គណបក្សសង្រ្គោះជាតិ និងរដ្ឋសភានឹងរួមគ្នារៀបចំបុណ្យសពលោកប៉ែន សុវណ្ណ
មន្ត្រីជាន់ខ្ពស់គណបក្សសង្រ្គោះជាតិបានលើកឡើងថាគណៈកម្មការរៀបចំបុណ្យសពរបស់រដ្ឋសភា និងគណបក្សសង្រ្គោះជាតិនឹងជជែកគ្នា ដើម្បីរៀបចំពិធីហែសពលោកប៉ែន សុវណ្ណពីខេត្តតាកែវ មកកាន់រាជធានីភ្នំពេញនៅថ្ងៃទី២ ខែវិច្ឆកាខាងមុខនេះ។ សពលោកប៉ែន សុវណ្ណ នឹងតម្កល់ទុកនៅវត្តថាន់រាជធានីភ្នំពេញមុននឹងបូជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោកម៉ៅ មុនីវណ្ណអនុប្រធានគណៈកម្មការរៀបចំបុណ្យសព លោកប៉ែន សុវណ្ណ បានប្រាប់វិទ្យុបារាំងអន្តរជាតិថា គណៈកម្មការរៀបចំបុណ្យសពទាំងពីរនឹងរៀបចំបុណ្យសពលោកប៉ែន សុវណ្ណ។ លោកបញ្ជាក់ថាលោកយ៉ែម បុញ្ញាឫទ្ធិ ត្រូវបានរដ្ឋសភាចាត់តាំងជាប្រធានគណៈកម្មការបុណ្យសពនេះ ហើយគណបក្សសង្រ្គោះជាតិគឺមានលោកប៉ុល ហំមជាប្រធាន។ គណៈកម្មការទាំងពីរនឹងពិភាក្សាគ្នា ដើម្បីរៀបចំពិធីហែសព ពីខេត្តតាកែវ ទៅរាជធានីភ្នំពេញ ឲ្យសាកសមនឹងកិត្តិយសរបស់លោកប៉ែន សុវណ្ណ។
លោកបន្ថែមថាសពលោកប៉ែន សុវណ្ណ នឹងត្រូវហែទៅរាជធានីភ្នំពេញនៅពេលព្រឹកថ្ងៃទី២ ខែវិច្ឆកា ហើយតម្កល់ទុកក្នុងវត្តថាន់រាជាធានីភ្នំពេញ ដើម្បីឲ្យប្រជាពលរដ្ឋមកគោរព។ យ៉ាងណាមិញអនុប្រធានគណៈកម្មការរៀបចំបុណ្យសពនេះ បានឲ្យដឹងថាមិនទាន់មានការកំណត់ពីពេលវេលាជាក់លាក់នៅឡើយទេចំពោះការបូជាសពលោកប៉ែន សុវណ្ណ។
ការដង្ហែមករាជធានីភ្នំពេញ គឺដោយសារតែលោកប៉ែន សុវណ្ណជាតំណាងរាស្ត្រ និងជាអតីតនាយករដ្ឋមន្ត្រី កេរ្តិ៍ឈ្មោះ និងវីរភាព គាត់បានដក់ក្នុងដួងចិត្តកូនខ្មែរគ្រប់គ្នា និងដោយសារមានការសំណូមពរពីប្រជាពលរដ្ឋផងដែរ។ នេះបើតាមលោកម៉ៅ មុនីវណ្ណ។
យ៉ាងណាមិញ លោកយ៉ែម បុញ្ញឫទ្ធិ បានឲ្យដឹងនៅថ្ងៃនេះថា មិនទាន់មានការព្រមព្រៀងគ្នានៅឡើយទេ ចំពោះការជ្រើសរើសទីតាំងវត្តណាមួយសម្រាប់តម្កល់ និងបូជាសពលោកប៉ែន សុវណ្ណ។ ប៉ុន្តែលោកយ៉ែម បុញ្ញឫទ្ធិបានលើកឡើងថាអាចនឹងមានវត្តផ្សេងៗ ដូចជាវត្តថាន់ វត្តចាស់ជាដើម។
សូមបញ្ជាក់ថាលោក ប៉ែន សុវណ្ណ បានទទួលមរណភាពកាលពីថ្ងៃទី២៩ ខែតុលា ក្នុងជន្មាយុ៨០ឆ្នាំ ដោយរោគាពាធ ហើយសពរបស់លោកត្រូវបានតម្កល់ទុកនៅគេហដ្ឋានរបស់លោកនៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ។ លោកប៉ែន សុវណ្ណ គឺតំណាងរាស្ត្រមណ្ឌលកំពង់ស្ពឺ ឧត្តមទីប្រឹក្សាគណបក្សសង្គ្រោះជាតិ និងជាអតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា។
លោកឡេង ប៉េងឡុងអ្នកនាំពាក្យរដ្ឋសភាបានឲ្យដឹងថាសភានឹងធ្វើពិធីឈាបនកិច្ចផ្លូវការជូនសពលោកប៉ែន សុវណ្ណ ដូចតំណាងរាស្ត្រមុនៗ ទៅតាមច្បាប់បានកំណត់។ រដ្ឋសភាក៏បានបង្កើតគណៈកម្មការរៀបចំបុណ្យសពលោកប៉ែន សុវណ្ណនេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ