គណបក្សដែលគ្មានអាសនៈនៅសភាចំនួនបីហើយដែលបដិសេធការប្រជុំចងសម្ព័ន្ធ
គណបក្សប្រជាធិបតេយ្យមូលដ្ឋាននឹងមិនទៅប្រជុំជាមួយគណបក្សអំណាចខ្មែររបស់លោក សួន សេរីរដ្ឋា ដែលបានស្នើចងសម្ព័ន្ធគណបក្សដែលគ្មានអាសនៈនៅក្នុងរដ្ឋសភាកម្ពុជា។ ការប្រជុំដែលគ្រោងធ្វើនៅថ្ងៃទី០២ ខែតុលា ឆ្នាំ២០១៥នោះ ក៏ត្រូវបានគណបក្សសម្ព័ន្ធដើម្បីប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យ បដិសេធចោលដែរ។ មូលហេតុមួយចំនួនត្រូវបានគណបក្សទាំងនោះលើកឡើង។
ចុះផ្សាយនៅថ្ងៃ៖
ស្តាប់ - ០១:៣១
គឺ«ដើម្បីតស៊ូគោលនយោបាយរួម» ដែលគណបក្សអំណាចខ្មែរចង់ឱ្យគណបក្សនានាដែលគ្មានអាសនៈក្នុងរដ្ឋសភាកម្ពុជា ចង់សម្ព័ន្ធនឹងគ្នា។ ទោះបីជា«មិនមែនមានន័យថាហៅមកចងសម្ព័ន្ធធ្វើជាគណបក្សតែមួយ»ក្តី ក៏មកដល់ពេលនេះ គណបក្សបីហើយដែលថាមិនទៅប្រជុំ នៅដើមខែតុលា។
លោក សាម អ៊ីន អ្នកនាំពាក្យឱ្យគណបក្សប្រជាធិបតេយ្យមូលដ្ឋាន បានពន្យល់ នៅព្រឹកថ្ងៃពុធ ទី១៦ ខែកញ្ញា ឆ្នាំ២០១៥ ថា គណបក្សរបស់លោក«រវល់ច្រើនទាក់ទងនឹងកិច្ចការងារពង្រឹងស្ថាប័នរបស់គណបក្ស ហើយនិងកិច្ចការងារផ្តល់វគ្គបណ្ដុះបណ្ដាលផ្សេងៗដល់សមាជិកនៅតាមមូលដ្ឋាន»។
កាលពីដើមសប្ដាហ៍នេះ គណបក្សសំបុកឃ្មុំសង្គមប្រជាធិបតេយ្យ ដឹកនាំដោយលោក ម៉ម សូណង់ដូ និងគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា ក៏បានលើកមូលហេតុខ្លះនៃការបដិសេធសំណើរបស់លោក សួន សេរីរដ្ឋា ដែលជាប្រធានស្ថាបនិកគណបក្សអំណាចខ្មែរដែរ។
លោក ម៉ម សូណង់ បានប្រាប់ឱ្យដឹងនៅព្រឹកថ្ងៃអាទិត្យថា លោក«ប្រហែលជាអត់បានទៅចូលរួមទេ» ព្រោះលោក«មានកិច្ចការធ្វើផ្សេងទៀត» រីឯលោក ខឹម វាសនា វិញ បានអះអាងនៅល្ងាចថ្ងៃអាទិត្យដែរថា «អត់ទៅទេ» ដោយសារគណបក្សអំណាចខ្មែរសរសេរឈ្មោះគណបក្សលោកខុស ហើយថា«អ្នកនយោបាយខ្មែរចូលចិត្តបង្កើតព្រឹត្តិការណ៍»។
ដោយឡែក គណបក្សហ្វ៊ុនស៊ីនប៉ិច «កំពុងពិចារណា»សំណើរបស់លោក សួន សេរីរដ្ឋា។ នេះបើយោងតាមអ្នកនាំពាក្យ ញេប ប៊ុនជិន ដែលបានបញ្ជាក់ទៀតថា បច្ចុប្បន្នគណបក្សរាជានិយម កំពុងមមាញឹកពង្រឹងរចនាសម្ព័ន្ធនៅក្នុងខេត្តធំៗរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ