សម្តេចក្រុមព្រះ នរោត្តម រណឫទ្ធិ សង្ឃឹមបាន២៦កៅអី ដោយសារគោលនយោបាយ៣ចំណុច
សម្ដេចក្រុមព្រះ នរោត្តម រណឫទ្ធិ សង្ឃឹមថា គណបក្សហ្វ៊ុនស៊ិនប៉ិច នឹងទទួលបានអាសនៈចំនួន២៦ នៅក្នុងការបោះឆ្នោតជាតិឆ្នាំ២០១៨។ សេចក្ដីសង្ឃឹមយ៉ាងដូច្នេះ ត្រូវសម្ដេចក្រុមព្រះបង្ហើបឱ្យដឹងកាលពីព្រឹកមិញ បន្ទាប់ពីព្រះអង្គបញ្ចប់ការបួងសួង នៅរមណីយដ្ឋានវត្តភ្នំ។ ដើម្បីសម្រេចបាន២៦កៅអីនាពេលខាងមុខនោះ សម្ដេចក្រុមព្រះ បានប្រកាសគោលនយោបាយ៣ចំណុចធំៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ដើម្បីសម្រេចបានក្តីរំពឹងនេះ សម្ដេចក្រុមព្រះ នរោត្តម រណឫទ្ធិ បានប្រកាសគោលនយោបាយ៣ចំណុចធំៗ រួមមាន ការលុបបំបាត់អំពើពុករលួយ ការបង្កើនការងារឱ្យយុវជនយុវនារី និងការកាត់បន្ថយភាពក្រីក្រ។
សម្ដេចក្រុមព្រះ នរោត្តម រណឫទ្ធិ ទ្រង់កត់សម្គាល់ថា «នៅអាស៊ី គ្មានប្រទេសណាមិនពុករលួយទេ តែកុំពុករលួយច្រើនពេក និងហួសហេតុពេក»។ បើតាមព្រះអង្គម្ចាស់ នរោត្តម រណឫទ្ធិ ដើម្បីបំបាត់បញ្ហាពុករលួយ គឺគេត្រូវដោះស្រាយបញ្ហាជីវភាពមន្ត្រីរាជជាមុនសិន។
ទន្ទឹមនឹងនេះ ព្រះប្រធានគណបក្សហ្វ៊ុនស៊ិនប៉ិច លើកឡើងទៀតថា ដោយសារតែខ្វះការងារក្នុងស្រុក ទើបពលករខ្មែរ ត្រូវចេញទៅរកការធ្វើនៅបរទេស។ ដូច្នេះ ការបង្កើនការងារធ្វើក្នុងប្រទេស គឺជាគោលនយោបាយគន្លឹះទី២នៃគណបក្សរបស់ទ្រង់។
លើពីនេះ សម្ដេចក្រុមព្រះ ទ្រង់ទតឃើញផងដែរថា នៅស្រុកខ្មែរ អ្នកមានចេះតែមានឡើង អ្នកក្រចេះតែក្រទៅ ហើយជំពាក់បំណុលគេជុំទិស ព្រមទាំងដាក់បញ្ចាំរបស់ទ្រព្យអស់គ្មានសល់ សូម្បីសត្វឥរិច្ឆាន។ ព្រះប្រធានគណបក្សរាជានិយមហ៊ុនស៊ិនប៉ិច បង្ហើបការសន្យាជាថ្មីទៀតថា បើគណបក្សរបស់ទ្រង់ឈ្នះឆ្នោត គឺលុបបំបាត់បំណុលរបស់ប្រជាពលរដ្ឋក្រីក្រទាំងអស់តែម្តង។
ទោះបីជាប្រកាសថាសង្ឃឹមបាន២៦កៅអីនៅឆ្នាំ២០១៨យ៉ាងណាក្តី តែបើតាមព្រះអង្គម្ចាស់ នរោត្តម រណឫទ្ធិ គណបក្សហ្វ៊ុនស៊ិនប៉ិច មិនសូវសង្ឃឹមថាបានសំឡេងគាំទ្រច្រើនពីខេត្តតូចៗនោះទេ ប៉ុន្តែព្រះអង្គ ជឿជាក់លើខេត្តធំ។ ខេត្តធំៗ ដែលសម្ដេចក្រុមព្រះអះអាងថា នៅតែគាំទ្រគណបក្សហ្វ៊ុនស៊ិនប៉ិច របស់ទ្រង់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ