អង្គការឃ្លាំមើលសិទ្ធិមនុស្សទទូចឲ្យរដ្ឋាភិបាលកម្ពុជា បញ្ចប់ការនិរទេសខ្លួនលោក សម រង្ស៊ី
អង្គការឃ្លាំមើលសិទ្ធិមនុស្ស (Human Right Watch) ដែលមានមូលដ្ឋាននៅទីក្រុងញូយ៉កសហរដ្ឋអាមេរិកបានចេញសេចក្តីថ្លែងការណ៍មួយ ដោយទទូចឲ្យរដ្ឋាភិបាលកម្ពុជា បញ្ចប់ការនិរទេសខ្លួនមេបក្សប្រឆាំងលោក សម រង្ស៊ី។ សេចក្តីថ្លែងការណ៍ដែលចេញផ្សាយកាលពីថ្ងៃទី២៦តុលាបានហៅវិធានការរបស់រដ្ឋាភិបាលកម្ពុជាថា គឺជាកិច្ចខិតខំប្រឹងប្រែងចុងក្រោយរបស់គណបក្សកាន់អំណាចដើម្បីឈ្នះការបោះឆ្នោតជាតិនៅអាណត្តិក្រោយ ដោយពុំមានគូប្រជែងពិតប្រាកដមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
សេចក្តីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ(Human Right Watch) បានស្រង់សំដីលោក Brad Adam នាយកប្រចាំតំបន់អាស៊ី ដោយបានហៅសេចក្តីសម្រេចរបស់រដ្ឋាភិបាលកម្ពុជាក្នុងការរារាំងការវិលត្រលប់របស់លោក សម រង្ស៊ី នោះថា ជាហេតុផលចុងក្រោយរបស់គណបក្សកាន់អំណាច ដើម្បីឈ្នះការបោះឆ្នោតជាតិនៅអាណត្តិក្រោយទៀត។
នៅក្នុងសេចក្តីថ្លែងការណ៍ចុះថ្ងៃទី២៦តុលា លោក Brad Adam នាយកអង្គការឃ្លាំមើលសិទ្ធិមនុស្ស (Human Right Watch) ប្រចាំតំបន់អាស៊ី ក៏បានទទួចឲ្យប្រទេសជាសមាជិកអាស៊ាន (ASEAN) និងប្រទេសជាម្ចាស់ជំនួយរបស់កម្ពុជាទាំងអស់បង្ហាញការតវ៉ាជាសាធារណៈនិងជាបន្ទាន់មួយទៅកាន់លោកនាយករដ្ឋមន្ត្រី ហ៊ុន សែន ឲ្យបញ្ចប់ការកាត់ទោសមេដឹកនាំបក្សប្រឆាំងដែលមានទម្រង់ជារឿងនយោបាយនេះ។ដោយបានរំលឹកឡើងវិញពីលិខិតរបស់ទីស្តីការគណៈរដ្ឋមន្ត្រី ចុះថ្ងៃទី១២ តុលា Human Rights Watchក៏បានទាមទារឲ្យរដ្ឋាភិបាលកម្ពុជា លុបចោលបទបញ្ជាទៅកាន់ក្រុមហ៊ុនអាកាសចរណ៍ទាំងអស់ ដែលហាមមិនឲ្យដឹកលោក សម រង្ស៊ី មកកាន់ប្រទេសកម្ពុជាវិញ។
សូមបញ្ជាក់ថា តាមរយៈលិខិតចុះថ្ងៃទី១២ខែតុលា ដែលចុះហត្ថលេខាដោយ លោក តឹក រ៉េតសំរេច រដ្ឋលេខាធិការទីស្តីការគណៈរដ្ឋមន្ត្រី ដោយយោងតាមចំណាររបស់លោកនាយករដ្ឋមន្ត្រី ហ៊ុន សែន ផ្ញើទៅអគ្គនាយកនៃអគ្គនាយកដ្ឋានអន្តោប្រវេសន៍ បានណែនាំឲ្យមានការប្រើគ្រប់មធ្យោបាយទាំងអស់ ដើម្បីរារាំងមិនឲ្យលោក សម រង្ស៊ី ប្រធានគណបក្សសង្គ្រោះជាតិ វិលចូលស្រុកបានទេ។ ហើយក្នុងករណីលោក សម រង្ស៊ី ធ្វើដំណើរមកកម្ពុជាតាមយន្តហោះណាមួយ យន្តហោះនោះ ត្រូវបង្វែរទិសដៅទៅអាកាសយានដ្ឋានដើមវិញ ដោយមិនអនុញ្ញាតឲ្យចុះចតនោះទេ។
នៅក្នុងសារអ៊ីម៉ែលមកកាន់វិទ្យុបារាំងអន្តរជាតិ RFI កាលពីថ្ងៃទី២៥តុលា លោកស្រី វ៉ាន់ ហៀលី (Wan-Hea Lee) តំណាងការិយាល័យឧត្តមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំនៅកម្ពុជា(OHCHR) បានទទួចឲ្យរដ្ឋាភិបាលកម្ពុជា ត្រូវតែមានការពន្យល់ជាបន្ទាន់មួយ ចំពោះវិធានការរារាំងមិនឲ្យលោក សម រង្ស៊ី ចូលស្រុកវិញនេះ។ យ៉ាងណាក៏ដោយលោក តឹករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រីបានប្រាប់វិទ្យុបារាំងអន្តរជាតិ RFI នៅថ្ងៃទី២៥តុលាថា វិធានការបង្ការទុកជាមុន ដើម្បីទប់ស្កាត់ លោក សម រង្ស៊ី កុំឲ្យវិលមកកម្ពុជាវិញនេះ គឺដើម្បីធានាសុវត្ថិភាពនៅតំបន់ព្រលានយន្តហោះ កុំឲ្យមានរឿងអាក្រក់កើតឡើង។ លោកបានលើកឡើងថា នៅពេល លោក សម រង្ស៊ី ជាន់ដីកម្ពុជាហើយរដ្ឋាភិបាលចាប់ខ្លួន នោះអាចមានមនុស្សច្រើនតវ៉ានាំច្របូកច្របល់ ហើយប៉ះពាល់ខូចខាតដល់ហេដ្ឋារចនាសម្ព័ន្ធព្រលានយន្តហោះដែលមានតម្លៃរាប់រយលានដុល្លារ។
សូមបញ្ជាក់ថា នៅក្នុងសេចក្ដីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ក៏បានរំឭកពីការធ្វើទុក្ខបុកម្នេញមកលើគណបក្សប្រឆាំងក្នុងរយៈពេល១២ខែចុងក្រោយនេះ ដោយមានការគំរាមកំហែងដោយពាក្យសម្ដី ការសម្ញែងកងកម្លាំងប្រដាប់អាវុធ ការធ្វើទុក្ខបុកម្នេញមកលើលោក កឹម សុខា អនុប្រធានគណបក្ស ការវាយដំអ្នកតំណាងរាស្ត្រ២នាក់ និងការចាប់ខ្លួនមន្ត្រីនិងសកម្មជនគណបក្សប្រឆាំងដោយមានទាំងអ្នកតំណាងរាស្ត្រ និងសមាជិកព្រឹទ្ធសភាដាក់ពន្ធនាគារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ