ភាពចម្រូងចម្រាសជុំវិញការដឹកជំនួយមនុស្សធម៌រុស្ស៊ីទៅខាងកើតអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:៥៥
រដ្ឋាភិបាលរុស្ស៊ីបានបញ្ជាក់សាជាថ្មី នៅថ្ងៃពុធនេះថា ក្បួនរថយន្តដឹកជំនួយមនុស្សធម៌នឹងបន្តដំណើរទៅតំបន់ខាងកើតអ៊ុយក្រែន បើទោះបីជាមានការតវ៉ាជំទាស់ពីសំណាក់រដ្ឋាភិបាលអ៊ុយក្រែន និងការព្រមានពីសំណាក់ប្រទេសលោកខាងលិច។ អង្គការកាកបាទក្រហមអន្តរជាតិវិញបានបដិសេធថាខ្លួនមិនមានតួនាទីអ្វីនៅក្នុងការបញ្ជូនជំនួយមនុស្សធម៌នេះទេ។
ក្បួនរថយន្តដឹក “ជំនួយមនុស្សធម៌” របស់រុស្ស៊ី ជិត ៣០០រថយន្តនឹងត្រូវទៅដល់ព្រំដែនរុស្ស៊ី-អ៊ុយក្រែន នៅល្ងាចថ្ងៃពុធនេះ។ ក៏ប៉ុន្តែ អាជ្ញាធរអ៊ុយក្រែនបានបញ្ជាក់សាជាថ្មីថានឹងមិនអនុញ្ញាតឲ្យរថយន្តណាមួយឆ្លងកាត់ព្រំដែននោះទេ។
អ៊ុយក្រែន ក៏ដូចជា បណ្តាប្រទេសលោកខាងលិច រួមមាន សហរដ្ឋអាមេរិក បារាំង អង់គ្លេស អាល្លឺម៉ង់ រួមទាំងអង្គការអូតង់ និងសហភាពអឺរ៉ុប បានសម្តែងនូវក្តីព្រួយបារម្ភថា ការដឹក “ជំនួយមនុស្សធម៌” នេះ គ្រាន់តែជាលេសរបស់រុស្ស៊ីប៉ុណ្ណោះ ដើម្បីចូលធ្វើអន្តរាគមន៍ ជួយដល់ក្រុមឧទ្ទាមផ្តាច់ទឹកដី នៅប៉ែកខាងកើតអ៊ុយក្រែន។
អ្នកនាំពាក្យក្រសួងការបរទេសអាមេរិកបានប្រាប់អ្នកសារព័ត៌មានថា “រុស្ស៊ីមិនមានសិទ្ធិសម្រេចជាឯកតោភាគី ចូលទៅក្នុងទឹកដីរបស់អ៊ុយក្រែននោះទេ ទោះបីជាក្នុងរូបភាពជាបេសកកម្មមនុស្សធម៌ ឬក្នុងលេសណាផ្សេងទៀតក៏ដោយ ប្រសិនបើគ្មានការអនុញ្ញាតពីរដ្ឋាភិបាលទីក្រុងគៀវ”។
រដ្ឋាភិបាលអ៊ុយក្រែនបានទាមទារឲ្យរុស្ស៊ីបញ្ឈប់ក្បួនរថយន្តដឹកជំនួយមនុស្សធម៌ នៅត្រឹមព្រំដែន រួចហើយប្រគល់ជំនួយទាំងអស់នេះទៅឲ្យអង្គការកាកបាទក្រហមអន្តរជាតិជាអ្នកទទួលបន្ទុកដឹកបន្តចូលទៅក្នុងទឹកដីរបស់អ៊ុយក្រែន។
ក៏ប៉ុន្តែ រដ្ឋាភិបាលរុស្ស៊ីនៅតែចចេសថា ក្បួនរថយន្តដឹកជំនួយនេះនឹងបន្តដំណើរចូលទៅដល់ប៉ែកខាងកើតអ៊ុយក្រែន ហើយទាមទារឲ្យមានកិច្ចសហប្រតិបត្តិការពីសំណាក់រដ្ឋាភិបាលទីក្រុងគៀវ នៅក្នុងបេសកកម្ម “មនុស្សធម៌” នេះ។
គួរបញ្ជក់ថា នៅក្នុងកិច្ចសន្ទនាតាមទូរស័ព្ទ កាលពីលោកវ៉្លាឌីមៀរ ពូទីន ប្រធានាធិបតីរុស្ស៊ីបានប្រាប់ទៅលោក José Manuel Barros ប្រធានគណៈកម្មការអឺរ៉ុបថា រុស្ស៊ីដឹកជំនួយមនុស្សធម៌ទៅខាងកើតអ៊ុយក្រែននៅពេលនេះ ដោយមានការឯកភាពពីសំណាក់អង្គការកាកបាទក្រហមអន្តរជាតិ (CICR)។ ក៏ប៉ុន្តែ អ្នកនាំពាក្យ CICR នៅទីស្នាក់ការកណ្តាលនៅទីក្រុងហ្សឺណែវ (ស្វីស) បានបដិសេធថា CICR មិនបានផ្តល់ភ្លើងខៀវណាមួយចំពោះប្រតិបត្តិការ “មនុស្សធម៌” របស់រុស្ស៊ីនេះទេ។
អង្គការកាកបាទក្រហមអន្តរជាតិទទួលស្គាល់ថាខ្លួនពិតជាមានការទាក់ទងគ្នាជាមួយអាជ្ញាធររុស្ស៊ីមែនប៉ុន្មានថ្ងៃកន្លងទៅនេះ ដើម្បីជជែកពីរឿងបញ្ជូនជំនួយមនុស្សធម៌ទៅអ៊ុយក្រែន ក៏ប៉ុន្តែ ការជជែកគ្នានេះមិនទាន់ឈានដល់ការឯកភាពគ្នាណាមួយនៅឡើយទេ ពីព្រោះ កាកបាទក្រហមមិនមានព័ត៌មានលម្អិតអំពីជំនួយមនុស្សធម៌របស់រុស្ស៊ីនេះ។
កាលពីថ្ងៃអង្គារ អ្នកនាំពាក្យអង្គការកាកបាទក្រហមអន្តរជាតិប្រចាំប្រទេសបារាំង បានបញ្ជាក់ប្រាប់វិទ្យុបារាំងអន្តរជាតិថា បើទោះបីជាទង់ជាតិកាកបាទក្រហមត្រូវបានគេដោតនៅលើរថយន្តដឹកជំនួយមនុស្សធម៌របស់រុស្ស៊ី ក៏ប៉ុន្តែ “កាកបាទក្រហមមិនមានតួនាទីអ្វីទាំងអស់ នៅក្នុងដំណើរការដឹកជញ្ជូនមនុស្សធម៌នេះ”។ អ្នកនាំពាក្យរូបនេះក៏បានបញ្ជាក់ផងដែរថា ស្ថានភាពនៅខាងកើតអ៊ុយក្រែននៅពេលបច្ចុប្បន្ននេះ ពិតជាតម្រូវឲ្យមានការបញ្ជូនជំនួយមនុស្សធម៌ចូលទៅជួយជនស៊ីវិលមែន ហើយថា កាកបាទក្រហមត្រៀមខ្លួនសហការក្នុងការដឹកជញ្ជូនជំនួយមនុស្សធម៌នេះ ប្រសិនបើតួនាទីរបស់កាកបាទក្រហមត្រូវបានកំណត់ឲ្យបានច្បាស់ជាមុនដោយភាគីជម្លោះ ដោយត្រូវប្រគល់ភារៈឲ្យបុគ្គលិករបស់កាកបាទក្រហមជាអ្នកទទួលបន្ទុកត្រួតពិនិត្យការដឹកជញ្ជូន និងចែកចាយជំនួយ ហើយសុវត្ថិភាពរបស់បុគ្គលិកកាកបាទក្រហម ដែលធ្វើការក្នុងការដឹកជញ្ជូន និងចែកចាយជំនួយនេះត្រូវបានធានាដោយភាគីជម្លោះ។
គួរបញ្ជាក់ផងដែរថា រដ្ឋាភិបាលអ៊ុយក្រែនធ្លាប់បានប្រកាសយល់ព្រមជាគោលការណ៍ ចំពោះបេសកកម្មបញ្ជូនជំនួយមនុស្សធម៌ ទៅកាន់តំបន់ខាងកើតអ៊ុយក្រែន ក៏ប៉ុន្តែ បានទាមទារថា បេសកកម្មនេះត្រូវតែធ្វើឡើងក្នុងលក្ខណៈទូលំទូលាយ ដោយមានការចូលរួមពីសំណាក់សហភាពអឺរ៉ុប និងសហរដ្ឋអាមេរិក និងស្ថិតក្រោមការចាត់ចែងរបស់អង្គការកាកបាទក្រហមអន្តរជាតិ ហើយថា មិនត្រូវឲ្យមានទាហាន ឬបុគ្គលិកយោធាណាមួយចូលរួមនៅក្នុងបេសកកម្មនេះទេ។
អង្គការកាកបាទក្រហមអន្តរជាតិក៏បានទាមទារដោយទទូចផងដែរថា ដើម្បីរក្សាឯករាជ្យ និងអព្យាក្រឹត ស្របទៅតាមច្បាប់អន្តរជាតិ បេសកកម្មដឹកជញ្ជូនជំនួយមនុស្សធម៌របស់កាកបាទក្រហមអន្តរជាតិ មិនត្រូវឲ្យមានការអមដំណើរពីសំណាក់កងកម្លាំងប្រដាប់អាវុធរបស់ភាគីដែលជាប់ពាក់ព័ន្ធក្នុងជម្លោះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ