ប្រជាជនអេកូសភាគច្រើនបានសម្រេចមិនផ្តាច់ខ្លួនចេញពីប្រទេសអង់គ្លេសទេ
ចុះផ្សាយនៅថ្ងៃ៖
មានប្រជាជនអេកូសភាគច្រើនបានសម្រេចចិត្តមិនផ្តាច់ខ្លួនចេញពីប្រទេសអង់គ្លេសទេ។ យោងតាមលទ្ធផលផ្លូវការចេញផ្សាយក្នុងថ្ងៃសុក្រ ទី១៩ កញ្ញានេះឲ្យដឹងថា អត្រានៃអ្នកមិនចង់បានឯករាជ្យមានជាង ៥៥% ទល់នឹងអ្នកដែលចង់បានឯករាជ្យដែលមានជាង ៤៤%។ ការកត់សម្គាល់មួយទៀត អត្រានៃអ្នកចូលរួមបោះឆ្នោតនៅថ្ងៃព្រហស្បតិ៍ម្សិលមិញមានរហូតដល់ទៅជាង ៨០%។ ប្រតិកម្មភ្លាមៗ លោកនាយករដ្ឋមន្រ្តីអេកូសអាឡិច សាលម៉ុងដែលជាសកម្មជនទាមទារឯករាជ្យម្នាក់បានប្រកាសទទួលស្គាល់ភាពបរាជ័យ រីឯលោកនាយករដ្ឋមន្រ្តីអង់គ្លេសដេវីដ កាមេរ៉ូនបានសន្យាធ្វើកំណែទម្រង់ និងផ្តល់ស្វ័យភាពទូលំទូលាយបន្ថែមទៀតឲ្យតំបន់អេកូស។
នៅទីបំផុត លទ្ធផលផ្លូវការនៃការបោះឆ្នោតប្រជាមតិនៅអេកូសបានប្រាប់ឲ្យដឹងថា មានប្រជាជនអេកូសចំនួន ៥៥,៣% បានបោះឆ្នោតប្រឆំាងនឹងឯករាជ្យ ទល់នឹងអ្នកដែលចង់បានឯករាជ្យចំនួន ៤៤,៧%។ ប្រតិកម្មមុនគេ គឺលោកនាយករដ្ឋមន្រ្តីអេកូសអាឡិច សាលម៉ុងដែលបានប្រកាសទទួលស្គាល់ភាពបរាជ័យរបស់ខ្លួន និងអរគុណចំពោះប្រជាជនអេកូសដែលបានបោះឆ្នោតគំាទ្រឯករាជ្យ។ លោកអាឡិច សាលម៉ុងបានថ្លែងយ៉ាងដូច្នេះថា « ខ្ញុំអរគុណចំពោះប្រជាជនអេកូសទំាង ១លាន ៦សែននាក់ដែលបានបោះឆ្នោតគំាទ្រឯករាជ្យ។ ឥឡូវនេះយើងបានដឹងលទ្ធផលផ្លូវការនៃការបោះឆ្នោតប្រជាមតិដើម្បីឲ្យប្រជាជនអេកូសជ្រើសរើសរវាងឯករាជ្យ និងមិនឯករាជ្យ។ លទ្ធផលបានបញ្ជាក់យ៉ាងច្បាស់ថា មានប្រជាជនអេកូសភាគច្រើនបានសម្រេចមិនឲ្យដែនដីអេកូសក្លាយជាប្រទេសឯករាជ្យទេ។ ខ្ញុំទទួលស្គាល់ចំពោះលទ្ធផលប្រជាមតិនេះ និងសូមអំពាវនាវដល់ប្រជាជនអេកូសទំាងអស់ឲ្យទទួលយកលទ្ធផលដែលចេញពីសម្លេងភាគច្រើនរបស់ប្រជាជនអេកូស »។
ទន្ទឹមនឹងការថ្លែងអំពាវនាវឲ្យប្រជាជនអេកូសគោរពតាមមតិភាគច្រើន លោកអាឡិច សាលម៉ុងក៏បានឆ្លៀតអំពាវនាវរដ្ឋាភិបាលអង់គ្លេសឲ្យគោរពតាមពាក្យសន្យារបស់ខ្លួនដែលយល់ព្រមផ្តល់អំណាចបន្ថែមទៀតដល់តំបន់ស្វ័យតអេកូស។
លោកនាយករដ្ឋមន្រ្តីអង់គ្លេសដាវីដ កាមេរ៉ូនសប្បាយចិត្តចំពោះលទ្ធផលបោះឆ្នោត
បន្ទាប់ពីទទួលបានលទ្ធផលផ្លូវការភ្លាម លោកកាមេរ៉ូនក៏បានបញ្ចេញប្រតិកម្មដោយសម្តែងក្តីរំភើបរីករាយដែលបានឃើញប្រជាជនអេកូសភាគច្រើនសម្រេចចិត្តមិនចង់ផ្តាច់ខ្លួនចេញពីអង់គ្លេស។ លោកកាមេរ៉ូនបានថ្លែងថា លោកសប្បាយចិត្តខ្លំាងដែលបានទុកឲ្យប្រជាជនអេកូសសម្រេចជោគវាសនាដោយខ្លួនឯងតាមគន្លងប្រជាធិបតេយ្យ។ យោងតាមលោកប្រមុខរដ្ឋាភិបាលអង់គ្លេសដដែល អ្វីៗលែងស្រពិចស្រពិលទៀតហើយនៅអេកូស និងដែលវាល្មមដល់ពេលដែលអង់គ្លេសទំាងមូលត្រូវរួបរួមគ្នាដើម្បីអនាគតរុងរឿង។ គួរជម្រាបជូនថា គឺលោកកាមេរ៉ូនរូបនេះឯងដែលបានលេងល្បែងដ៏ប្រថុយប្រថានមួយនៅក្នុងសំណុំរឿងអេកូស ដោយលោកបានសម្រេចឲ្យអេកូសរៀបចំបោះឆ្នោតប្រជាមតិស្តីពីជម្រើសរវាងឯករាជ្យ និងមិនឯករាជ្យ។
សំណាងល្អដែលប្រជាជនអេកូសភាគច្រើនមិនចង់បានឯករាជ្យ បើពុំនោះសោតទេ លោកកាមេរ៉ូនខ្លួនឯងត្រូវបង្ខំចិត្តចុះចេញពីតំណែងនាយករដ្ឋមន្រ្តី និងដែលគេហ៊ានទំាងនិយាយថា ជីវិតនយោបាយរបស់លោកត្រូវចបផង បើអង់គ្លេសបាត់បង់ដែនដីអេកូសនោះ។ តែគេមិនត្រូវភ្លេចនិយាយទេថា ដើម្បីអាចទាញអេកូសកុំឲ្យចេញពីអង់គ្លេសបាន លោកកាមេរ៉ូនបានសន្យាធ្វើសម្បទានច្រើនណាស់ឲ្យប្រជាជនអេកូស។ ជាក់ស្តែងនៅប៉ុន្មានថ្ងៃមុនថ្ងៃរៀបចំបោះឆ្នោត លោកកាមេរ៉ូនបានសន្យាផ្តល់ឲ្យរដ្ឋអំណាចអេកូសនូវបុព្វសិទ្ធិផ្នែកពន្ធដារដែលទីក្រុងឡុងដ៍បានបដិសេធមកដល់សព្វថ្ងៃ។ លោកកាមេរ៉ូនបានសន្យាបង្កើនប្រាក់ចំណាយឲ្យប្រជាជនអេកូសលើសប្រជាជនអង់គ្លេសចំនួន ១៩%។ សម្បទានបន្ទាប់មកទៀត ទីក្រុងឡុងដ៍សន្យាដល់ប្រាក់ឧបត្ថម្ភផ្នែកសុខាភិបាល និងអប់រំដល់ប្រជាជនអេកូស។ ទំាងនេះមិនភ្លេចទេ ការផ្តល់ស្វ័យភាពទូលំទូលាយបន្ថែមទៀតឲ្យរដ្ឋអំណាចអេកូស។
អង់គ្លេសបានទាញមេរៀនពីអេកូសដើម្បីតំបន់ផ្សេងទៀត
គួរជម្រាបជូនថា ចក្រភពអង់គ្លេសដែលគេហៅជាភាសាអង់គ្លេសថា
United Kingdom ត្រូវបានចែកចេញជា ៤រដ្ឋ គឺអង់គ្លេស អេកូស ឬ Scotland Walesនិង អៀឡង់ខាងជើង។ រហូតមកដល់ពេលនេះ អេកូស Walesនិង អៀឡង់ខាងជើង គឺរដ្ឋដែលទទួលបានស្វ័យភាពពីទីក្រុងឡុងដ៍ដូចគ្នា ដោយមានសភាដាច់ដោយឡែករបស់ខ្លួន និងទទួលបានបុព្វសិទ្ធិគ្រប់គ្រងខ្លួនឯងលើវិស័យមួយចំនួន។ ដូច្នេះ ការរំជើបរំជួលនៅក្នុងតំបន់អេកូសចង់បានឯករាជ្យអាចជាជំងឺឆ្លងរាតត្បាតចូលទៅក្នុងរដ្ឋ Wales ឬអៀឡង់ខាងជើង។ នេះហើយជាផលវិបាកដែលរដ្ឋាភិបាលទីក្រុងឡុងដ៍ត្រូវប្រយ័ត្នប្រយែងជាទីបំផុត។
អ្វីដែលបានកើតមាននៅអេកូសពេលនេះអាចជាមេរៀនមួយ ឬថាជាការដាស់ស្មារតីឲ្យរដ្ឋអំណាចអង់គ្លេសផ្តើមគិតគូរឡើងវិញអំពីគោលនយោបាយរបស់ខ្លួនចំពោះតំបន់ទំាងនោះ ដោយធ្វើណាចៀសវាងព្រឹត្តិការណ៍ដូចនៅអេកូស។ អ៊ីចឹងហើយជាលោកនាយករដ្ឋមន្រ្តីដេវីដ កាមេរ៉ូនបានថ្លែងថា ចាប់ពីពេលនេះតទៅ ប្រជាជនអង់គ្លេស ប្រជាជន Wales និងប្រជាជនអៀឡង់ខាងជើងមានសិទ្ធិក្នុងការបញ្ចេញយោបល់របស់ខ្លួន និងថា លោកបានយល់ បានស្តាប់ឮ និងបានដឹងពីតម្រូវការរបស់តំបន់នីមួយៗ។ ដូច្នេះចាប់ពីពេលនេះតទៅ និងអ្វីដែលលោកកាមេរ៉ូនបានសន្យាចំពោះប្រជាជនអេកូសពេលនេះ អាចជាគំរូមួយដើម្បីរក្សាតំបន់ផ្សេងទៀតឲ្យស្ថិតក្នុងគ្រួសារអង់គ្លេសតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ