តុលាការកំពូលនិងសភាអាមេរិក ទំនងពួតដៃគ្នាផ្តុំបទចោទប្រកាន់លោក ដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៧:៥២
ជុំវិញនីតិវិធីដំណើរការទម្លាក់ប្រធានាធិបតី, រដ្ឋសភាអាមេរិក បានសម្រេច បទចោទប្រកាន់ចំនួនពីរ ទៅលើលោកប្រធានាធិបតី ដូណាល់ ត្រាំ នៅថ្ងៃព្រហស្បតិ៍ ទី១២ធ្នូ។ បទចោទធំៗទាំងពីរនោះគឺបទរំលោភអំណាច និងបទរារាំងដំណើរការស៊ើបអង្កេតរបស់សភា។ ការតាំងបទចោទប្រកាន់នេះ គឺធ្វើឡើងបន្ទាប់ពីសមាជិកសភាជជែកពិភាក្សាយ៉ាងតឹងសរសៃក អស់រយៈពេល១៤ម៉ោងរួចមក រហូតដល់យប់ជ្រៅ នៅក្នុងរដ្ឋសភាអាមេរិក ដែលមានសំឡេងភាគច្រើនមកពីបក្សប្រជាធិបតេយ្យ ជាបក្សប្រឆាំង ។ ទន្ទឹមគ្នានេះដែរ ថ្ងៃសុក្រ ទី១៣ធ្នូ តុលាការកំពូលរបស់រដ្ឋសហព័ន្ធអាមេរិក ដែលជាស្ថាប័នជម្រះក្តីកំពូលរបស់ប្រទេសនេះ បានសម្រេចថានឹងបើកសវនាការ ចំពោះសំណុំរឿងបង់ពន្ធដាររបស់លោក ដូណាល់ ត្រាំ ដែលកន្លងមក មហាសេដ្ឋីរូបនេះ មិនបានប្រកាសពន្ធជាសាធារណៈ ហើយលោកគឺប្រធានាធិបតីទី១ ក្នុងប្រវត្តិសាស្ត្រអាមេរិក ដែលមិនព្រមប្រកាសឯកសារបង់ពន្ធរបស់ខ្លួន នៅមុនពេលចូលកាន់តំណែងប្រធានាធិបតី។
«បទរំលោភអំណាច» និង «បទរារាំងដំណើរការស៊ើបអង្កេតរបស់សភា» តើមានផលអ្វីខ្លះ?
តាមពិតទៅ កម្រងបទចោទប្រកាន់ដែលក្រុមអ្នកជំនាញ អ្នកច្បាប់របស់សភា ពិសេសអ្នកសរសេរចងក្រងបទចោទប្រកាន់ មកពីបក្សប្រជាធិបតេយ្យនោះ គឺបទចោទមានច្រើនចំណុចណាស់។ ដូចជា បទឧក្រិដ្ឋរំលោភអំណាចផង, បទប្រព្រឹត្តអំពើពុករលួយផង, បទរារាំងធ្វើក្នុងដំណើរការស៊ើបអង្កេតរបស់រដ្ឋសភា ដែលបំពានរដ្ឋធម្មនុញ្ញអាមេរិក ព្រមទាំងបទបង្កជាឧបសគ្គក្នុងការស៊ើបអង្កេតរបស់អង្គតុលាការ ថែមទៀត។ សម្រេចសម្រួចទៅ ក្រោយពីតស៊ូមតិគ្នាអស់ពេល១៤ម៉ោងរហូតដល់យប់ជ្រៅ រដ្ឋសភាអាមេរិក បានសម្រេចលើកតាំងបទចោទជាផ្លូវការ ចំនួនពីរធំៗ គឺ បទឧក្រិដ្ឋរំលោភអំណាច និងបទប្រឆាំងរារាំងបង្កឱ្យស្ទះដំណើរការស៊ើបអង្កេតរបស់សភា។
បើយោងទៅតាមបទចោទប្រកាន់, ចំពោះបទរំលោភអំណាច គឺបញ្ជាក់ថា ប្រធានាធិបតី ដូណាល់ ត្រាំ បានបំពានអំណាចជាប្រមុខរដ្ឋ និងធ្វើមិនដឹងមិនឮពីទង្វើរបស់ខ្លួន ដែលអាចបង្កគ្រោះថ្នាក់ដល់សន្តិសុខប្រទេសជាតិ នោះគឺសំណុំរឿងជជែកទូរសព្ទជាមួយប្រមុខរដ្ឋអ៊ុនក្រែន, សំណុំរឿងបង្កជំនួយយោធាឱ្យអ៊ុយក្រែន ជាថ្នូរនឹងការស៊ើបអង្កេតលើគ្រួសារ ចូបាយដិន ដែលជាដៃគូប្រឆាំងក្នុងការបោះឆ្នោត។ ទង្វើនេះ ប្រឆាំងនឹងផលប្រយោជន៍របស់ជាតិ ហើយដើម្បីតែចំណេញប្រយោជន៍នយោបាយផ្ទាល់ខ្លួន។
បទចោទមួយទៀត គឺពីការប្រឆាំងរារាំងបង្កឱ្យស្ទះដំណើរការស៊ើបអង្កេតរបស់សភា គឺប្រធានាធិបតី ដូណាល់ ត្រាំ បានបដិសេធមិនសហការជាមួយសភាក្នុងការស៊ើបអង្កេត, មិនផ្តល់ឯកសារ និងហាមប្រាមក្រុមការងារនៅក្រោមបង្គាប់ មិនឱ្យទៅចូលរួមបំភ្លឺនៅចំពោះមុខសមាជិកសភា ជាដើម។ ទង្វើបែបនេះ គឺគំរាមកំហែងដល់រដ្ឋធម្មនុញ្ញ អាមេរិក ដេលចែងពីសមត្ថកិច្ច និងសិទ្ធិអំណាចរបស់អង្គសភា។
ចំពោះបទចោទសំខាន់ៗទាំងនេះ អង្គសភាអាមេរិក ដែលមានសំឡេងភាគច្រើនមកពីគណបក្សប្រជាធិបតេយ្យ ជាបក្សប្រឆាំង គឺមិនបង្អង់យូរឡើង ហើយសម្រេចថានឹងបើកសម័យប្រជុំពេញអង្គ នៅថ្ងៃពុធ ទី១៨ធ្នូ ខាងមុខ ដើម្បីសម្រេចបោះឆ្នោតទម្លាក់ប្រធានាធិបតីតែម្តង។
រដ្ឋសភានិងតុលាការកំពូលអាមេរិក ហាក់ដូចជាកំពុងតែចង់ព្រួតគ្នាសង្គ្រប់ជាន់កលោកប្រធានាធិបតី ដូណាល់ ត្រាំ
ចំពោះរឿងប្រកាសពន្ធដាររបស់លោក ដូណាល់ ត្រាំ គឺស្មុកស្មាញបន្តិចដែរ។ តែបើនិយាយឱ្យស្រួលស្តាប់គឺ ថ្ងៃ១៣ធ្នូ តុលាការកំពូលរបស់រដ្ឋសហព័ន្ធអាមេរិក បានប្រកាសថានឹងបើកសវនាការស្តាប់អំណះអំណាង ការទាញហេតុផល ពីគ្រប់ភាគីតំណាង នៅខែមីនា ២០២០ ហើយចំណែក ការជម្រះក្តី លើអង្គច្បាប់ និងការចេញដីកាសម្រេចស្ថាពរ នឹងប្រកាស យ៉ាងយូរបំផុត នៅខែមិថុនា ខាងមុខដែរ។ ពោលគឺតែ៥ខែប៉ុណ្ណោះ មុនការបោះឆ្នោតប្រធានាធិបតីថ្មី។
ចំពោះរឿងប្រកាសពន្ធនេះ បើគិតត្រឹមកន្លះសតវត្សរ៍ចុងក្រោយនេះ លោក ដូណាល់ ត្រាំ គឺជាប្រធានាធិបតីទី១ ក្នុងប្រវត្តិសាស្ត្រអាមេរិក ដែលមិនបានប្រកាសរបាយការណ៍ពន្ធដាររបស់ខ្លួន នៅមុនពេលឡើងកាន់អំណាច។
រឿងពន្ធដានេះដែរ គឺវាមានពាក់ព័ន្ធនឹងរឿងអាស្រូវស្រីញី ថែមទៀត ដែលមាននារីតារាកុនកូនជ្រូក ម្នាក់ ទម្លាយរឿងលើគ្រែជាមួយលោក ប្រធានាធិបតី ហើយដើម្បីបិទមាត់នារីរូបនេះ លោកត្រាំ ចាត់ចែងផ្ទេរប្រាក់ឱ្យនាង។ ការផ្ទេរលុយនេះ គឺធ្វើឡើងនៅក្នុងរដូវកាលបោះឆ្នោតប្រធានាធិបតីអាមេរិកនោះតែម្តង។ ដូច្នេះហើយ ទើបរដ្ឋអាជ្ញាអាមេរិក តាមរករឿង ជជីកកកាយករណីពន្ធដា និងរបាយការណ៍ហិរញ្ញវត្ថុរបស់ក្រុមហ៊ុន លោក ត្រាំ ជាបន្ថែមមួយជាន់ទៀត។ នេះបើតាមកាសែតរបស់កាសែតក្នុងស្រុកអាមេរិក។
ទោះយ៉ាងណាក្តី សំណុំរឿងផ្លូវតុលាការទាក់ទងនឹងផ្នែកពន្ធដានេះ គឺត្រូវប្រឈមនឹង«អភិភ័យឯកសិទ្ធិ»របស់ប្រធានាធិបតី ដែលចែងពីការមិនអាចប៉ះពាល់បាន ឬមិនអាចត្រូវកាត់ទោសតាមផ្លូវតុលាការបែបនេះបាន ក្នុងពេលដែលលោកកំពុងកាន់អំណាចនោះឡើយ។ រឿងនេះ ជាការជជែកគ្នា មិនដាច់ស្រេច ឬមានយោបល់ខ្វែងគ្នា រវាងអ្នកច្បាប់ទាំងពីរខាង។ នៅម្ខាង រដ្ឋអាជ្ញាក្រុងញូវយ៉ក បញ្ចេញយោបល់ថា គេមិនមែនចោទប្រកាន់លោក ដូណាល់ ត្រាំ ក្នុងនាមលោកជាប្រធានាធិបតីសហរដ្ឋអាមេរិកនោះទេ ប៉ុន្តែគេចោទគាត់ ក្នុងមានជាមហាសេដ្ឋីម្នាក់ ដែលរកស៊ី នៅក្នុងក្រុងញូវយ៉ក ទេតើ។
ការទម្លាក់តំណែងរបស់ប្រធានាធិបតី គឺព្រឹទ្ធសភាជាអ្នកសម្រេច ហើយលោក ដូណាល់ ត្រាំ នៅមាន«អភ័យឯកសិទ្ធិ»ជាប្រធានាធិបតី។ ក្នុងដំណាក់កាលនេះ គឺគេមិនអាចធ្វើអ្វីលោកបានឡើយ។
នៅរដ្ឋសភា បក្សប្រជាធិបតេយ្យ មានសំឡេងច្រើនជើង ដូច្នេះចង់មិនចង់ នីតិវិធីនិងការបោះឆ្នោតទម្លាក់ប្រធាធិបតី នៅក្នុងសម័យប្រជុំពេញអង្គ ថ្ងៃទី១៨ធ្នូ ទំនងជាត្រូវសម្រេចហើយ។ ប៉ុន្តែនៅព្រឹទ្ធសភាវិញ បក្សសាធារណរដ្ឋរបស់លោក ដូណាល់ ត្រាំ មានសំឡេង ច្រើនជាង ពោលគឺក្នុងចំណោមសមាជិកព្រឹទ្ធសភា១០០សំឡេង បក្សសាធារណរដ្ឋ មាន៥៣សំឡេង គឺច្រើនលើសពី៥០+១ទៅហើយ។ ហើយក្រុមព្រឹទ្ធសមាជិក មកពីបក្សសាធារណរដ្ឋ គឺនឹងគាំទ្ររូបលោក ដូណាល់ ត្រាំ។ ដំណើរនីតិវិធីត្រូវចប់ត្រឹមព្រឹទ្ធសភា។
បើនិយាយពីសេចក្តីសម្រេចរបស់តុលាការការកំពូលវិញ គឺទំនងជាមិនអាចជះឥទ្ធិពលដល់លោក ដូណាល់ ត្រាំ នៅពេលដែលលោកកំពុងអង្គុយកៅអីប្រធានាធិបតីនោះទេ ព្រោះលោកមានអាវក្រោះ គឺ«អភ័យឯកសិទ្ធិ»ជាប្រធានាធិបតី។ ដូច្នេះ ហើយលោក ដូណាល់ ត្រាំ ថាលោកមិនសូវឈឺក្បាលទេ រឿងអស់នេះ គឺលោកប្រឹងតែដើរឃោសនារកសំឡេងឆ្នោតនៅតាមបណ្តារដ្ឋនានា។ ចាប់ពីចុងខែកញ្ញាមក គណបក្សសាធារណរដ្ឋរបស់លោក ត្រាំ បានសប្បាយនឹងចាយលុយ ជាង៥លាន៤សែនដុល្លារ គ្រាន់តែសម្រាប់ឃោសនាពាណិជកម្មនយោបាយ តាមហ្វេសបុក។
ក៏ប៉ុន្តែ ពងមាន់មិនអាចជល់នឹងថ្ម ធ្វើឱ្យបែកថ្មីទេ តែវាអាចធ្វើប្រឡាក់ថ្មបានដែរតើភារី។ បើតាមអ្នកវិភាគមួយចំនួន គេយល់ថា ក្នុងពេលនេះ គឺ មិនអាចប៉ះពាល់រោមជើងលោក ដូណាល់ ត្រាំ បានមែន តែក្រុមបក្សប្រជាធិបតេយ្យ ចង់ធ្វើយ៉ាងណា រារាំងកុំឱ្យមហសេដ្ឋីរូបនេះ ឡើងក្តាប់អំណាចរដ្ឋជាថ្មី នៅអាណត្តិពីរ ជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ