វិបត្តិប្រាក់បំណុល៖ តើចិនមានចំណែកទទួលខុសត្រូវដែរឬទេ?
ចុះផ្សាយនៅថ្ងៃ៖
ស្តាប់ - ០៥:២៣
កាលពីថ្ងៃសុក្រ ១២ សីហា ២០១១នេះ រដ្ឋមន្រ្តីក្រសួងពាណិជ្ជកម្មចិនបានជំរុញឲ្យអឺរ៉ុប និងអាមេរិកចាត់វិធានការប្រកបដោយការទទួលខុសត្រូវ ដើម្បីគ្រប់គ្រងប្រាក់បំណុលរបស់ខ្លួន។ យើងសង្កេតឃើញថា ចាប់តាំងពីមានផ្ទុះវិបត្តិប្រាក់បំណុលមក ចិនបានដំឡើងសំឡេងដាក់លោកខាងលិច ដោយស្តីបន្ទោសផង ហើយបានជំរុញឲ្យមេដឹកនាំលោកខាងលិចមានការទទួលខុសត្រូវផង។ តើក្នុងវិបត្តិប្រាក់បំណុលនេះ ចិនខ្លួនឯងពិតជាមិនមានចំណែកទទួលខុសត្រូវអ្វីសោះឬ?
នៅក្នុងអំឡុងជំនួបថ្នាក់រដ្ឋមន្រ្តីអាស៊ាន នៅប្រទេសឥណ្ឌូណេស៊ី កាលពីថ្ងៃសុក្រ ម្សិលមិញនេះ រដ្ឋមន្រ្តីក្រសួងពាណិជ្ជកម្មចិនបានលើកឡើងអំពីកង្វល់ជុំវិញវិបត្តិប្រាក់បំណុលរបស់លោកខាងលិច ហើយបានជំរុញឲ្យសហភាពអឺរ៉ុប និងអាមេរិកចាត់វិធានការ ដើម្បីគ្រប់គ្រងប្រាក់បំណុលរបស់ខ្លួន ប្រកបដោយការទទួលខុសត្រូវ។ ចាប់តាំងពីផ្ទុះវិបត្តិប្រាក់បំណុលមក នេះមិនមែនជាលើកទីមួយទេ ដែលចិនដំឡើងសំឡេងដាក់លោកខាងលិច។ កន្លងមក ចិនក៏ធ្លាប់បានស្តីបន្ទោសអ្នកនយោបាយអាមេរិកដែរ នៅពេលដែលសភាអាមេរិកជាប់គាំងក្នុងការអនុម័តច្បាប់ទាក់ទងនឹងប្រាក់បំណុល។
បើយើងមើលអំពីឥរិយាបថរបស់អ្នកនយោបាយអាមេរិក និងអឺរ៉ុប ក្នុងការដោះស្រាយវិបត្តិប្រាក់បំណុលនៅពេលនេះ ការស្តីបន្ទោសរបស់ចិនក៏ជារឿងសមហេតុផលដែរ។
យើងឃើញស្រាប់ហើយថា នៅពេលវិបត្តិបំណុលទើបតែផ្ទុះឡើង នៅត្រឹមតែប្រទេសក្រិកមួយ មេដឹកនាំនៅអឺរ៉ុបមិនបានខ្នះខ្នែងរកវិធីដោះស្រាយឲ្យបានស្រាចបាច់នោះទេ គឺរវល់តែខ្វែងគំនិតគ្នា បណ្តោយឲ្យបញ្ហារាលដាលទៅដល់ប្រទេសផ្សេងទៀត ជាពិសេស ទៅដល់ប្រទេសធំៗ ដូចជា អ៊ីតាលី និងអេស្ប៉ាញ។
នៅសហរដ្ឋអាមេរិកវិញ សមាជិកសភាមកពីគណបក្សប្រជាធិបតេយ្យ និងគណបក្សសាធារណរដ្ឋបានយកមនោគមន៍វិជ្ជាបក្សជាធំ បង្កជាជម្លោះនយោបាយ ធ្វើឲ្យអាមេរិកហៀបតែនឹងក្ស័យធន ដោយមិនគិតគូរពីម្ចាស់បំណុល និងពីបញ្ហាសេដ្ឋកិច្ច។
ចិន ដែលជាម្ចាស់បំណុលដ៏ធំបំផុតរបស់អាមេរិក ពិតជាមានសិទ្ធិគ្រប់គ្រាន់ ក្នុងការស្តីបន្ទោសឥរិយាបថខ្វះការទទួលខុសត្រូវនេះ។ ក៏ប៉ុន្តែ និយាយបែបនេះ មិនមានន័យថា ចិនមិនមានចំណែកទទួលខុសត្រូវអ្វីសោះ ក្នុងវិបត្តិនេះនោះទេ។ បើនិយាយទៅដល់ឫសគល់នៃបញ្ហា នយោបាយរូបិយវត្ថុរបស់ចិនក៏មានចំណែកទទួលខុសត្រូវក្នុងវិបត្តិបំណុលនៅពេលនេះដែរ។
អាជ្ញាធរចិនតែងតែលូកដៃចូលធ្វើអន្តរាគមន៍ក្នុងទីផ្សារប្តូរប្រាក់ ដើម្បីទប់លុយយ័នឲ្យនៅទាបធៀបនឹងលុយដុល្លារ ឬលុយអឺរ៉ូ ដើម្បីងាយស្រួលនាំទំនិញចេញទៅលក់នៅបរទេស។ តម្លៃពលកម្មនៅចិនក៏ថោកស្រាប់ផង ហើយបន្ថែមលុយចិនក៏ថោកទៀត វាធ្វើឲ្យការផលិតទំនិញនៅចិនមានតម្លៃកាន់តែថោកធៀបនឹងទំនិញនៅអាមេរិក និងអឺរ៉ុប។ សូម្បីតែក្រុមហ៊ុនធំៗខ្លះ របស់អាមេរិក និងអឺរ៉ុបក៏មកបង្កើតរោងចក្រផលិតទំនិញនៅចិនដែរ។ ជាលទ្ធផល កំណើនសេដ្ឋកិច្ចនៅអាមេរិក និងអឺរ៉ុប មានអត្រាទាបបំផុត ពិបាកក្នុងការងើបចេញពីវិបត្តិសេដ្ឋកិច្ច។ ចំណែកចិនវិញបានងើបចេញពីវិបត្តិសេដ្ឋកិច្ចបានលឿន រហូតបង្កជាបញ្ហាអតិផរណា ដោយសារតែសេដ្ឋកិច្ចមានកំណើនខ្ពស់ពេក។
យុទ្ធសាស្រ្តរបស់ចិននេះ គឺជាការប្រកួតប្រជែងដោយមិនស្មើភាព ពីព្រោះថា ចិនប្រកាន់របបដឹកនាំបែបកុម្មុយនិស្ត ដូច្នេះ រដ្ឋាភិបាលចិនមានសិទ្ធិអំណាចគ្រប់គ្រងទីផ្សារប្តូរប្រាក់បានតាមចិត្ត។ ចំណែកនៅអាមេរិក និងអឺរ៉ុបវិញ ដែលជាប្រទេសប្រជាធិបតេយ្យ រដ្ឋាភិបាលមិនអាចគ្រប់គ្រងទីផ្សារប្តូរប្រាក់បានតាមចិត្ត ដូចរដ្ឋាភិបាលចិននោះទេ។ ដើម្បីជំរុញកំណើនសេដ្ឋកិច្ចឲ្យងើបចេញពីវិបត្តិ អាមេរិក និងអឺរ៉ុប មានតែបង្កើនការចំណាយ ដែលជាហេតុធ្វើឲ្យបំណុលរដ្ឋត្រូវកើនឡើង។
ការណ៍ដែលចិនមានលុយដុល្លារច្រើនក្នុងដៃ ក៏ជាលទ្ធផលនៃយុទ្ធសាស្រ្តទប់លុយយ័នឲ្យនៅទាបនេះដែរ។ ដើម្បីទប់លុយយ័នឲ្យនៅទាបធៀបនឹងដុល្លារ ចិនប្រើវិធីប្រមូលទិញដុល្លារពីទីផ្សារ។ បើយោងតាមប្រធានវិទ្យាស្ថានសេដ្ឋកិច្ចអន្តរជាតិ (Peterson Institute for International Economics) អន្តរាគមន៍របស់អាជ្ញាធរចិនក្នុងទីផ្សារប្តូរប្រាក់ មានបរិមាណយ៉ាងតិច ១ពាន់លានដុល្លារ ក្នុងមួយថ្ងៃៗ ក្នុងរយៈពេលយ៉ាងតិច ៥ឆ្នាំចុងក្រោយនេះ។
ណាមួយដុល្លារដែលសល់ពីការនាំទំនិញចេញទៅលក់នៅក្រៅប្រទេសក៏មានច្រើនផង ហើយបន្ថែមដុល្លារដែលប្រមូលទិញពីទីផ្សារប្តូរប្រាក់ទៀត ជាលទ្ធផល ចិនសល់លុយដុល្លារយ៉ាងច្រើនសន្ធឹកសន្ធាប់ ដែលចិនយកទៅទិញមូលបត្របំណុលរបស់រដ្ឋាភិបាលអាមេរិក។
និយាយជារួម ឫសគល់នៃវិបត្តិសេដ្ឋកិច្ចពិភពលោកពេលនេះ កើតចេញពីប្រព័ន្ធនៃសេដ្ឋកិច្ចពិភពលោក ដែលជាបញ្ហាអូសបន្លាយពេលជាយូរមកហើយ។ អាមេរិកប្រកាន់យករបៀបរស់នៅហ៊ឺហាហួសពីសមត្ថភាព ដោយចាយច្រើនជាងលុយដែលរកបាន ជាហេតុធ្វើឲ្យជំពាក់បំណុលគេវ័ណ្ឌ ក។ អឺរ៉ុបមានប្រព័ន្ធសេដ្ឋកិច្ចដ៏ចម្លែកមួយដែលបំបែកនយោបាយម៉ាក្រូសេដ្ឋកិច្ចជាពីរដាច់ពីគ្នា គឺនយោបាយរូបិយវត្ថុ និងនយោបាយថវិកា (ចាយលុយរួមគ្នាតែមួយ ក៏ប៉ុន្តែ មាននយោបាយថវិកាខុសៗគ្នា ទៅតាមប្រទេសជាសមាជិកនីមួយៗ)។ នៅអាស៊ីជាពិសេស ចិនមានកំណើនសេដ្ឋកិច្ចខ្ពស់ ក៏ប៉ុន្តែ យុទ្ធសាស្រ្តកំណើនសេដ្ឋកិច្ចផ្តោតលើការទប់រូបិយប័ណ្ណជាតិឲ្យនៅទាប ដែលជាការប្រកួតប្រជែងដោយមិនស្មើភាព។ តាមរយៈយុទ្ធសាស្រ្តនេះ ចិនទទួលបានផលប្រយោជន៍ខ្លួនឯង តែបង្កបញ្ហាដល់ប្រទេសជាដៃគូពាណិជ្ជកម្ម។ ប៉ុន្តែ នៅពេលប្រទេសដៃគូជួបបញ្ហា វិបត្តិសេដ្ឋកិច្ចអាចនឹងរាលដាលមកដល់ចិនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ