ប្រមុខរដ្ឋាភិបាលខ្មែរស្នើឲ្យពិនិត្យឡើងវិញពីស្តង់ដារ និងនយោបាយប្រឆាំងភេរវកម្ម
លោកនាយករដ្ឋមន្ត្រី ហ៊ុន សែន បានអំពាវនាវឲ្យមេដឹកនាំសភានៃតំបន់អាស៊ី រួមចំណែកឲ្យរដ្ឋាភិបាលប្រទេសនានាពិនិត្យឡើងវិញពីនយោបាយប្រឆាំងភេរវកម្ម។ ការពោលដូច្នេះបានធ្វើឡើងខណៈដែល លោកចូលរួមនៅក្នុងមហាសន្និបាតសភាតំបន់អាស៊ីនៅថ្ងៃពុធនេះ ដែលមានកម្ពុជាជាម្ចាស់ផ្ទះ។ ក្រៅពីនេះលោកហ៊ុន សែន ក៏បាននិយាយដល់ការរីករាលដាលនៃបដិវត្តព័ណ៌ ដែលជាប្រធានបទក្តៅ និងស្តង់ដារប្រយុទ្ធប្រឆាំងនឹងភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
«សម្លេងលោក ហ៊ុន សែន »
គឺជាការលើកឡើងរបស់លោកនាយករដ្ឋមន្ត្រី ហ៊ុន សែន នៅក្នុងឱកាសនៃការបើក សន្និបាត សភាតំបន់អាស៊ីលើកទី៨ នាព្រឹកថ្ងៃទី៩ធ្នូនេះ នៅសណ្ឋាគារសុខាភ្នំពេញ ដែល កម្ពុជាធ្វើជាម្ចាស់ផ្ទះរៀបចំកិច្ចប្រជុំនេះ។
ក្រោមប្រធានបទ «ការជំរុញសន្តិភាព ការផ្សះផ្សា និងការសន្ទនាក្នុងតំបន់អាស៊ី» លោកនាយករដ្ឋមន្ត្រី ហ៊ុន សែន បានឆ្លៀតយកឱកាសនេះ លើកឡើងពីការប្រយុទ្ធប្រឆាំងភេរវកម្ម ដែលមានស្តង់ដារពីរ ការធ្វើបដិវត្តន៍ព័ណ៌នៅមជ្ឈឹមបូព៌ា ពីទុយនេស៊ី ដល់អេហ្ស៊ីប លីប៊ីយ៉េមែន និងនៅស៊ីរី កំពុងក្លាយជាប្រធានបទដ៏ក្តៅគគុក ទន្ទឹមនឹងការសម្លាប់ជារៀងរាល់ថ្ងៃពីសំណាក់ពួកអ៊ីស្ត្រាអែល ទៅលើប្រជាជនប៉ាឡេស្ទីន នៅតំបន់កាសា។
លោក ហ៊ុន សែន បានចោទសួរនៅពីមុខប្រមុខអង្គនីតិបញ្ញតិអាស៊ីនានាថា «តើពិភពលោក គួរមានស្តង់ដារតែមួយ ស្តង់ដារពីរ ឬក៏មានស្តង់ដារបី?» លោកថាគួរល្មមដល់ពេលដែលត្រូវដកហូតពិសោធន៍លើបញ្ហានេះ។
លើសពីនេះ លោកនាយករដ្ឋមន្ត្រី បានរំលឹកពីកិច្ចប្រជុំអាស៊ាន-អាមេរិក កាលពីឆ្នាំទៅនៅប្រទេសភូមា ដោយលោកបាននិយាយត្រង់ៗ និងចោទជាសំណួរទៅលើអគ្គលេខាធិការអង្គការសហប្រជាជាតិ លោក បាន គីមូន និងប្រធានាធិបតីអាមេរិក លោកបារ៉ាក់ អូបាម៉ា ដៃម្ខាងវ៉ៃអាសាធ និងដៃម្ខាងវ៉ៃ ISIS វាគ្រាន់តែជាគណិតវិទ្យា ១-១ ស្មើ ០ ប៉ុណ្ណោះ។ ជាមួយនឹងការលើកឡើងនេះ លោក ហ៊ុន សែន បន្លឺជាសំណួរបន្តថា «តើល្មមដល់ពេលពិនិត្យឡើងវិញនូវនយោបាយ ចំពោះរបបអាសាធឬទេ ខណៈដែលប្រទេសជាច្រើនមិនស្របជាមួយគ្នា?»
ជាមួយគ្នានេះ ប្រមុខរដ្ឋាភិបាលខ្មែរក៏បានរិះគន់ដល់ក្រុមភេរវកម្មគ្រប់ប្រភេទ ដែលបានធ្វើសកម្មភាពខុសៗគ្នា ដែលមានគោលដៅតែមួយ គឺការបំផ្លាញជីវិតមនុស្សដោយឥតរើសមុខ ក្នុងពេលកំលាំងប្រឆាំងភេរវកម្មកំពុងមានការបែកខ្ញែក។ លោកសង្ឃឹមថាស្ថាប័ននីតិបញ្ញតិនឹងអាចជួយរួមចំណែក ដើម្បីឲ្យប្រទេសនីមួយៗពិនិត្យឡើងវិញនូវនយោបាយប្រឆាំងភេរវកម្ម។ ដោយឡែកនៅកម្ពុជា ចំពោះមុខមេដឹកនាំសភាអាស៊ី លោកនាយករដ្ឋមន្ត្រី ហ៊ុន សែន បញ្ជាក់ថាបើទោះណាជាមិនមានពួករដ្ឋឥស្លាម ISIS ចូលមកដល់ ក៏ប៉ុន្តែកម្ពុជាមិនត្រូវភ្លេចខ្លួន គឺគេអាចវ៉ៃនៅប្រទេសដទៃក្នុងតំបន់ ក៏ប៉ុន្តែគេយកកម្ពុជាធ្វើជាតំបន់សុវត្ថិភាពក៏ថាបាន ដែលបញ្ហានេះចាំបាច់ត្រូវមានការប្រុងប្រយ័ត្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ