មិនបានកើតឡើងដូចការគ្រោងទុកនោះទេ មន្ត្រីគណបក្សកាន់អំណាចនិងគណបក្សប្រឆាំងមិនអាចរកឱកាសចរចាគ្នាដើម្បីដោះស្រាយទំនាស់នយោបាយបាននៅឡើយ។ ការអូសបន្លាយឬបណ្តែតបណ្តោយពេលវេលានេះបានទម្លាក់ទំនាស់នយោបាយខ្មែរទៅក្នុងភាពទាល់ច្រក។ ហើយភាពទាល់ច្រកនយោបាយបែបនេះផ្តល់ភាពចំណេញជាច្រើនដល់គណបក្សប្រជាជនកម្ពុជា។សូមស្តាប់បទវិភាគដោយគង់ សុឋានរិទ្ធ
ដំណោះស្រាយវិបត្តិនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិមើលទៅដូចជាបានធ្លាក់ដល់ចំណុចទាល់ច្រក នៅពេលដែលគណបក្សទាំងពីរបានបង្ហាញជំហរផ្ទុយគ្នាដូចមេឃនិងដី។ គណបក្សទាំងពីរគ្រោងនឹងជួបគ្នាដើម្បីដោះស្រាយភាពតានតឹងនយោបាយចុងក្រោយប៉ុន្តែត្រូវខកខានទៅវិញ។ ការខកខានដោយសារតែគណបក្សប្រជាជនកម្ពុជាឆ្លើយថារវល់ មិនមានពេលជួបគ្នា។
ហើយមួយវិញទៀតគណបក្សប្រជាជនកម្ពុជាបានបញ្ជាក់តាមរយៈអ្នកនាំពាក្យរបស់ខ្លួនថាការជួបគ្នាដើម្បីជជែកដោះស្រាយករណីលោកសម រង្ស៊ី ករណីដកដំណែងអនុប្រធានទី១នៃរដ្ឋសភារបស់លោកកឹម សុខា និងអំពើហិង្សាលើតំណាងរាស្ដ្របក្សប្រឆាំងផុតពីព្រំដែនរួមនៃគណបក្សទាំងពីរត្រូវជជែក។ ដ្បិតនេះជាសំណុំរឿងស្ថិតក្នុងដៃតុលាការ។ ហើយក៏មិនអាចប្រើប្រាស់យន្តការនៃវប្បធម៌សន្ទនាបានដែរ។
ប៉ុន្តែគណបក្សប្រឆាំងយល់ថាគួរតែបន្តវប្បធម៌សន្ទនាសម្រាប់ដោះស្រាយវិបត្តិខាងលើនេះ។ វប្បធម៌សន្ទនាគឺជាពាក្យគន្លឹះនយោបាយថ្មីដែលត្រូវបង្កើតឡើងតាមរយៈការចរចាទម្លាយភាពជាប់គាំងនយោបាយក្រោយពីការបោះឆ្នោតឆ្នាំ២០១៣។ ប៉ុន្តែវប្បធម៌នៃការជជែកគ្នា ឬសន្ទនាគ្នានៅលើតុនៅពេលនេះ លែងមានទៀតហើយ។ គណបក្សប្រជាជនកម្ពុជា និងគណបក្សសង្គ្រោះជាតិមើលមុខគ្នាលែងត្រង់ ហើយដំណើរនយោបាយដែលអូសទាញដោយគណបក្សទាំងពីរកាន់តែតានតឹងទៅៗមិនទាន់មានឃើញចំណុចធូរស្រាលនៅឡើយ។ ការខ្វែងគំនិតគ្នានេះហើយដែលធ្វើឲ្យដំណោះស្រាយនយោបាយធ្លាក់ក្នុងរណ្តៅទាល់ច្រក។
ប៉ុន្តែហេតុអ្វីបានជាចំណងនយោបាយនេះពិបាកដោះស្រាយ?
ទី១៖ ការទម្លាក់បន្ទុកលើតុលាការជាអ្នកដោះស្រាយសំណុំរឿងទាក់ទងនឹងមេដឹកនាំគណបក្សសង្គ្រោះជាតិនិងមន្ត្រីនយោបាយគណបក្សប្រឆាំងមួយចំនួនទៀតគឺជាផលចំណេញរបស់គណបក្សកាន់អំណាច។ផលចំណេញដោយសារតែបក្សប្រឆាំងនឹងស្ថិតនៅក្នុងភាពស្មុគស្មាញ ពិបាករៀបចំនយោបាយ ឬធ្វើកិច្ចការដោយមានការបែងចែក ពិបាកក្នុងការផ្ចង់គោលដៅ។ ម្យ៉ាងវិញទៀតការដោះស្រាយសម្រាប់មេបក្សប្រឆាំងរួចផុតពីនឹមតុលាការ និងសកម្មជននិងអ្នកនយោបាយប្រឆាំងរួចផុតពីការចោទប្រកាន់តាមផ្លូវច្បាប់គឺជាបន្ទុកធ្ងន់ធ្ងរមួយរបស់បក្សប្រឆាំង។ ជាពិសេសប្រសិនបើសំណុំរឿងទាំងនេះកាន់តែស៊ីពេលយូរសម្រាប់ដោះស្រាយនោះ មានន័យថាទម្ងន់ធ្លាក់លើគណបក្សប្រជែងអំណាចកាន់តែធំឡើងៗ។ គណបក្សកាន់អំណាចមានឱកាសអោបដៃមើលភាពឆ្លេឆ្លារបស់គណបក្សប្រឆាំង។ ដូច្នេះគណបក្សប្រជាជនកម្ពុជាត្រូវតែបណ្តោយស្ថានការណ៍បែបនេះទៅមុខទៀត។
ទី២ គណបក្សប្រឆាំងមិនមានកម្លាំងគ្រប់គ្រាន់សម្រាប់ទាញឬតថ្លៃជាមួយគណបក្សប្រជាជនកម្ពុជាដើម្បីឲ្យគណបក្សនេះបន្ទន់ឥរិយាបថសម្រាប់ការស្វែងរកដំណោះស្រាយនយោបាយ។ ពីព្រោះថាក្នុងពេលនេះគណបក្សប្រឆាំងកំពុងប្រឈមនឹងការដោះស្រាយបញ្ហាសំខាន់ៗចំនួនពីរក្នុងពេលតែមួយ។ នោះគឺការរៀបចំយុទ្ធសាស្ដ្រនយោបាយនិងការត្រៀមខ្លួនសម្រាប់ការបោះឆ្នោតខាងមុខ មិនយូរប៉ុន្មាននឹងការប្រមូលផ្តុំការគិតដើម្បីបើកផ្លូវឲ្យមេបក្សរបស់ខ្លួនមានឱកាសវិលត្រឡប់មកកាន់ប្រទេសកម្ពុជាវិញដោយសុវត្ថិភាពនិងការគិតគូដោះស្រាយសម្រាប់សកម្មជននិងអ្នកនយោបាយគណបក្សប្រឆាំងដើម្បីឲ្យពួកគេរួចផុតពីការចោទប្រកាន់តាមផ្លូវតុលាការ។ គណបក្សប្រឆាំងនឹងត្រូវធ្វើកិច្ចការសម្របសម្រួលនយោបាយនិងការទូតជាច្រើនទៀតដើម្បីដោះស្រាយបញ្ហាទាំងនេះ។
ដូច្នេះកិច្ចការពីរមុខនេះនឹងធ្វើឲ្យគណបក្សប្រឆាំងស្រវ៉េះស្រវ៉ះចាប់នេះផងនិងចាប់នោះផង។ នៅពេលដែលគណបក្សប្រឆាំងខ្សោយឥទ្ធិពល គណបក្សនេះមិនអាចទាញបង្វិលគណបក្សកាន់អំណាចឲ្យងាកមករកការចរចាសម្រួលស្ថានការណ៍នយោបាយបាននោះទេ។
សរុបមកវិញប្រសិនបើស្ថានការណ៍នយោបាយនៅទ្រឹងបែបនេះតទៅទៀតមិនខុសអ្វីពីការជាប់ផុងនៅក្នុងភាពទាល់ច្រកនោះទេ។ ប៉ុន្តែផលវិបាកនៃភាពទាល់ច្រកនយោបាយនេះនឹងជះឥទ្ធិពលជាអវិជ្ជមានដល់សង្គមជាមិនខានជាពិសេសការប្រកាន់និន្នាការងុបងល់ចំពោះបក្សនីមួយៗ និងអាចធ្វើឲ្យមានការបែងចែកពណ៌សំបុរនយោបាយតាមគណបក្សនីមួយៗ។ហើយជាពិសេសទៅទៀតនោះគឺភាពទាល់ច្រកនេះច្បាស់ជានឹងស្តែងចេញដោយកង្វះការស្រោចស្រង់វប្បធម៌សន្ទនាឡើងវិញ។ ការបាត់បង់នូវវប្បធម៌សន្ទនាគឺមានន័យថានឹងបាត់បង់ឱកាសនៃការផ្សះផ្សាជាតិ។ ដូចទស្សនៈនៃអ្នកដឹកនាំក្នុងលោកនិយាយថាការសន្ទនាឬការចរចាគ្នានឹងនាំឲ្យចៀសផុតពីសង្គ្រាម។បើទោះជាការចរចាមិនបានទទួលលទ្ធផលល្អភ្លាមៗក៏ដោយ ក៏វានៅតែជាសញ្ញាវិជ្ជមានជាងការមិនព្រមចាប់ដៃគ្នារលាក់នោះដែរ។
ហេតុដូចនេះហើយដើម្បីទម្លាយភាពទាល់ច្រកនយោបាយនៅពេលនេះបានគឺមានតែគណបក្សប្រជាជនកម្ពុជានិងគណបក្សសង្គ្រោះជាតិត្រឡប់មករកតុចរចាវិញហើយព្យាយាមដោះស្រាយបញ្ហាដោយតម្លាភាពនិងការយោគយល់ដោយតម្កល់ប្រយោជន៍ជាតិនិងប្រជារាស្ដ្រខ្ពស់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ