រដ្ឋសភាផ្តល់ថវិកា៥០លានរៀលដល់គ្រួសារសពលោកប៉ែន សុវណ្ណ
រដ្ឋសភាកម្ពុជានឹងផ្តល់ថវិកា៥០លានរៀលសម្រាប់គ្រួសារសពលោកប៉ែន សុវណ្ណ ហើយនឹងរៀបចំពិធីបុណ្យសពលោកប៉ែន សុវណ្ណ ដោយសហការជាមួយគ្រួសារសព។ រដ្ឋសភាបានឲ្យដឹងទៀតថាគណៈកម្មការទាំងពីរ ដែលរៀបចំបុណ្យសពលោកប៉ែន សុវណ្ណ អាចប្រជុំគ្នាល្ងាចនេះ ដើម្បីរៀបចំពិធីឈាបនកិច្ច។
ចុះផ្សាយនៅថ្ងៃ៖
ស្តាប់ - ០១:៤៥
លោកឡេង ប៉េងឡុង អ្នកនាំពាក្យរដ្ឋសភាកម្ពុជាបានថ្លែងថារដ្ឋសភាបានចាត់តាំងគណៈកម្មការរៀបចំបុណ្យសពលោកប៉ែន សុវណ្ណរួចរាល់ហើយ ដែលមានលោកយ៉ែម បុញ្ញឫទ្ធិជាប្រធាន។ នៅរសៀលនេះ គណៈកម្មការរៀចបុណ្យសពលោកប៉ែន សុវណ្ណនឹងប្រជុំសមាជិករបស់ខ្លួន ដើម្បីរៀបចំពិធីឈាបនកិច្ច។
បើតាមលោកឡេង ប៉េងឡុងរដ្ឋសភាបានផ្តល់ថវិកាប្រមាណ៥០លានរៀលសម្រាប់រៀបចំបុណ្យសពលោកប៉ែនសុវណ្ណ ហើយក៏មានការរៀបចំពិធីផ្លូវការផ្សេងៗ ដោយមានការសហការជាមួយគ្រួសារសព ហើយគណៈកម្មការបុណ្យនឹងសម្រេចទៅតាមការចង់បានរបស់គ្រួសារសព។
បើតាមគម្រោងក្រៅផ្លូវការ សពរបស់លោកប៉ែន សុវណ្ណនឹងត្រូវហែមករាជធានីភ្នំពេញនៅព្រឹកថ្ងៃទី២ ខែវិច្ឆកា ខាងមុខនេះ ដើម្បីតម្កល់ទុកក្នុងវត្តថាន់ ហើយនៅថ្ងៃទី៦ ខែវិច្ឆកា សពរបស់លោកនឹងត្រូវបូជានៅមុខវត្តបុទុមរាជធានីភ្នំពេញ។
លោកម៉ៅ មុនីវណ្ណប្រាប់វិទ្យុបារាំងកាលពីថ្ងៃម្សិលមិញថា ការដង្ហែមករាជធានីភ្នំពេញ គឺដោយសារតែលោកប៉ែន សុវណ្ណជាតំណាងរាស្ត្រ និងជាអតីតនាយករដ្ឋមន្ត្រី កេរ្តិ៍ឈ្មោះ និងវីរភាព គាត់បានដក់ក្នុងដួងចិត្តកូនខ្មែរគ្រប់គ្នា និងដោយសារមានការសំណូមពរពីប្រជាពលរដ្ឋផងដែរ។
យ៉ាងណាមិញ លោកយ៉ែម បុញ្ញឫទ្ធិ បានឲ្យដឹងនៅថ្ងៃម្សិលមិញដែរថា មិនទាន់មានការព្រមព្រៀងគ្នានៅឡើយទេ ចំពោះការជ្រើសរើសទីតាំងវត្តណាមួយសម្រាប់តម្កល់ និងបូជាសពលោកប៉ែន សុវណ្ណ។ ប៉ុន្តែលោកយ៉ែម បុញ្ញឫទ្ធិបានលើកឡើងថាអាចនឹងមានវត្តផ្សេងៗ ដូចជាវត្តថាន់ វត្តចាស់ជាដើម។
សូមបញ្ជាក់ថាលោកប៉ែន សុវណ្ណ បានទទួលមរណភាពកាលពីថ្ងៃទី២៩ ខែតុលា ក្នុងជន្មាយុ៨០ឆ្នាំ ដោយរោគាពាធ ហើយសពរបស់លោកត្រូវបានតម្កល់ទុកនៅគេហដ្ឋានរបស់លោកនៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ។ លោកប៉ែន សុវណ្ណ គឺតំណាងរាស្ត្រមណ្ឌលកំពង់ស្ពឺ ឧត្តមទីប្រឹក្សាគណបក្សសង្គ្រោះជាតិ និងជាអតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ