ពលរដ្ឋមួយចំនួនស្នើសុំឲ្យដោះលែងលោក ហេង ពៅ
ពីម្សិលមិញ ក្នុងព្រឹត្តិការណ៍អង្គរសង្ក្រាន្ត នៅឯខេត្តសៀមរាប ពលរដ្ឋមួយក្រុម បានរៀបចំញាត្តិនិងស្នាមមេដាយមួយចំនួន ត្រៀមនឹងស្កាត់យកទៅដាក់ជូនលោកនាយករដ្ឋមន្ត្រី ហ៊ុន សែន ដើម្បីសុំឲ្យដោះលែងលោក ហេង ពៅ។ ក៏ប៉ុន្តែ សកម្មភាពទាំងនេះ ត្រូវកងអង្គរក្សការពារប្រមុខរដ្ឋាភិបាល រារាំង មិនឲ្យជួបលោក ហ៊ុន សែន ឡើយ។ នេះបើតាមការបញ្ជាក់របស់អ្នកស្រី ម៉ៅ ស៊ីណាត់ ដែលជាអ្នកតំណាងពលរដ្ឋទាំងនោះ និងដែលបានដើរប្រមូលស្នាមមេដៃ។
ចុះផ្សាយនៅថ្ងៃ៖
ស្តាប់ - ០១:៥៩
អ្នកស្រី ម៉ៅ ស៊ីណាត់ ជាពលរដ្ឋម្នាក់ រស់នៅភ្នំពេញ បានអះអាងថា ខ្លួននិងពលរដ្ឋជាង១០នាក់ផ្សេងទៀត បាននាំគ្នាយកញាត្តិនិងស្នាមមេដៃជាច្រើន យកទៅជូនលោកនាយករដ្ឋមន្ត្រី នៅឯខេត្តសៀមរាប ដើម្បីសុំអន្តរាគមន៍ ឲ្យជួយដោះលែងលោក ហេង ពៅ។ លោក ហេង ពៅ ដែលជាប់ពន្ធនាគារព្រៃសជាង១០ឆ្នាំទៅហើយ។ អ្នកស្រី ស៊ីណាត់ បានថ្លែងប្រាប់វិទ្យុបារាំងថា នៅពេលដែលត្រូវអង្គរក្សលោកនាយករដ្ឋមន្ត្រីហាមឃាត់ដូច្នោះ ពួកគេទាំងនោះ ក៏ពុំបានសម្រេចបំណងឡើយ ហើយក៏រត់គេចខ្លួនមកភ្នំពេញវិញ ដោយសារតែព្រួយបារម្ភពីសុវត្ថិភាពផ្ទាល់ខ្លួន។
ជាអ្នកជឿលើគ្រិស្តសាសនាផង ពលរដ្ឋម្នាក់នេះ បានឲ្យដឹងទៀតថា គ្រួសាររបស់ខ្លួនធ្លាប់ត្រូវបានលោក ហេង ពៅ ដែលកាលពីនៅមានបុណ្យសក្តិ ជាស្នងការរាជធានីភ្នំពេញនោះ បានជួយស្រោចស្រង់សង្គ្រោះពួកគេឲ្យគេចផុតពីការចាប់ចងផ្សេងៗ។ ដូច្នេះ នៅពេលនេះ រូបនាងចង់ស្នើសុំលោកនាយករដ្ឋមន្ត្រី ឲ្យជួយលោក ហេង ពៅ វិញម្តង។ បើតាមស្ត្រីរូបនេះ គឺមានតែលោកនាយករដ្ឋមន្ត្រី ហ៊ុន សែន ទេ ដែលអាចជួយសង្គ្រោះនិងសម្រេចលើកលែងទោសរូបលោក ហេង ពៅ បាន។
គួររម្លឹកជូនថា លោក ហេង ពៅ គឺជាអតីតស្នងការរាជធានីភ្នំពេញ ហើយដែលត្រូវតុលាការ តាំងតែពីសាលាជម្រះក្តីជាន់ទាប ដល់តុលាការកំពូល សម្រេចចោទប្រកាន់ជាច្រើនករណី និងកាត់ទោសឲ្យជាប់ពន្ធនាគារជាច្រើនសិបឆ្នាំ។
គួរបញ្ជាក់ថា ទណ្ឌិតរូបនេះ ត្រូវតុលការសម្រេចផ្តន្ទាទោសជុំវិញសំណុំរឿងជាច្រើន ដែលជាប់ទាក់ទិននឹងរឿងឃាតកម្ម ការបង្ខាំងមនុស្សដោយខុសច្បាប់ និងការរក្សាទុកក្រដាសប្រាក់ក្លែងក្លាយ ជាដើម។ ចំពោះបទល្មើសខ្លះ លោកត្រូវជាប់ពន្ធនាគារ ៥ឆ្នាំ, ករណីខ្លះ ៧ឆ្នាំ និងមួយចំនួនទៀត ជាង១០ឆ្នាំ ដែលសរុបទាំងអស់ទៅ លោកត្រូវជាប់រនាំងគុក ចំនួនជិត១០០ឆ្នាំឯណោះ។
យ៉ាងណាក៏ដោយចុះ បើតាមពលរដ្ឋឈ្មោះ ម៉ៅ ស៊ីណាត់, លោក ហេង ពៅ គឺជាមនុស្សដែលស្មោះត្រង់នឹងលោកនាយករដ្ឋមន្ត្រី ហើយគោរពស្តាប់អនុវត្តតាមបញ្ជារបស់លោក ហ៊ុន សែន ខ្លាំងណាស់។ ប្រភពដដែលអះអាងថា ចំពោះបទចោទប្រកាន់លើរូបលោក ហេង ពៅ ទាំងអម្បាល់ម៉ាន គឺជាការប្រឌិតដើម្បីទម្លាក់កំហុសរឿងរូបលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ