហាក់ដូចជាកំប៉ិកកំប៉ុកទេ ប៉ុន្តែសូមកុំភ្លេចថា មន្ត្រីគណបក្សនយោបាយទាំង៨ ពិសេសគណបក្សកាន់អំណាច ដែលមានលទ្ធភាព លើសគេ កំពុងធ្វើសកម្មភាពទាំងនេះ បញ្ចេញការចំណាយទាំងនេះ នៅទូទាំងប្រទេស។ ដូច្នេះគេ អាចមើលឃើញទំហំទឹកប្រាក់ច្រើនក្រាស់ក្រែលមួយដែលកំពុងមានចលនានៅក្នុងសេដ្ឋកិច្ចកម្ពុជា។
ផ្ទុយទៅវិញ ការចំណាយទាំងនេះ មិនមានផលជំរុញកំណើនសេដ្ឋកិច្ចខ្លាំងនោះឡើយ។ ពីព្រោះថា ការចំណាយទាំងនេះ វាមិនមែនជាប្រភេទចំណាយបែបវិនិយោគ ដែលហុចផលយូរអង្វែង និងបានចូលរួមកាត់បន្ថយភាពក្រីក្រពិតប្រាកដឡើយ។
ជាការពិត អ្នកសេដ្ឋកិច្ចទទួលស្គាល់ថា ក្នុងឱកាសរដូវកាលបោះឆ្នោតនេះ ការចំណាយរបស់អ្នកនយោបាយបានផ្តល់ប្រយោជន៍ខ្លះដល់ប្រជាពលរដ្ឋមែន ពោលគឺប្រជាពលរដ្ឋបានទទួលវត្ថុអនុស្សាវរីយ៍បន្តិចបន្តួច ហើយអាជីវករមួយចំនួនដូចជា អ្នកលក់ដូរ អាវយឺត មួក អ្នកបោះពុម្ព ម្ចាស់រថយន្តដឹកជញ្ជូនជាដើម ក៏ទទួលបានផលចំណេញខ្លះក្នុងរយៈពេលខ្លីនេះដែរ។
សរុបមកវិញ ប្រសិនបើ គេគិតគូរតែអំពីការចំណាយដើម្បីទិញវត្ថុអនុស្សាវរីយ៍ចែកជូនអ្នកបោះឆ្នោតនោះ ការចំណាយនេះ មិនបានជំរុញកំណើនសេដ្ឋកិច្ចខ្លាំងនោះឡើយ។ អ្នកសេដ្ឋកិច្ចមួយចំនួនអត្ថាធិប្បាយ ការចំណាយប្រភេទនេះ មានទំហំតិចជាង ក្នុងពេលពិធីបុណ្យភ្ជុំបិណ្ឌ និងបុណ្យចូលឆ្នាំដែលមនុស្សទូទាំងប្រទេសត្រូវចំណាយថវិកាយ៉ាងគំហុកផង។
ផ្ទុយទៅវិញ គឺនៅមានការចំណាយមួយប្រភេទទៀត ដែលនឹងចូលរួមចំណែកក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្ររបស់ពលរដ្ឋនោះ។ នោះគឺការកសាងហេដ្ឋារចនាសម័្ពន្ធផ្លូវថ្នល់ ប្រព័ន្ធប្រឡាយទឹកជាដើម។ អ្នកសេដ្ឋកិច្ចបានសង្កេតឃើញថា មន្ត្រីគណបក្សកាន់អំណាច បើទោះជាគេ ពិបាកនឹងបែងចែករវាងតួនាទីជាមន្ត្រីគណបក្ស និងមន្ត្រីក្នុងរដ្ឋាភិបាលក៏ដោយ ពួកគេមួយចំនួនបានដឹកនាំកសាងផ្លូវថ្នល់ក្នុងភូមិ ជួសជុល និងកសាងប្រព័ន្ធស្រោចស្រពជាដើម។ សមិទ្ធិផលទាំងនេះហើយ ដែលផ្តល់ប្រយោជន៍ពិតប្រាកដដល់ពលរដ្ឋ។ នៅពេលមានផ្លូវថ្មី ការចំណាយរបស់ពលរដ្ឋ ក្នុងការដឹកជញ្ជូនទំនិញត្រូវបានកាត់បន្ថយ ហើយនិងចំណេញពេលវេលាទៀត។ ប្រព័ន្ធប្រឡាយទឹកក៏នឹងផ្តល់ផលប្រយោជន៍ដល់ការដាំដុះរបស់ពួកគេទៀត។ ហើយថាផលប្រយោជន៍ទាំងនេះ ជាផលប្រយោជន៍យូរអង្វែងសម្រាប់ពលរដ្ឋ។
ដូច្នេះ មិនមែនថា ការផ្តល់វត្ថុអនុស្សាវរីយ៍ ដូចជារបស់របរប្រើប្រាស់មួយចំនួននោះ មិនមានសារៈសំខាន់ឡើយ ប៉ុន្តែដើម្បីប្រយោជន៍សេដ្ឋកិច្ចរួម និងយូរអង្វែង មន្ត្រីគណបក្សនយោបាយដែលកំពុងឃោសនារកសំឡេងឆ្នោត គួរផ្ទេទំហំទឹកប្រាក់ដែលគ្រោងចំណាយទៅលើការទិញវត្ថុអនុស្សារីយ៍ ទៅលើការកសាងហេដ្ឋារចនាសម័្ពន្ធណាដែលចូលរួមក្នុងការកាត់បន្ថយភាពក្រីក្រពិតប្រាកដរបស់ពលរដ្ឋ ហើយដែលនេះ ក៏ជាការចូលរួមក្នុងការជំរុញកំណើនសេដ្ឋកិច្ចទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ