គណៈអចិន្ត្រៃយ៍រដ្ឋសភាអនុម័តវិធានការពិន័យលើក្រុមអ្នកតំណាងរាស្ត្រដែលអវត្តមាន
គណៈកម្មាធិការអចិន្ត្រៃយ៍នៃរដ្ឋសភានៅថ្ងៃទី២៦តុលានេះ បានអនុម័តវិធានការពិន័យលើក្រុមអ្នកតំណាងរាស្ត្ររូបណាដែលអវត្តមាន។ វិធានការពិន័យដែលទើបត្រូវបានអនុម័តនេះ គឺបន្ទាប់ពីក្រុមអ្នកតំណាងរាស្ត្រគណបក្សសង្គ្រោះជាតិបានធ្វើពហិការមិនចូលរួមប្រជុំសភាពេញអង្គនាពេលកន្លងមក។ សម្រាប់តំណាងរាស្រ្តមកពីគណបក្សប្រជាជនកម្ពុជា វិធានការពិន័យនេះថា វាជាជំហានដ៏ល្អក្នុងការជំរុញឲ្យតំណាងរាស្ត្រទាំងអស់គោរពកាតាព្វកិច្ចរបស់ខ្លួន ប៉ុន្តែសម្រាប់តំណាងរាស្រ្តមកពីគណបក្សសង្គ្រោះជាតិ មិនគាំទ្រឲ្យមានវិធានការពិន័យនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
វិធានការពិន័យដែលគេហៅថា សេចក្តីព្រាងសេចក្តីសម្រេច ស្តីពី ការអនុវត្តវិន័យចំពោះតំណាងរាស្ត្រ ត្រូវបានគណៈកម្មាធិការអចិន្ត្រៃយ៍នៃរដ្ឋសភាអនុម័តដោយសំលេង៨លើ១២ បើទោះបីជាមានការប្រឆាំងពីភាគីគណបក្សសង្គ្រោះជាតិក៏ដោយ។
សម្រាប់គណបក្សសង្គ្រោះជាតិ ការអនុម័តនូវវិធានការពិន័យនេះ មិនចាំបាច់នោះទេ ខណៈដែលរដ្ឋសភាទាំងមូលមានបទបញ្ជាផ្ទៃក្នុងដែលមានចែងពីវិធានការពិន័យទៅលើក្រុម ឬ តំណាងរាស្ត្ររូបណាដែលអវត្តមានដោយមិនសមហេតុសមផលទៅហើយនោះ។ សម្រាប់គណបក្សសង្គ្រោះជាតិ គួរមានត្រឹម តែក្រមសិលធម៌គឺគ្រប់គ្រាន់ហើយ។ នេះបើតាមការបញ្ជាក់ពីលោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិ។
គួរជំរាបជូនថា សេចក្តីព្រាងសេចក្តីសម្រេច ស្តីពី ការអនុវត្តវិន័យចំពោះតំណាងរាស្ត្រ ដែលស្នើឡើងដោយគណៈកម្មការនីតិកម្ម និងយុត្តិធម៌ របស់លោក ប៉ែន បញ្ញា បានធ្វើឡើងបន្ទាប់ពីក្រុមអ្នកតំណាងរាស្ត្រគណបក្សសង្គ្រោះជាតិ ដែលតំណាងឲ្យមតិភាគតិច បានធ្វើពហិការមិនចូលរួមប្រជុំសភាជាបន្តបន្ទាប់ ចាប់តាំងពីទំនាក់ទំនងរវាងគណបក្សទាំងពីរបានធ្លាក់ចុះ។
ប៉ុន្តែលោក ឈាង វុន អ្នកនាំំពាក្យគណបក្សប្រជាជនកម្ពុជាតំណាងឲ្យមតិភាគច្រើន បានចាត់ទុកសេចក្តីសម្រេចនេះថា វាជាជំហានដ៏ល្អក្នុងការជំរុញឲ្យតំណាងរាស្ត្រទាំងអស់គោរពកាតព្វកិច្ចរបស់ខ្លួន។ លោកបានសង្កត់ធ្ងន់ថា សូមកុំឲ្យគ្រប់គ្នាគិតថា សេចក្តីសម្រេចនេះ គឺជាការដាក់សម្ពាធតែទៅលើគណបក្សប្រឆាំង ព្រោះវិធានការនេះ នឹងអនុវត្តចំពោះអ្នកតំណាងរាស្ត្រទាំង១២៣រូប។ វិធានការពិន័យដែលអាចមានការកាត់ប្រាក់ខែរបស់អ្នកតំណាងរាស្ត្រនោះ នឹងអនុវត្តចាប់ពីថ្ងៃនេះតទៅ តែនឹងមិនអនុវត្តរឿងរ៉ាវពីអតីតកាលនោះទេ។
សម្រាប់គណបក្សប្រឆាំង នេះគឺជាសម្ពាធថ្មីមួយទៀត មកលើក្រុមអ្នកតំណាងរាស្ត្ររបស់ខ្លួន។ តែយ៉ាងណាក៏ដោយ គណបក្សប្រឆាំងនៅតែអះអាងថា ក្រុមតំណាងរាស្ត្រមតិភាគតិចនៅតែបំពេញកាតព្វកិច្ចនិងតួនាទីជាតំណាងរាស្ត្ររបស់ខ្លួន តែបើគណបក្សប្រឆាំងយល់ថា គួរធ្វើពហិការ គណបក្សនឹងបន្តធ្វើដោយមិនបារម្ភពីការកាត់ប្រាក់ខែនោះឡើយ។
ក្រៅពីរបៀបវារៈស្តីពីការអនុវត្តវិន័យតំណាងរាស្ត្រនេះ កិច្ចប្រជុំគណៈអចិន្ត្រៃយ៍នៃរដ្ឋសភា ដឹកនាំដោយលោក ហេង សំរិន ក៏បានអនុម័តទាត់ចោលនូវសេចក្តីស្នើច្បាប់ ស្តីពីវិសោធនកម្មលើច្បាប់ចំនួន៣ស្តីពីតុលាការដែលស្នើឡើងដោយគណបក្សប្រឆាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ