ទូរទស្សន៍គឺជាប្រព័ន្ធផ្សព្វផ្សាយដ៏ពេញនិយមមួយប្រភេទនៅកម្ពុជា។ ពេញនិយមព្រោះតែទូរទស្សន៍មានកម្មវិធីចម្រុះសម្បូរបែប រាប់ចាប់តាំងពី ការប្រគុំតន្ត្រី រឿងភាគ កម្មវិធីកម្សាន្តផ្សេងៗ និងកម្មវិធីព័ត៌មាន។ កម្មវិធីទាំងអស់នេះ ក៏ដូចជាអ្នកដែលធ្វើការនៅលើកញ្ចក់ទូរទស្សន៍ទាំងអស់ ត្រូវបានលើកទឹកចិត្តយ៉ាងខ្លាំងក្លា ឲ្យរក្សានូវក្រមសីលធម៌ ក៏ដូចជាសុជីវធម៌ឲ្យបានខ្ជាប់ខ្ជួន។ ហេតុអ្វីបានជាដូច្នេះ?
នៅកម្ពុជា ទូរទស្សន៍ត្រូវបានគេចាត់ទុកជាឧបករណ៍ឃោសនាមហាជនដ៏មានប្រសិទ្ធភាពមួយ ដើរតួជាអ្នកអប់រំ ផ្សព្វផ្សាយ និងផ្ដល់ការកម្សាន្ត។ ការប្រើប្រាស់ទូរទស្សន៍ដើម្បីបញ្ជូនសារអប់រំ ឬសារនៃការឃោសនាផលិតផលនានា បានក្លាយទៅជាវប្បធម៌ដែលមានតម្លៃគ្រប់សម័យកាល។ តាមរយៈតម្លៃនេះហើយ ដែលធ្វើឲ្យប្រជាពលរដ្ឋកម្ពុជាជាទូទៅ និយមមើលទូរទស្សន៍ ជាពិសេសប្រជាជនដែលពុំមានលទ្ធភាពទទួលព័ត៌មានឬការកម្សាន្តតាមបណ្ដាញអ៊ីនធឺណែត។
សព្វថ្ងៃ កម្ពុជាមានប៉ុស្តិ៍ទូរទស្សន៍ជិត២០ប៉ុស្តិ៍ ដែលមានកម្មវិធីចម្រុះសម្បូរបែប រាប់ចាប់តាំងពី ការប្រគុំតន្ត្រី ការប្រឡងចម្រៀង រឿងភាគ កម្មវិធីកម្សាន្តប្លែកៗ និងកម្មវិធីព័ត៌មាន។ កម្មវិធីទាំងអស់នេះ ត្រូវបានលើកទឹកចិត្តយ៉ាងខ្លាំងក្លា ឲ្យអ្នកដំណើរការកម្មវិធីរក្សានូវវិជ្ជាជីវៈ ក្រមសីលធម៌ ក៏ដូចជាសុជីវធម៌ឲ្យបានខ្ជាប់ខ្ជួន។ នោះក៏ព្រោះតែទូរទស្សន៍ត្រូវបានមើលដោយមនុស្សគ្រប់ស្រទាប់វណ្ណៈ នៅទូទាំងប្រទេស រាប់ចាប់តាំងពីអ្នកមានចំណេះដឹងខ្ពង់ខ្ពស់ដល់ថ្នាក់បណ្ឌិត និងអ្នកដែលមានការអប់រំតិចតួច ឬមិនបានទទួលការអប់រំសោះតែម្ដង។
នៅក្នុងយុគសម័យអ៊ីនធឺណែតដូចសព្វថ្ងៃ អ្វីដែលផ្សព្វផ្សាយលើទូរទស្សន៍ មិនមែនស្ថិតតែនៅលើទូរទស្សន៍ទេ។ វាអាចត្រូវបានថតទុក ដើម្បីផ្សព្វផ្សាយនៅតាមប្រព័ន្ធអ៊ីនធឺណែត ទៅកាន់សកលលោកថែមទៀត។ ក្នុងន័យនេះ អ្វីដែលត្រូវបានផ្សព្វផ្សាយលើទូរទស្សន៍ មានឥទ្ធិពលធំធេងណាស់ទៅលើសង្គម ហើយថែមទាំងអាចឆ្លុះបញ្ចាំងពីសង្គមមួយ ទៅកាន់ពិភពលោកផងដែរ។
ប៉ុន្តែយ៉ាងណាក៏ដោយ អ្នកធ្វើការក្នុងវិស័យទូរទស្សន៍ ទាំងសិល្បករ ពិធីករ តារាសម្ដែង និងអ្នកសារព័ត៌មានមួយចំនួនផង នៅតែមិនទាន់អាចប្រកាន់ខ្ជាប់នូវក្រមសីលធម៌ វិជ្ជាជីវៈ និងសុជីវធម៌ឲ្យបានល្អប្រសើរនៅឡើយទេ។ កន្លងមក គេសង្កេតឃើញថា អ្នកទាំងនេះ នៅតែប្រើប្រាស់ពាក្យពេចន៍និងកាយវិការឆ្គាំឆ្គងនៅតាមកញ្ចក់ទូរទស្សន៍។
ពាក្យសម្ដី និង កាយវិការឆ្គាំឆ្គង នៅតាមទូរទស្សន៍ បានបង្ហាញគំរូអាក្រក់ដល់សង្គម ដោយចំពោះបុគ្គលដែលកំពុងតាមដានតាមតាមកញ្ចក់ទូរទស្សន៍។ មិនត្រឹមតែប៉ុនណោះ វាអាចធ្វើឲ្យពិភពលោកមើលមកសង្គមកម្ពុជា ក្នុងរូបភាពអវិជ្ជមានថែមទៀត។
ជាការពិត គេអាចយល់បានថា ការប្រើប្រាស់ពាក្យសម្ដី ឬកាយវិការមួយចំនួនរបស់អ្នកធ្វើការលើកញ្ចក់ទូរទស្សន៍ ពេលខ្លះ ត្រូវបានតាំងចិត្តប្រព្រឹត្តឡើងដើម្បីជាការកម្សាន្ត ដើម្បីឲ្យអ្នកទស្សនាបានសប្បាយចិត្តតែប៉ុនណោះ។ ឬពេលខ្លះ ពាក្យសម្ដីនិងកាយវិការទាំងនោះ មិនមែនកើតឡើងដោយចេតនាឬការព្រៀងទុកណាមួយទេ តែជាសកម្មភាពតបតភ្លាមៗ ដោយសារតែគ្រប់គ្រងខ្លួនឯងមិនបាន។ ប៉ុន្តែគេមិនត្រូវភ្លេចទេថា ពាក្យពេចន៍អសុរសទាំងឡាយ ឬកាយវិការមិនសមរម្យរបស់ពួកគេ ត្រូវបានផ្សាយយ៉ាងទូលំទូលាយទៅដល់កញ្ចក់ទូរទស្សន៍របស់ទស្សនិកជននៅទូទាំងប្រទេស។
ទាក់ទងនឹងការនិយាយស្ដី ឬកាយវិការនៅតាមកញ្ចក់ទូរទស្សន៍ កន្លងមក ក្រសួងវប្បធម៌ ក្រសួងព័ត៌មាន និងស្ថាប័នពាក់ព័ន្ធមួយចំនួនធ្លាប់បានរៀបចំកម្មវិធីប្រជុំបណ្ដុះបណ្ដាល ធ្វើយ៉ាងណាដើម្បីឲ្យអ្នកធ្វើការលើកញ្ចក់ទូរទស្សន៍ កែតម្រូវកំហុសឆ្គងមួយចំនួន ដែលអាចជះឥទ្ធិពលអវិជ្ជមានដល់សង្គម។ នេះគឺជាកាយការដ៏គួរឲ្យលើកទឹកចិត្ត ជាសកម្មភាពដែលបង្ហាញថា ស្ថាប័នពាក់ព័ន្ធមិនបានព្រងើយកន្តើយនឹងសកម្មភាពរបស់អ្នកធ្វើការលើកញ្ចក់ទូរទស្សន៍ ដែលជាមុខមាត់របស់ប្រទេសជាតិឡើយ។ ប៉ុន្តែកម្មវិធីដូច្នេះ គួរតែត្រូវបានរៀបចំឲ្យបានម៉ត់ចត់និងញឹកញាប់ ខណៈការរិះគន់លើសីលធម៌ និង សុជីវធម៌ របស់អ្នកធ្វើការលើកញ្ចក់ទូរទស្សន៍ នៅតែមាននៅឡើយ។
សរុបមកវិញ សីលធម៌ និង សុជីវធម៌ នៅលើកញ្ចក់ទូរទស្សន៍ សំខាន់ខ្លាំងណាស់ ព្រោះទូរទស្សន៍មានឥទ្ធិពលធំធេងណាស់លើសង្គមជាតិ។ ពាក្យសម្ដី ឬ កាយវិការ ឆ្គាំឆ្គង គ្មានសីលធម៌ នឹងក្លាយទៅជាគំរូមិនល្អដល់សង្គម។ មិនត្រឹមតែប៉ុនណោះ វាថែមទាំងអាចឆ្លុះបញ្ចាំងពីសង្គមមួយ ទៅកាន់ពិភពលោកផងដែរ។ ក្នុងន័យនេះ ប្រសិនបើអ្នកធ្វើការលើកញ្ចក់ទូរទស្សន៍ខ្មែរ ប្រើប្រាស់ភាសា ឬសម្ដែងកាយវិការមិនសមរម្យ នោះពិភពលោកនឹងមើលមកប្រជាជាតិកម្ពុជាក្នុងរូបភាពមិនសមរម្យដូចគ្នាដែរ។ នៅក្នុងវិស័យប្រព័ន្ធផ្សព្វផ្សាយ ទូរទស្សន៍ដើរតួជាអ្នកអប់រំ ផ្សព្វផ្សាយ និងផ្ដល់ការកម្សាន្ត។ គុណតម្លៃដែលមានតាំងពីដើមរៀងមកទាំងនេះ គួរតែត្រូវបានរក្សាទុកឲ្យបានយូរអង្វែងតទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ