ចិន៖« រដ្ឋាភិបាលនឹងការពារអធិបតេយ្យរបស់ខ្លួនដោយមិនឲ្យបាត់មួយសង់ទីម៉ែត្រទេ »
ចុះផ្សាយនៅថ្ងៃ៖
ស្តាប់ - ០៦:៣៥
នៅថ្ងៃសៅរិ៍ ទី៨ មីនានេះ លោករដ្ឋមន្រ្តីក្រសួងការបរទេសចិនវ៉ាង យី (Wang Yi) បានប្រកាសថា រដ្ឋាភិបាលនឹងចេញមុខការពារទឹកដីរបស់ខ្លួនដោយមិនឲ្យបាត់មួយសង់ទីម៉ែត្រឡើយ។ ទន្ទឹមគ្នានេះ និងដោយមិននិយាយបញ្ឆិតបញ្ឆៀង លោកប្រមុខការទូតចិនបាននិយាយចំឈ្មោះប្រទេសជប៉ុនដោយបញ្ជាក់ថា ទីក្រុងប៉េកំាងក៏គ្មានហេតុផលណាមួយដើម្បីនិយាយសម្រុះសម្រួលជាមួយទីក្រុងតូក្យូពាក់ព័ន្ធនឹងបញ្ហាទឹកដី ឬមួយក៏រឿងរ៉ាវនៅក្នុងប្រវត្តិសាស្រ្តទេ។ ក្រៅពីនោះ លោកវ៉ាង យីក៏បានប្រកាសពីជំហររបស់ចិនពាក់ព័ន្ធនឹងបញ្ហាអន្តរជាតិមួយចំនួនដែរ។
លោកប្រមុខការទូតចិន វ៉ាង យីបានប្រកាសយ៉ាងដូច្នេះ នៅក្នុងសនិ្នសីតកាសែតមួយនាទីក្រុងប៉េកំាងក្នុងថ្ងៃសៅរិ៍នេះ។ នៅក្នុងសន្និសីតកាសែតនោះ លោកវ៉ាង យីបានបញ្ជាក់យ៉ាងច្បាស់ៗពីជំហររបស់ចិនដែលថា ទីក្រុងប៉េកំាងនឹងចាត់វិធានការគ្រប់បែបយ៉ាងទំាងអស់ដើម្បីការពារដែនដីរបស់ខ្លួនដោយមិនឲ្យបាត់មួយសង់ទីម៉្រែតឡើយ និងថា ចិនការពារដែនដីណាដែលជារបស់ចិនប៉ុណ្ណោះ ពោលគឺមិនទៅទាមទារយកដែនដីណាមួយដែលមិនមែនជារបស់ចិនទេ។
គួររម្លឹកជូនឡើងវិញថា សព្វថ្ងៃនេះ ចិនកំពុងមានជម្លោះដណ្តើមទីប្រជុំកោះនៅក្នុងសមុទ្រចិនជាមួយបណ្តាប្រទេសអាស៊ីមួយចំនួននៅក្នុងតំបន់។ ជាក់ស្តែង ទីប្រជុំកោះ Spratleys និង Paracels នៅក្នុងសមុទ្រចិនខាងត្បូងដែលប៉េកំាងកំពុងប្រឈមមុខនឹងកោះតៃវ៉ាន់ ព្រមទាំងប្រទេសអាស៊ានមួយចំនួន មានវៀតណាម ម៉ាឡេស៊ី ព្រុយណេ និងប្រទេសហ្វីលីពីន។ ចំណែកនៅក្នុងសមុទ្រចិនខាងកើតឯណោះ ក្រុងប៉េកំាងកំពុងមានជម្លោះជាមួយជប៉ុនជុំវិញទីប្រជុំកោះសេនកាគុដែលសព្វថ្ងៃស្ថិតនៅក្រោមអាណាព្យាបាលរបស់ជប៉ុន តែចិនកំពុងទាមទារថាជារបស់ខ្លួន។
នៅក្នុងជម្លោះទំាងពីរខាងលើ ជម្លោះរវាងចិន និងជប៉ុនត្រូវបានគេចាត់ទុកជាជម្លោះមួយតានតឹងខ្លំាងជាងគេ នោះបើទោះបីជាប្រទេសមហាអំណាចសេដ្ឋកិច្ចនៅអាស៊ីទំាងពីរនៅបន្តត្រូវការគ្នាទៅវិញ ទៅមកសឹងតែនៅលើគ្រប់វិស័យ ពិសេសវិស័យសេដ្ឋកិច្ច។ ដោយឡែក ក្រៅពីជម្លោះដំណ្តើមទីប្រជុំកោះសេនកាគុ ប៉េកំាង និងតូក្យូក៏កំពុងតឹងសរសែ ក ដាក់គ្នាជុំវិញរឿងប្រវត្តិសាស្រ្ត ពិសេសក្នុងសម័យសង្រ្គាមលោកលើកទី២ ដែលជប៉ុនបានចូលវាតទីក្នុងតំបន់អាស៊ី។ ជម្លោះដែនដី ក៏ដូចជាប្រវត្តិសាស្រ្តត្រូវបានលោកប្រមុខការទូតចិនវ៉ាង យីបានបញ្ជាក់ច្បាស់ៗថា ជាគោលការណ៍ ប៉េកំាងបដិសេធមិនសម្រុះសម្រួល និងថា គ្មានហេតុផលណាមួយដែលចិនត្រូវសម្របសម្រួលទេ។
ជប៉ុនក៏មិនសុខចិត្តចាញ់ច្រាបមហាអំណាចចិន
ការដែលលោកវ៉ាង យីបានចេញមុខប្រកាសឲ្យដឹងពីជំហរជាថ្មីរបស់ចិនពេលនេះ មកពីចិនខ្លួនឯងក៏បារម្ភពីជំហរដាច់ណាត់របស់ជប៉ុនដែលមិនសុខចិត្តចាញ់ច្រាបមហាអំណាចចិន។ ថ្មីៗនេះ លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានធ្លាប់បានប្រកាសព្រមានថា ការផ្ទុះសង្រ្គាមលោកលើកទី១ ក្នុងឆ្នំា ១៩១៤ ក៏បានផ្តើមចេញដំបូងពីជម្លោះដណ្តើមទឹកដីគ្នាដែរ។ តែលោកប្រមុខការទូតចិនវ៉ាង យីបានឆ្លើយពន្យល់បកវិញថា ឆ្នំា ២០១៤ មិនមែនជាឆ្នំា ១៩១៤ ហើយក៏មិនមែនជាឆ្នំា ១៨៩៤ ដែលជប៉ុន និងចិនបានផ្ទុះអាវុធដាក់គ្នាមួយប្រាវ និងដែលកាលណោះ ចិនបានទទួលបរាជ័យនៅចំពោះមុខជប៉ុន។
នេះជាការឆ្លើយតបមួយដែលលោកប្រមុខការទូតចិនចង់ព្រមានប្រាប់ទៅជប៉ុនវិញថា ចិនសម័យនេះ មិនមែនដូចចិនកាលពីជាង ១០០ឆ្នំាមុនទេ គឺខុសគ្នាដូចមេឃ និងដី។ តាមរយៈពាក្យសម្តីរបស់លោកប្រមុខការទូតចិនពេលនេះនំាឲ្យគេយល់បានថា ចិនមិនមែនត្រឹមតែកំពុងបង្ហាញសាច់ដុំដាក់ជប៉ុនប៉ុណ្ណោះទេ តែវាក៏ជាសារមួយដែលចិនចង់ផ្ញើទៅពិភពលោកទំាងមូលដែរ។ គឺនៅក្នុងហេតុផលនេះហើយបានជាជប៉ុនកំពុងពិចារណាលើកំណែទម្រង់រដ្ឋធម្មនុញ្ញសន្តិភាពនិយមរបស់ខ្លួនឲ្យបានមុនឆ្នំា ២០២០។
គួររម្លឹកជូនថា ជប៉ុនដែលបានចាញ់សង្រ្គាមលោកលើកទី២ ប្រឈមមុខនឹងអាមេរិកនោះ ត្រូវបានអាមេរិកចាប់បង្ខំឲ្យបង្កើតរដ្ឋធម្មនុញ្ញមួយដែលដាក់កំហិតឲ្យជប៉ុនមានកម្លាំងទ័ពសម្រាប់តែការពារខ្លួនប៉ុណ្ណោះ ពោលគឺមិនចូលរួមជាមួយកម្លំាងទ័ពអន្តរជាតិនៅក្នុងតំបន់ ឬមួយក៏នៅក្នុងពិភពលោកទេ។ ទង្វើរបស់រដ្ឋបាលអាមេរិកំាងជំនាន់នោះ គឺដើម្បីរារំាងជប៉ុនកុំឲ្យធ្វើការអភិវឌ្ឍន៍កម្លំាងយោធា ពិសេសទប់កុំឲ្យជប៉ុនវិលត្រឡប់ទៅរកនយោបាយយោធានិយម និងនយោបាយវាតទីនិយមដូចកាលពីមុនសម័យសង្រ្គាមលោកលើកទី២ ជាថ្មីទៀត។
ចិនមិនអនុញ្ញាតឲ្យមានអស្ថិរភាព ឬក៏ការផ្ទុះសង្រ្គាមក្នុងឧបទ្វីបកូរ៉េទេ
នៅថ្ងៃនេះ លោកប្រមុខការទូតចិនវ៉ាង យីបានកំណត់ចេញនូវខ្សែបន្ទាត់ក្រហមមួយដោយបញ្ជាក់ច្បាស់ៗថា ចិននឹងមិនអនុញ្ញាតឲ្យមានស្ថានភាពច្របូកច្របល់ ឬមួយក៏ការផ្ទុះសង្រ្គាមជាយថាហេតុណាមួយនៅក្នុងឧបទ្វីបកូរ៉េទេ។ ទន្ទឹមគ្នានេះ លោកវ៉ាង យីក៏បានអំពាវនាវដល់គ្រប់ភាគីពាក់ព័ន្ធទំាងអស់ឲ្យមានការអត់ធ្មត់ និងបានប្រកាសទទួលស្គាល់ថា សន្តិភាពពិតប្រាកដ និងយូរអង្វែងអាចនឹងកើតមានបាន លុះត្រាតែគ្មាននុយក្លេអ៊ែរនៅលើឧបទ្វីបកូរ៉េ។
គួរជម្រាបជូនថា ចិនត្រូវបានគេប្រៀបដូចជាឱពុកធម៌របស់កូរ៉េខាងជើង ដែលបានជួយជ្រោមជ្រែងទំាងនៅផ្នែកសេដ្ឋកិច្ច និងការទូត។ តំាងតែពីដើមមក ប៉េកំាងបានចេញមុខការពារព្យុងយ៉ាងមិនឲ្យមានការដាក់ទ័ណ្ឌកម្មធ្ងន់ធ្ងរពីសហគមន៍អន្តរជាតិទេ នោះបើទោះបីជាមានពេលខ្លះ ឱពុកធម៌ និងកូនធម៌បានតឹងសរសៃ ក ដាក់គ្នា ដោយសារតែកូនធម៌ក្បាលរឹងបន្តធ្វើការសាកល្បងនុយក្លេអ៊ែរជាបន្តបន្ទាប់ក្តី។ ជាថ្មីម្តងទៀត ចិនក៏បានអំពាវនាវឲ្យមានការចរចា ៦ភាគីស្តីពីសំណុំរឿងនុយក្លេអ៊ែរកូរ៉េខាងជើងឡើងវិញ។ ៦ភាគីនោះ មានកូរ៉េទំាងពីរ ជើង ត្បូង អាមេរិក ជប៉ុន ចិន និងរុស្ស៊ី។
ការអំពាវនាវឲ្យមានកិច្ចចរចា និងភាពអត់ធ្មត់ក៏ត្រូវបានលោកប្រមុខការទូតចិនផ្តោតលើវិបត្តិនៅក្នុងប្រទេសអ៊ុយក្រែនសព្វថ្ងៃដែរ ពិសេសអធិកររវាងក្រុមប្រទេសលោកខាងលិច និងប្រទេសរុស្ស៊ីពាក់ព័ន្ធនឹងតំបន់ស្វ័យតគ្រីមេរបស់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ