កាត់បន្ថយការស្លាប់ដោយចរាចរណ៍ អាស្រ័យលើឆន្ទៈអ្នកអនុវត្តច្បាប់ និងអ្នកគោរពច្បាប់
ចុះផ្សាយនៅថ្ងៃ៖
ស្តាប់ - ០៥:១៣
នៅដំណាច់ឆ្នាំ២០១៥នេះ គេសង្ឃឹមថាគ្រោះថ្នាក់ចរាចរណ៍នៅកម្ពុជា ដែលមានវិសាលភាពធំធេងនឹងរួមមកតូចវិញ ប្រសិនបើប្រជាពលរដ្ឋខ្មែរមួយចំនួនដូរទំលាប់ និងឥរិយាបទអាក្រក់ ក្នុងការបើកបរចោល បែរទៅរកការគោរពច្បាប់។ ដូចគ្នានេះដែរ អាជ្ញាធរមានសមត្ថកិច្ច ដែលអនុវត្តច្បាប់ ត្រូវតែម៉ឺងម៉ាត់ក្នុងការផាកពិន័យនិងមិនពាក់ព័ន្ធអំពើពុករលួយ។ ចំណុចទាំងអស់នេះត្រូវបានចាត់ទុកថាជាប្រសិទ្ធភាពក្នុងការកាត់បន្ថយការស្លាប់និងរបួសតាមដងផ្លូវ។
ថ្ងៃទី០១ ខែ០១ ឆ្នាំ២០១៦ នៅមិនឆ្ងាយប៉ុន្មានទេ ធ្មេចបើកៗនឹងដល់ហើយ ប៉ុន្តែកែវភ្នែកដែលស្រវាំង ដោយសារឈាមក្រាលលើដងផ្លូវនៅឆ្នាំចាស់ នឹងភ្លឺឡើងវិញនៅឆ្នាំថ្មី ហើយសង្ឃឹមថានឹងមើលមិនឃើញមនុស្សនៅបន្តស្លាប់ដោយសារគ្រោះថ្នាក់ចរាចរណ៍ច្រើននាក់ទៀតទេក្នុងមួយថ្ងៃៗ ខណៈដែលការអនុវត្តច្បាប់ចរាចរណ៍នឹងត្រូវបានអះអាងថារឹតបន្តឹងមែនទែនហើយនៅពេលនោះ?
តាមការជូនដំណឹងរបស់មេប៉ូលិសជាតិលោកនេត សាវឿន កាលពីពេលថ្មីៗនេះ មន្ត្រីនគរបាលចរាចរណ៍ត្រូវបានប្រាប់ឲ្យប្រុងប្រៀបរៀបចំខ្លួនលោកចូលទៅក្នុងរបត់ថ្មីមួយក្នុងការអនុវត្ត និងពង្រឹង ច្បាប់ចរាចរណ៍ឲ្យបានតឹងតែងចាប់ពីថ្ងៃ០១ មករា ឆ្នាំ២០១៦តទៅ។ យុទ្ធនាការរឹតបន្តឹងនោះរួមមានការត្រួតពិនិត្យព្រមៗគ្នានៅគ្រប់ទីកន្លែងទូទាំងប្រទេសទាំងនៅលើទ្រូងផ្លូវ ចំណតយានយន្ត កំពង់ផែ កំពង់ចំលង សាលាបង្រៀនបើកបរយានដ្ឋានជួសជុលកែច្នៃជាដើម។
ហើយចំណុចដែលត្រូវកត់សម្គាល់នោះនឹងត្រូវតែផាកពិន័យឲ្យបានម៉ឺងម៉ាត់នោះ គឺករណីបើកបរដោយគ្មានប័ណ្ណបើកបរ បើកបរលើសល្បឿនកំណត់ មិនគោរពផ្លាកចរាចរណ៍ បើកបរក្រោមឥទ្ធិពលនៃជាតិស្រវឹង មិនពាក់មួក ខ្សែក្រវ៉ាត់ ការផ្ទុកទំនិញសំពីងសំពោង យានយន្តមិនគ្រប់លក្ខណៈបច្ចេកទេស។ល។និង។ល។
ជាការកត់សម្គាល់នៅថ្ងៃ០១ មករា ឆ្នាំ២០១៦ គឺជាឱកាសចុងក្រោយហើយនៃប្រទេសកម្ពុជាដែលអាជ្ញាធរមានសមត្ថកិច្ចត្រូវប្រឹងប្រែងនាំមកនូវភាពសុខដុមរម្យនាតាមដងផ្លូវជូនប្រជាពលរដ្ឋ បន្ទាប់ពីការស្លាប់ដោយសារចរាចរណ៍នៅកម្ពុជាបានក្លាយទៅជាការស្លាប់ដ៏ច្រើនបំផុតលើសសម័យសង្គ្រាមទៅទៀត។ ការដែលគិតថាវាជាឱកាសចុងក្រោយលើបញ្ហាចរាចរណ៍នោះ ក៏ដោយសារប្រទេសកម្ពុជាបានសាកល្បងអនុវត្តការរឹតបន្តឹងច្បាប់ចរាចរណ៍នេះជាច្រើនដងហើយ តែមិនដែលបានទទួលជោគជ័យនោះទេ។ ការដែលមិនមានជោគជ័យនេះជាហេតុធ្វើឲ្យចំនួនអ្នកស្លាប់ដោយសារចរាចរណ៍មានការកើនឡើងមិនថមថយក្នុងរង្វង់ជាមធ្យមពី៥ទៅ៦នាក់ក្នុងមួយថ្ងៃ។
មែនហើយ ប្រជាជនខ្មែរភាគច្រើនដែលធ្លាប់តែប្រើប្រាស់ផ្លូវ ឬធ្វើអ្វីៗទៅតាមទំលាប់នោះ មិនសូវខ្វល់ពីច្បាប់ទេ។ ឥរិយាបទបែបនេះ គឺជាកំហុសឆ្គងដ៏ធំបំផុតរបស់មនុស្សខ្មែរ នៅពេលដែលពលរដ្ឋដទៃឈានទៅដល់ការប្រើប្រាស់បច្ចេកវិទ្យាទំនើបអស់ទៅហើយ។ កំហុសត្រង់ថាទំលាប់អាក្រក់វាឈានទៅដល់ការបាត់បង់ជីវិតដ៏ច្រើនសន្ធឹកសន្ធាប់ ដោយសារចរាចរណ៍ ដែលជារឿងអាម៉ាស់មួយសម្រាប់ប្រជាជននឹងប្រទេសដែលមិនមានលទ្ធភាពកែលម្អរស្ថានភាពអាក្រក់បាន បើទោះថាជាប្រទេសកំពុងអភិវឌ្ឍន៍មួយនេះមានសន្តិភាពយូរឆ្នាំមកហើយ។
ទាក់ទងគ្នានេះដែរ អាជ្ញាធរមានសមត្ថកិច្ចទទួលបន្ទុកចរាចរណ៍ វប្បធម៌អន្តរាគមន៍របស់សមត្ថកិច្ចឯទៀតលើរឿងចរាចរណ៍ កន្លងមកបានក្លាយជាកម្មវត្ថុនៃការរុញច្រានឲ្យប្រជាជនព្រងើយកន្តើយ និងមិនយកចិត្តទុកដាក់ពីការគោរពច្បាប់។ មិនគោរពដោយសារប៉ូលិសចរាចរណ៍នៅមានភាពមិនច្បាស់លាស់ក្នុងការផាកពិន័យ ដោយកន្លែងខ្លះប៉ូលិសចរាចរណ៍នៅតែបន្តយកលុយពីម្ចាស់មធ្យោបាយដឹកជញ្ជូនល្មើសច្បាប់ ក្រោមរូបភាពប្រើប្រាស់ជនស៊ីវិល បើទោះណាជាចំណូលពីការផាកពិន័យស្របច្បាប់ត្រូវបានចែករំលែកជាង៩០%ទៅឲ្យប៉ូលិសក៏ដោយ។
តាមន័យសត្យានុម័តការមិនគោរពច្បាប់ចរាចរណ៍របស់ប្រជាពលរដ្ឋមួយចំនួនកន្លងមក ក្រៅពីទំលាប់និងឥរិយាបទ ដែលពិបាកកែ គឺមកពីមន្ត្រីអនុវត្តច្បាប់ដូចជាប៉ូលិសចរាចរណ៍ជាដើមមានភាពធូរលុង។
ដូច្នេះសម្រាប់ការតាំងចិត្តនៅឆ្នាំថ្មីនេះថានឹងធ្វើឲ្យមានការប្រែប្រួលលើការគោរពច្បាប់ចរាចរណ៍នោះ គឺជាការពឹងពាក់ទាំងស្រុងទៅលើប៉ូលិសចរាចរណ៍នេះឯង។ តែបើប៉ូលិស ចរាចរណ៍និងពលរដ្ឋខ្លះនៅតែប្រកាន់អកប្បកិរិយាដូចមុនទៀត នោះការអនុវត្តច្បាប់ចរាចរណ៍ នឹងមិនទទួលបានជោគជ័យទេ ហើយពលរដ្ឋខ្មែរនៅតែបន្តស្លាប់ដោយសារតែគ្រោះថ្នាក់ចរាចរណ៍ក្នុងមួយថ្ងៃៗនៅតែច្រើនដដែល។
ទោះយ៉ាងនេះក្តី មានការកត់សម្គាល់ថានៅក្នុងសម័យកាលមួយដែលវិទ្យាសាស្ត្រមានការវិវត្តទៅមុខ ទំលាប់អាក្រក់របស់ប្រជាជនខ្មែរមួយចំនួនក្នុងការបើកបរនឹងមិនអាចធំជាងច្បាប់ទៀតឡើយ ដរាបណាច្បាប់គឺជាច្បាប់ អ្នកអនុវត្តច្បាប់ត្រូវមានភាពប្រាកដប្រជា ដោយគ្មានការយោគយល់។
លើសពីនេះ រដ្ឋក៏មានភារកិច្ចចាំបាច់ដែរក្នុងការចូលរួមកាត់បន្ថយគ្រោះថ្នាក់ចរាចរណ៍ និងការគោរពច្បាប់ គឺធ្វើយ៉ាងណាកែសម្រួលស្ថានភាពផ្លូវថ្នល់នៅទូទាំងប្រទេស ដោយបំពាក់ ស្លាកសញ្ញា ចំណាំងផ្លាត និងគំនូសចរាចរណ៍ឲ្យគ្រប់លក្ខណៈបច្ចេកទេស។ ការចូលរួមព្រមៗគ្នា ពីសំណាក់អាជ្ញាធរមានសមត្ថកិច្ច និងប្រជាពលរដ្ឋឈរនៅលើគោលការណ៍ច្បាប់តែមួយ គេមានជំនឿថាការស្លាប់ និងរបួសដោយសារចរាចរណ៍ប្រាកដជាមានការកាត់បន្ថយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ