ការដេញដោលមតិបេក្ខជនប្រធានាធិបតីបារាំងពោរពេញដោយភាពតានតឹង និងពាក្យសម្តីវាយប្រហារគ្នា
ចុះផ្សាយនៅថ្ងៃ៖
ស្តាប់ - ០៥:៣៥
បារាំងត្រូវបោះឆ្នោតប្រធានាធិបតីជុំទី២ ថ្ងៃអាទិត្យ៧ឧសភានេះ។ ការតស៊ូមតិទល់មុខគ្នា រវាងបេក្ខជនប្រធានាធិបតីបារាំង អេម៉ានុយអែល ម៉ាក្រុង និងម៉ារីន ឡឺប៉ែន នៅតាមកញ្ចក់ទូរទស្សន៍ យប់ថ្ងៃពុធម្សិលមិញ ពោរពេញដោយភាពតានតឹង និងពាក្យសម្តីវាយប្រហារគ្នា។ សារព័ត៌មានបារាំងធំៗបានប្រដូចការដេញដោលមតិនេះ ទៅនឹងសង្វៀនកីឡាប្រដាល់។ បេក្ខជននិន្នាការកណ្តាល ម៉ាក្រុង និងបេក្ខនារីបក្សស្តាំនិយមជ្រុល ឡឺប៉ែន មិនបានបង្ហាញកម្មវិធីនយោបាយបានស៊ីជម្រៅ ដូចដែលសាធារណជនទន្ទឹងចាំទេ។
ក្រោយការដេញដោលមតិនេះ ការស្ទាបស្ទង់មតិបង្ហាញថា ពលរដ្ឋ៦៣ភាគរយ យល់ថា លោកម៉ាក្រុងមានប្រៀបជាងលោកស្រីឡឺប៉ែន។
ការដេញដោលមតិរវាងលោកម៉ាក្រុង និងលោកស្រីឡឺប៉ែន អាចតានតឹងជាងការដេញដោលមតិក្នុងការបោះឆ្នោតមុនៗ
ការតស៊ូមតិរវាងបេក្ខជននិន្នាការកណ្តាល លោកម៉ាក្រុង និងបេក្ខជនបក្សស្តាំនិយមជ្រុល លោកស្រី ឡឺប៉ែន ចាប់ផ្តើមភ្លាម គឺលោកស្រីឡឺប៉ែន ប្រើសំដី វាយប្រហារលោកម៉ាក្រុងភ្លាមតែម្តង។ ម្ល៉ោះហើយ ការដេញដោលគ្នាក៏ក្លាយទៅជាសង្វៀនកីឡាប្រដាល់ ព្រោះលោកម៉ាក្រុងត្រូវការពារខ្លួនវិញដែរ ប្រឈមនឹងពាក្យសំដីវាយប្រហាររបស់លោកស្រី ឡឺប៉ែន។
ចាប់ផ្តើមតស៊ូមតិភ្លាម លោកស្រីឡឺប៉ែនចោទលោកម៉ាក្រុងភ្លាមថា លោកជាបេក្ខជនសកលភាវូបនីយកម្មបែបកំរោល ដែលយើងហៅថា បែបព្រៃនោះឯង។ លោកម៉ាក្រុងវិញ ចោទថា លោកស្រីឡឺប៉ែនបង្ហាញការស្អប់ខ្ពើម និងភូតកុហក។ និយាយរួមទៅ យប់មិញនេះ ពិធីករជាអ្នកសារព័ត៌មានទាំង២រូប ដែលសួរសំណួរបេក្ខជនទាំង២ មិនបានមាត់កច្រើនទេ ព្រោះបេក្ខជនទាំង២ អោយតែឆ្លើយសំណួរមួយៗ គឺមិនភ្លេចវាយប្រហារសំដីគ្នាទេ។
ដោយសារលោកអេម៉ានុយអែល ម៉ាក្រុង ធ្លាប់ធ្វើរដ្ឋមន្ត្រីសេដ្ឋកិច្ចរបស់បក្សកាន់អំណាចសង្គមនិយមសព្វថ្ងៃ ហើយសព្វថ្ងៃប្រជាជនគ្មានការងារចេះតែកើនឡើង លោកស្រីឡឺប៉ែនលើកឡើងថា លោកម៉ាក្រុងជាបេក្ខជនបំផ្លាញសេដ្ឋកិច្ច ជាបេក្ខជនធ្វើសង្គ្រាមប្រឆាំងមនុស្សគ្រប់គ្នា។ សម្រាប់លោកស្រីឡឺប៉ែន លោកម៉ាក្រុងជាអតីតរដ្ឋមន្ត្រីសេដ្ឋកិច្ច លោកច្បាស់ជាលម្អៀងទៅរកសហគ្រាសរកស៊ីធំៗ ភ្លេចគិតប្រជាជនក្នុងស្រុក។ លោកស្រីអួតខ្លួនឯងថា លោកស្រីជាបេក្ខជនតំណាងប្រជាជនបារាំង។
ឆ្លើយសំណួរទាក់ទងការប្រយុទ្ធប្រឆាំងភេរវកម្ម លោកស្រីលើកឡើងពីកម្មវិធីរឹតបន្តឹងព្រំដែន និងសន្យាបណ្តេញជនបរទេសដែលជាប់សង្ស័យថា ជាជនជ្រុលនិយមអ៊ីស្លាម គំរាមកំហែងសន្តិសុខ អោយពួកគេចេញពីទឹកដីបារាំង។ លោកស្រីថែមទាំងឆ្លៀតចោទថា លោកម៉ាក្រុងគ្មានកម្មវិធីនយោបាយបែបនេះទេ- ចោទថា លោកម៉ាក្រុងអនុគ្រោះជនជ្រុលនិយមអ៊ីស្លាម។
លោកម៉ាក្រុងតបវិញថា ការត្រួតពិនិត្យព្រំដែន គឺមានរួចមកហើយ ផ្ទុយទៅវិញ គឺបក្សរណសិរ្សជាតិរបស់លោកស្រីឡឺប៉ែនទេ ដែលមិនដែលបានបោះឆ្នោតអ្វីសោះ ទាក់ទងនឹងច្បាប់ប្រឆាំងភេរវកម្ម ទាំងនៅសភាបារាំង ទាំងនៅសភាអឺរ៉ុប។ ម្ល៉ោះហើយ បានជាលោកម៉ាក្រុង ចោទថា លោកស្រីឡឺប៉ែន ភូតកុហក និងបង្កការភ័យខ្លាច។
បេក្ខជនទាំង២មិនបានបង្ហាញកម្មវិធីស៊ីជម្រៅ តាមការទន្ទឹងរង់ចាំរបស់ពលរដ្ឋ
នេះដោយសារតែលោកស្រីឡឺប៉ែន និងលោកម៉ាក្រុងគិតតែវាយប្រហារសំដីគ្នាពេក អញ្ចឹងទៅ ម្នាក់ៗ មិនបានបង្ហាញកម្មវិធីនយោបាយអោយដិតដល់រៀងៗខ្លួន។ អោយតែឆ្លើយសំណួរពិធីករជាអ្នកសារព័ត៌មានម្តងៗ គឺម្នាក់ៗឆ្លៀតប្រហារសំដីគ្នាជានិច្ច។
លោកស្រីឡឺប៉ែនលើកឡើងថា លោកម៉ាក្រុងមានគណនីធនាគារនៅបាហាម៉ាស ក្រៅស្រុក។ លោកម៉ាក្រុងវិញតបថា លោកគ្មានរឿងពាក់ព័ន្ធផ្លូវច្បាប់ ដូចលោកស្រីទេ។ សូមរំលឹកថា មន្ត្រីបក្សរណសិរ្សជាតិរបស់លោកស្រីឡឺប៉ែន ច្រើនរូប មានទាំងលោកស្រីផងដែរ កំពុងជាប់រឿងអាស្រូវថា បន្លំយកលុយសភាអឺរ៉ុបរាប់លានអឺរ៉ូ តាំងពីឆ្នាំ២០១៥មក សម្រាប់បង់ប្រាក់ខែបុគ្គលិកជំនួយការបក្ស ខណៈបុគ្គលិកទាំងនេះគ្មានវត្តមាននៅសភាអឺរ៉ុប។
លោកស្រីឡឺប៉ែនចង់អោយបារាំងដើរចេញពីអឺរ៉ុបដូចអង់គ្លេស ចង់អោយចាយលុយជាតិ ឈប់ចាយលុយអឺរ៉ូទៀត តែមិនបានប្រាប់ថា ធ្វើយ៉ាងម៉េចទើបអាចដំណើរការ។ លោកម៉ាក្រុងរំលឹកលោកស្រីឡឺប៉ែនថា អង់គ្លេសចេញពីអឺរ៉ុប គឺអង់គ្លេសត្រូវបង់លុយអោយអឺរ៉ុបរាប់សិបលានអឺរ៉ូ។ សម្រាប់លោកម៉ាក្រុងជាបេក្ខជននិន្នាការកណ្តាល លោកស្រីឡឺប៉ែន គ្មានកម្មវិធីនយោបាយប្រាកដប្រជាទេ។
ទាក់ទងនឹងការចង់អោយបារាំងដើរចេញពីអឺរ៉ុប លោកស្រីឡឺប៉ែនចោទលោកម៉ាក្រុងថា អោនលំទោនចំពោះអាល្លឺម៉ង់ ចំពោះលោកស្រីមែរគែល។ លោកស្រីលើកឡើងថា បើបារាំងមិនស្ថិតក្រោមការគ្រប់គ្រងរបស់លោកស្រីទេ គឺបារាំងស្ថិតក្រោមលោកស្រីមែរគែល។
លោកស្រីឡឺប៉ែនមិនចេះចាប់ឱកាសធ្វើអោយលោកម៉ាក្រុងមានប្រៀបជាង
ការស្ទាបស្ទង់មតិបង្ហាញថា ពលរដ្ឋ៦៣ភាគរយគិតថា លោកម៉ាក្រុង មានប្រៀបជាង។ មានតែ៣៣ភាគរយទេគិតថា លោកស្រីឡឺប៉ែនមានប្រៀបជាងលោកម៉ាក្រុង។ អ្នកបោះឆ្នោតជុំទី១ ដែលបានបោះអោយបេក្ខជនឆ្វេងនិយម ម៉េឡង់ស្ហុង និងបេក្ខជនស្តាំនិយមហ្វ៊ីយ៉ុង ភាគច្រើនយល់ថា លោកម៉ាក្រុងមានប្រៀបជាង។ យុវជនតាមទីក្រុង ប្រជាជនមានជីវភាពមធ្យម និងអ្នករកស៊ី ពេញចិត្តនឹងលោកម៉ាក្រុង។ ចំណែកលោកស្រីឡឺប៉ែន ទាក់ទាញប្រជាជនតាមជនបទ និងអ្នកគ្មានការងារធ្វើ។
យប់មិញ លោកម៉ាក្រុង ទោះបីត្រូវប្រហារសំដីតបទៅលោកស្រីឡឺប៉ែនវិញ ក៏លោកបានឆ្លៀតលើកឡើងពីកម្មវិធីនយោបាយរបស់លោកបានគួរសមដែរ។ លោកស្រីឡឺប៉ែនវិញ ដោយសារគិតតែវាយប្រហារលោកម៉ាក្រុងពេក លោកស្រីមិនបានបង្ហាញកម្មវិធីច្បាស់លាស់ រឺលម្អិតទេ។
លោកស្រីភ្លេចថា ការតស៊ូមតិសម្រាប់ការបោះឆ្នោតជុំទី២នេះ ជាឱកាសល្អ សម្រាប់បក្សរណសិរ្សជាតិ ដើម្បីបង្រួបបង្រួបបញ្ចុះបញ្ចូល អ្នកបោះឆ្នោតដែលនៅស្ទាក់ស្ទើរចិត្ត អោយពួកគេបោះអោយលោកស្រី និងដើម្បីរកសន្លឹកឆ្នោតពីអ្នកដែលអាចបោះអោយលោកម៉ាក្រុងដែរ។
តាំងពីលោកស្រីឡើងកាន់កាប់បក្សរណសិរ្សជាតិមក លោកស្រីបានកែប្រែមុខមាត់បក្សអោយគ្រប់គ្នាមើលឃើញថា បក្សរណសិរ្សជាតិមិនមែនជាបក្សជ្រុលនិយមប្រកាន់ពូជសាសន៍ទេ។ លោកស្រីលើកស្ទួយរហូតបក្សរណសិរ្សជាតិក្លាយជាបក្សសំខាន់ទី៣ក្នុងប្រទេស។ លើកស្ទួយ រហូតបក្សរណសិរ្សជាតិមានវត្តមានក្នុងការបោះឆ្នោតប្រធានាធិបតីជុំទី២ពេលនេះ គឺបង្ហាញថា ប្រជាជនបារាំងច្រើនណាស់ បានផ្លាស់ប្តូរការយល់ឃើញចំពោះបក្សនេះ។
កន្លងមក ការស្ទាបស្ទង់មតិបង្ហាញថា ត្បិតថា លោកម៉ាក្រុងអាចជាប់ឆ្នោត នៅថ្ងៃអាទិត្យនេះ ប៉ុន្តែ ភាគរយប្រជាជនគាំទ្រលោកចេះតែធ្លាក់ចុះជាលំដាប់ រហូតដល់៥៩ភាគរយ ខណៈអ្នកអាចបោះឆ្នោតអោយលោកស្រីឡឺប៉ែន អាចកើនដល់៤០ភាគរយ។
តែយប់មិញ លោកស្រីឡឺប៉ែនគិតតែវាយប្រហារសំដីជាមួយលោកម៉ាក្រុង មិនចេះចាប់ឧកាសល្អក្នុងការដេញដោលមតិ ដើម្បីបង្ហាញលម្អិតកម្មវិធីនយោបាយ ធ្វើអោយអ្នកដែលបោះឆ្នោតអោយលោកម៉ាក្រុងអាចកើន ភាគរយឡើងវិញ។ វាជាកំហុសមួយចំណែករបស់លោកស្រី បើលោកស្រីចាញ់ឆ្នោតថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ