គណបក្សប្រជាធិបតេយ្យបាត់បង់សំឡេងភាគច្រើននៅរដ្ឋសភា
ចុះផ្សាយនៅថ្ងៃ៖
ស្តាប់ - ០៦:១៩
នៅក្នុងការបោះឆ្នោតសភា កាលពីថ្ងៃអង្គារ ២ វិច្ឆិកា ២០១០នេះ គណបក្សសាធារណរដ្ឋដណ្តើមបានសំឡេងភាគច្រើននៅក្នុងរដ្ឋសភា ក៏ប៉ុន្តែ គណបក្សប្រជាធិបតេយ្យនៅរក្សាបានសំឡេងភាគច្រើន នៅក្នុងព្រឹទ្ធសភា។ បរាជ័យរបស់គណបក្សប្រជាធិបតេយ្យនេះ នឹងបង្កបញ្ហាស្មុគស្មាញដល់លោកអូបាម៉ា ក្នុងការដឹកនាំប្រទេសក្នុងរយៈពេល ២ឆ្នាំចុងក្រោយនៃអាណត្តិ និងការបោះឆ្នោតសម្រាប់អាណត្តិទី២ នៅឆ្នាំ ២០១២ខាងមុខ។
លទ្ធផលបណ្តោះអាសន្នបង្ហាញថា នៅក្នុងរដ្ឋសភា (House of Representative) គណបក្សសាធារណរដ្ឋទទួលបានអាសនៈ ២៣៨ ចំណែកឯគណបក្សប្រជាធិបតេយ្យវិញ ទទួលបានតែ ១៨៣ប៉ុណ្ណោះ។ នេះមានន័យថា គណបក្សប្រជាធិបតេយ្យបានបាត់បង់អាសនៈរហូតដល់ទៅជាង ៦០ ទៅក្នុងដៃគណបក្សសាធារណរដ្ឋ។ នេះគឺជាបរាជ័យដ៏ធំ ដែលគណបក្សប្រជាធិបតេយ្យមិនធ្លាប់ជួបប្រទះ ក្នុងរយៈពេលជាង ៧០ឆ្នាំកន្លងទៅនេះ។
នៅក្នុងព្រឹទ្ធសភា គណបក្សប្រជាធិបតេយ្យក៏បានបាត់បង់សំឡេងមិនតិចដែរ ក៏ប៉ុន្តែ នៅរក្សាបានសំឡេងភាគច្រើនដដែល គឺបានទាំងប្រផិតប្រផើយ (ប្រជាធិបតេយ្យ ៥១អាសនៈ និងសាធារណរដ្ឋ ៤៦អាសនៈ)។ សូម្បីតែអាសនៈព្រឹទ្ធសភា ដែលលោកអូបាម៉ាធ្លាប់កាន់កាប់ នៅក្នុងរដ្ឋ Illinois ក៏ត្រូវធ្លាក់ទៅក្នុងដៃគណបក្សសាធារណរដ្ឋដែរ។
គ្រាន់តែបានជាប់ឆ្នោតភ្លាម អនាគតមេដឹកនាំគណបក្សសាធារណរដ្ឋ នៅព្រឹទ្ធសភា បានទាមទារឲ្យលោកអូបាម៉ាផ្លាស់ប្តូរនយោបាយរបស់លោក។ នៅក្នុងរយៈពេលពីរឆ្នាំខាងមុខនេះ លោកអូបាម៉ាចាំបាច់ត្រូវតែសម្រុះសម្រួលជាមួយគណបក្សសាធារណរដ្ឋ ដើម្បីអនុម័តកំណែទម្រង់ ដែលលោកគ្រោងធ្វើ។ យោងតាមមន្រ្តីសេតវិមាន ក្រោយពីបានឃើញពីលទ្ធផលបោះឆ្នោតភ្លាម លោកអូបាម៉ាបានទូរស័ព្ទទៅមេដឹកនាំគណបក្សសាធារណរដ្ឋ ដើម្បីអបអរសាទរផង និងដើម្បីបើកផ្លូវធ្វើការសម្រុះសម្រួលគ្នាផង។
គួរបញ្ជាក់ថា នៅសហរដ្ឋអាមេរិក នេះមិនមែនជាលើកទី១ទេ ដែលគណបក្សប្រឆាំងមានសំឡេងភាគច្រើននៅសភា។ កន្លងមក គេតែងតែឃើញគណបក្សកាន់អំណាច និងគណបក្សប្រឆាំងចរចា សម្រុះសម្រួលគ្នា ដើម្បីអនុម័តច្បាប់នានា ដោយមិនឲ្យមានការជាប់គាំងផ្នែកនយោបាយនោះទេ។ ក៏ប៉ុន្តែ នៅពេលនេះ នៅក្នុងចំណោមសមាជិកសភាមកពីគណបក្សសាធារណរដ្ឋ ដែលទើបនឹងជាប់ឆ្នោតថ្មី ភាគច្រើន គឺជាអ្នកអភិរក្សនិយម ដែលប្រកាន់ជំហរតឹងរ៉ឹងចំពោះលោកអូបាម៉ា។ ទាំងនេះអាចជាឧបសគ្គរារាំងការសម្រុះសម្រួលគ្នារវាងគណបក្សប្រជាធិបតេយ្យ និងគណបក្សសាធារណរដ្ឋ នៅសភា។
បញ្ហាធំ ដែលលោកអូបាម៉ាត្រូវប្រឈមមុខ គឺថវិកាជាតិ ដែលត្រូវការការអនុម័តពីសភា។ នៅពេលច្បាប់ថវិកា ទៅដល់ដៃសភា គណបក្សសាធារណរដ្ឋអាចនឹងទាមទារឲ្យកាត់បន្ថយមុខចំណាយមួយចំនួន ដែលស្នើឡើងដោយលោកអូបាម៉ា។ គេនៅចាំបានថា កាលពីឆ្នាំ១៩៩៥ លោកប៊ីល គ្លីនតុន បានបង្ខំចិត្តកាត់បន្ថយមន្រ្តីរដ្ឋាភិបាល និងលុបចោលគម្រោងជាច្រើន ដោយហេតុតែពួកសាធារណរដ្ឋមិនផ្តល់ថវិកាឲ្យគ្រប់គ្រាន់។
កំណែទម្រង់ធំៗ ដែលលោកអូបាម៉ា គ្រោងធ្វើនាពេលខាងមុខនេះ ក៏អាចនឹងត្រូវជាប់គាំងដែរ ប្រសិនបើគ្មានការគាំទ្រពីសំណាក់គណបក្សសាធារណរដ្ឋ។ នេះអាចបង្កបញ្ហាដល់លោកអូបាម៉ា ក្នុងការបោះឆ្នោតប្រធានាធិបតីអាណត្តិទី២ នៅឆ្នាំ២០១២ខាងមុខ។
កាលពីឆ្នាំ២០០៨ ពលរដ្ឋអាមេរិកយ៉ាងច្រើនបានបោះឆ្នោតឲ្យលោកអូបាម៉ា ដោយដាក់ក្តីសង្ឃឹមថា លោកនឹងអាចធ្វើកំណែទម្រង់ធំៗ ដើម្បីផ្លាស់ប្តូរនយោបាយរបស់អាមេរិក។ ប្រសិនបើកំណែទម្រង់ត្រូវជាប់គាំង លោកអូបាម៉ាអាចនឹងត្រូវបាត់បង់ប្រជាប្រិយភាព ហើយត្រូវទទួលបរាជ័យក្នុងការបោះឆ្នោត នៅឆ្នាំ២០១២។
ក៏ប៉ុន្តែ ដោយសារតែនៅពេលនេះ គណបក្សសាធារណរដ្ឋគ្រប់គ្រងសភាមួយផ្នែកដែរនោះ គណបក្សសាធារណរដ្ឋនឹងត្រូវចូលរួមទទួលខុសត្រូវមួយផ្នែក ចំពោះបញ្ហាដែលនឹងកើតឡើង ក្នុងរយៈពេល ២ឆ្នាំខាងមុខទៀតនេះ។ ប្រសិនបើមានបញ្ហាអ្វី លោកអូបាម៉ាអាចបន្ទោសគណបក្សសាធារណរដ្ឋបាន ដោយមិនឲ្យគណបក្សប្រជាធិបតេយ្យទទួលខុសត្រូវតែឯង ដូចពេលមុន ដែលគណបក្សប្រជាធិបតេយ្យគ្រប់គ្រងសភាទាំងពីរនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ