វិបត្តិអ៊ុយក្រែន៖តើអាចនឹងមានច្រកចេញឆាប់ៗ ឬទេ?
ចុះផ្សាយនៅថ្ងៃ៖
ស្តាប់ - ០៦:៥៥
ថ្ងៃនេះ ឈានដល់ថ្ងៃទី២ និងជាថ្ងៃចុងក្រោយនៃជំនួបកំពូលលើកទី ២៨ របស់អង្គការអូតង់នៅក្នុងប្រទេសអង់គ្លេស។ ជំនួបកំពូលអូតង់ឆ្នំានេះបានធ្វើឡើងនៅក្នុងបរិបទនៃការគំរាមកំហែងរបស់ក្រុមជីហាតនៅក្នុងប្រទេសអ៊ីរ៉ាក់ និងស៊ីរី ព្រមការប្រឈមមុខខ្លំាងជាមួយប្រទេសរុស្ស៊ីនៅក្នុងវិបត្តិអ៊ុយក្រែន។ គឺវិបត្តិអ៊ុយក្រែននេះឯងដែលគ្រប់គ្នាក៏កំពុងបង្វែរចក្ខុទៅកាន់ទីក្រុងមីនស្កិ៍ ប្រទេសបេឡារុស ព្រោះថានៅថ្ងៃនេះ មានបើកកិច្ចប្រជុំនៃក្រុមទំនាក់ទំនងដែលចូលរួមដោយភាគីអ៊ុយក្រែន រុស្ស៊ី និងអង្គការដើម្បីសន្តិសុខ និងកិច្ចសហប្រតិបត្តិការក្នុងទ្វីបអឺរ៉ុបដែលគេហៅកាត់ថា OSCE ។ កម្មវត្ថុនៃអង្គប្រជុំគឺដើម្បីស្វែងរកកិច្ចព្រមព្រៀងឈប់បាញ់មួយរវាងអ៊ុយក្រែន និងចលនាឧទ្ទាមទាមទារផ្តាច់ទឹកដីនិយមនៅតំបន់ប៉ែកខាងកើតអ៊ុយក្រែន។ ទន្ទឹមគ្នានេះ អូតង់ និងប្រទេសលោកខាងលិចក៏កំពុងបន្តស្វែងរកទ័ណ្ឌកម្មថ្មីទៀតប្រឆំាងនឹងរុស្ស៊ីដែរ។
អ្នកដែលបានប្រកាសឲ្យដឹងមុនគេថានឹងមានការចុះហត្ថលេខាលើកិច្ចព្រមព្រៀងឈប់បាញ់ក្នុងថ្ងៃនេះ គឺលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូ។ លោកប៉ូរ៉ូឆេនកូបានប្រកាសយ៉ាងដូចនេះនាឱកាសដែលលោកបានចូលរួមនៅក្នុងជំនួបកំពូលអូតង់ក្នុងប្រទេសអង់គ្លេសនាថ្ងៃព្រហស្បតិ៍ម្សិលមិញ។ សម្រាប់លោកប៉ូរ៉ូឆេនកូ អ៊ុយក្រែនជាប្រទេសដែលចង់បានសន្តិភាព និងថា ក្នុងនាមជាប្រធានាធិបតី លោកត្រៀមខ្លួនធ្វើអ្វីៗគ្រប់បែបយ៉ាងដែលអាចធ្វើទៅបានដើម្បីបញ្ចប់សង្រ្គាម។
« អ៊ុយក្រែនប្រយុទ្ធដើម្បីសន្តិភាព។ យើងបានប្រឹងប្រែងធ្វើអ្វីៗគ្រប់យ៉ាងទំាងអស់ដើម្បីបញ្ឈប់ការឈ្លានពាន និងដើម្បីទទួលបាននូវការបញ្ឈប់ការប្រយុទ្ធ ព្រោះថាពិតប្រាកដទៅ គឺអ៊ុយក្រែនទេដែលកំពុងទទួលការខាតបង់ខ្លំាង។ ទាហាន និងប្រជាជនស៊ីវិលស្លូតត្រង់បានបាត់បង់ជីវិតជារៀងរាល់ថ្ងៃ។ ក្នុងនាមខ្ញុំជាប្រធានាធិបតី ខ្ញុំបានត្រៀមខ្លួនរួចជាស្រេចដើម្បីធ្វើអ្វីៗគ្រប់បែបយ៉ាងទំាងអស់ដែលអាចធ្វើបានដើម្បីបញ្ឈប់សង្រ្គាម »
គួររម្លឹកជូនឡើងវិញថា កិច្ចប្រជុំត្រីភាគី អ៊ុយក្រែន រុស្ស៊ី និង OSCE ថ្ងៃនេះក្នុងទីក្រុងមីនស្កិ៍ ប្រទេសបេឡារុសគឺជាកិច្ចប្រជុំលើកទី២ បន្ទាប់ពីបានជួបប្រជុំលើកទី១ នៅដើមសប្តាហ៍នេះ។ មួយវិញទៀត កិច្ចប្រជុំលើកទី២ ថ្ងៃនេះបានធ្វើឡើង ក្រោយពីលោកប្រធានាធិបតីរុស្ស៊ីពូទីន និងលោកប្រធានាធិបតីអ៊ុយក្រែនប៉ូរ៉ូឆេនកូបានជួបជជែកគ្នាតាមទូរស័ព្ទស្តីពីបទឈប់បាញ់ និងបន្ទាប់ពីរូបលោកពូទីនដដែលបានស្នើចេញនូវផែនការសន្តិភាពមួយ។
ភាគីនីមួយៗបន្តបញ្ចេញលក្ខខណ្ឌរៀងៗខ្លួន
គឺកិច្ចសន្ទនាតាមទូរស័ព្ទរវាងលោកប៉ូរ៉ូឆេនកូ និងលោកពូទីន ព្រមទំាងផែនការសន្តិភាពស្នើឡើងដោយលោកពូទីនដែលត្រូវបានគេយកមកធ្វើជាមូលដ្ឋានដើម្បីស្វែងរកកិច្ចព្រមព្រៀងឈប់បាញ់មួយដែលអាចទទួលយកបានទំាងអស់គ្នា ពិសេសរវាងអ៊ុយក្រែន និងពួកឧទ្ទាមគំាទ្ររុស្ស៊ី។ តែទន្ទឹមគ្នានេះ ភាគីនីមួយៗក៏បានទាមទារលក្ខខណ្ឌរៀងខ្លួនដែរ។ សម្រាប់ទីក្រុងគៀវ ទី១ គេត្រូវតែដាក់ខ្សែបន្ទាត់ព្រំដែនអ៊ុយក្រែន រុស្ស៊ីឲ្យស្ថិតក្រោមការត្រួតពិនិត្យរបស់អង្គការ OSCE ទី២ វត្តមានកម្លំាងទ័ពរុស្ស៊ីនៅក្នុងទឹកដីអ៊ុយក្រែននឹងត្រូវដកចេញទំាងអស់ និងលក្ខខណ្ឌទី៣ រុស្ស៊ី និងពួកឧទ្ទាមនិយមរុស្ស៊ីត្រូវតែដោះលែងឈ្លើយសឹកអ៊ុយក្រែនទំាងអស់។ នៅខាងរុស្ស៊ីវិញ ក្រុងម៉ូស្គូបានប្រឆំាងដាច់ខាតចំពោះការភ្ជាប់រុស្ស៊ីទៅក្នុងវិបត្តិអ៊ុយក្រែនសព្វថ្ងៃដោយរុស្ស៊ីអះអាងជាថ្មីថា វាជាជម្លោះផ្ទៃក្នុងរបស់អ៊ុយក្រែនសុទ្ធសាធ និងថា អ៊ុយក្រែនគួរតែបញ្ឈប់ការវាយប្រហារផ្លូវអាកាសលើតំបន់ប៉ែកខាងកើត។
ដូច្នេះ អ្វីៗវាអាស្រ័យលើឆន្ទៈ និងលក្ខខណ្ឌរបស់ភាគីនីមួយៗដែលត្រូវយកទៅជជែករួមគ្នា។ លោកប៉ូរ៉ូឆេនកូបានបញ្ជាក់ថា លោកនឹងបញ្ជាឲ្យទ័ពអ៊ុយក្រែនផ្អាកច្បំាង ប្រសិនបើកិច្ចប្រជុំថ្ងៃនេះបានចាប់ផ្តើម។ តែពួកឧទ្ទាមបានអះអាងផ្សេងថា ពួកគេនឹងផ្អាកប្រយុទ្ធនៅពេលដែលមានកិច្ចព្រមព្រៀងមួយ និងដែលអ៊ុយក្រែនយល់ព្រមចុះហត្ថលេខាលើផែនការនយោបាយមួយ។
សហគមន៍អន្តរជាតិបន្តដាក់គំនាបលើរុស្ស៊ី ដោយកំពុងពិចារណារកទណ្ឌកម្មថ្មី
យើងនឹងលក់នាវាចម្បាំងទៅឲ្យរុស្ស៊ីប្រសិនបើមានលក្ខខណ្ឌសមស្រប គឺមានបទឈប់បាញ់ និងដំណោះស្រាយនយោបាយនៅអ៊ុយក្រែន
ប្រសាសន៍របស់លោកហ្វ្រង់ស័រ ហូឡង់
គ្រប់គ្នាកំពុងរង់ចំាមើលពីលទ្ធផលប្រជុំនៅក្នុងប្រទេសបេឡារុសរវាងអ៊ុយក្រែន រុស្ស៊ី និងអង្គការ OSCE។ តែទន្ទឹមគ្នានេះ សហគមន៍អន្តរជាតិក៏បន្តដាក់គំនាបលើរុស្ស៊ីដោយកំពុងបន្តស្វែងរកទ័ណ្ឌកម្មថ្មីទៀតប្រឆំាងក្រុងម៉ូស្គូ។ មកដល់ពេលនេះ គេច្រើនឃើញមានតែទណ្ឌកម្មសេដ្ឋកិច្ច និងដែលតទៅថ្ងៃមុខ អាចនឹងមានទណ្ឌកម្មសេដ្ឋកិច្ច និងហិរញ្ញវត្ថុថ្មីៗបន្ថែមទៀត។ ទន្ទឹមគ្នានេះ សហគមន៍អន្តរជាតិក៏កំពុងពិចារណាលើជំនួយផ្នែកយោធាចំពោះអ៊ុយក្រែន ដូចជាការបញ្ជូនអាវុធទៅឲ្យទ័ពអ៊ុយក្រែន ឬមួយក៏បញ្ជូនអ្នកឯកទេសយោធាទៅជួយហ្វឹកហ្វឺនទាហានអ៊ុយក្រែនដែលនៅមានសមត្ថភាពទាបប្រឈមនឹងទាហានរុស្ស៊ី។ នៅថ្ងៃម្សិលមិញ អង្គការអូតង់បានសម្រេចផ្តល់ជំនួយឲ្យអ៊ុយក្រែនជាលុយចំនួន ១៥លានអឺរ៉ូទុកសម្រាប់ពង្រឹងវិស័យកងទ័ព។
ការដែលសហគមន៍អន្តរជាតិនៅបន្តដាក់គំនាបដល់រុស្ស៊ីពេលនេះក៏ដោយសារថា ពួកគេមិនទុកលោកប្រធានាធិបតីរុស្ស៊ីពូទីនបន្តិចណាសោះ ព្រោះថា គឺរូបលោកពូទីននោះហើយដែលបានដើរជាតួអង្គឯកនៅក្នុងវិបត្តិអ៊ុយក្រែនតំាងពីដើមមក នោះបើទោះបីជាលោកពូទីនតែងតែចេញមុខបដិសេធក៏ដោយ។ ជាក់ស្តែងនៅពេលនេះ លោកពូទីនកំពុងមានវត្តមាននៅជួរមុខតែម្តង។ គឺលោកពូទីននេះហើយដែលបានចេញមុខជជែកជាមួយលោកប៉ូរ៉ូឆេនកូពីរឿងកិច្ចព្រមព្រៀងឈប់បាញ់ គឺរូបលោកពូទីនដដែលនោះហើយដែលបានស្នើឡើងនូវផែនការសន្តិភាពមួយ និងគឺមានតែរូបលោកពូទីនទេដែលអាចនិយាយជាមួយពួកឧទ្ទាមបាន។ ដូច្នេះសម្រាប់សហគមន៍អន្តរជាតិ មានតែបន្ថែមគំនាបលើលោកពូទីនទេទើបគេអាចរកដំណោះស្រាយបានឆាប់ចំពោះវិបត្តិអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ