គណបក្សអំណាចខ្មែរអញ្ជើញគណបក្សដែលគ្មានអាសនៈក្នុងរដ្ឋសភា ចងសម្ព័ន្ធ
គឺ«ដើម្បីតស៊ូគោលនយោបាយរួម» ដែលគណបក្សអំណាចខ្មែររបស់លោក សួន សេរីរដ្ឋា ចង់ឱ្យគណបក្សនានាដែលគ្មានអាសនៈក្នុងរដ្ឋសភាកម្ពុជា ចងសម្ព័ន្ធនឹងគ្នា។ ប្រធានគណបក្សនេះ មានមូលហេតុមួយចំនួនដែលធ្វើឱ្យការចងសម្ព័ន្ធនេះ«ចាំបាច់សម្រាប់គ្រប់គណបក្សនយោបាយទាំងអស់ដែលគ្មានអាសនៈក្នុងរដ្ឋសភា»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក សួន សេរីរដ្ឋា ប្រធានគណបក្សអំណាចខ្មែរ ដែលគ្រោងត្រឡប់ពីបរទេសមកដល់អាកាសយានដ្ឋានភ្នំពេញ នៅថ្ងៃព្រហស្បតិ៍ ទី០១ ខែតុលា ឆ្នាំ២០១៥ តាមច្រកឥស្សរជនជាន់ខ្ពស់ នឹងចូលប្រជុំជាមួយប្រធានគណបក្សនយោបាយមួយចំនួន នៅថ្ងៃសុក្រ ទី០២ ខែតុលា ឆ្នាំដដែល។
គោលបំណងនៃការប្រជុំនេះគឺ«ចងសម្ព័ន្ធគណបក្សដែលគ្មានអាសនៈក្នុងរដ្ឋសភា ដើម្បីតស៊ូគោលនយោបាយរួម»។ នេះបើតាមលិខិតអញ្ជើញដែលប្រមុខបក្សនៅក្រៅរដ្ឋាភិបាលទើបបង្កើតថ្មីខាងលើ បានផ្សាយលើហ្វេសប៊ុកផ្ទាល់ខ្លួន កាលពីថ្ងៃទី១០ ខែកញ្ញា ឆ្នាំ២០១៥។ ប៉ុន្តែ ពីរថ្ងៃក្រោយមក លោក សួន សេរីរដ្ឋា បានបំភ្លឺបន្ថែមថា ការជជែកនោះ«មិនមែនមានន័យថាហៅមកចងសម្ព័ន្ធធ្វើជាគណបក្សតែមួយទេ»។
គោលនយោបាយដែលគណបក្សអំណាចខ្មែរបានចម្រាញ់ធ្វើជាមូលដ្ឋានសម្រាប់តស៊ូមតិរួមគ្នាជាមួយគណបក្សនានាដែលគ្មានអាសនៈនៅក្នុងរដ្ឋសភាកម្ពុជា មាន៥ចំណុច ក្នុងចំណោមនោះក៏មានដែរ៖ ១) ការទាមទារបង្កើតឲ្យបានគណៈកម្មាធិការជាតិរៀបចំការបោះឆ្នោតឯករាជ្យពិតប្រាកដ ២) ការទាមទារឲ្យពលរដ្ឋខ្មែរឯបរទេសបានបោះឆ្នោតនៅទីកន្លែងដែលពួកគេរស់នៅ និងធ្វើការ និង៣) ការទាមទារឲ្យមានច្បាប់កំណត់អាណត្តិបេក្ខជនអ្នកឈរឈ្មោះជានាយករដ្ឋមន្ត្រី ហើយនាយករដ្ឋមន្ត្រីត្រូវបោះឆ្នោតរើសផ្ទាល់ដោយពលរដ្ឋ។
មន្ត្រីគណបក្សអំណាចខ្មែរបានបញ្ជាក់នៅព្រឹកថ្ងៃអាទិត្យថា រហូតមកដល់ពេលនេះ គណបក្សអំណាចខ្មែរបានបញ្ជូនលិខិតអញ្ជើញទៅគណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យរួចហើយ។
ចំពោះរឿងនេះ លោក ម៉ម សូណង់ ដែលជាប្រធានគណបក្សសំបុកឃ្មុំសង្គមប្រជាធិបតេយ្យ បានប្រាប់ឱ្យដឹងនៅព្រឹកថ្ងៃអាទិត្យដែរថា លោកគាំទ្រការតវ៉ាដើម្បីឱ្យមានការបោះឆ្នោតដោយសេរី និងយុត្តិធម៌ ប៉ុន្តែថា«ប្រហែលជាអត់បានទៅចូលរួមទេ» ព្រោះលោក«មានកិច្ចការធ្វើផ្សេងទៀត»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ