ក្រសួងព័ត៌មានព្រមានម្ចាស់កម្មវិធីទូរទស្សន៍មួយដែលរងការរិះគន់ពីរឿងសីលធម៌
ក្រសួងព័ត៌មាននៅថ្ងៃទី២៣ មករានេះ បានបើកកិច្ចប្រជុំស្តីពីលទ្ធផលនៃជំនួបរវាងលោកនាយករដ្ឋមន្ត្រី ហ៊ុន សែន និងអ្នកសារព័ត៌មានកន្លងទៅ។ ប៉ុន្តែក្នុងកិច្ចប្រជុំនេះ លោករដ្ឋមន្ត្រីក៏បានឱ្យដឹងថា មន្ត្រីរបស់ខ្លួនបានណែនាំទៅដល់កម្មវិធីទិញម៉ោងរបស់ទូរទស្សន៍ ក្នុងស្រុកមួយដែលត្រូវរងការរិះគន់ពីសាធារណៈមតិចំពោះសីលធម៌ និងសេចក្តីថ្លៃថ្នូរ។
ចុះផ្សាយនៅថ្ងៃ៖
ស្តាប់ - ០២:០៩
ចំណាត់ការជាបឋមរបស់ក្រសួងព័ត៌មានទៅកាន់កម្មវិធីរបស់វិទ្យុអេប៊ីស៊ីដែលផ្សាយក្នុងទូរទស្សន៍ប៉ុស្តិ៍លេខបី គឺការណែនាំជាមុនស៊ិន ប៉ុន្តែចំណាត់ការនឹងឈានដល់ការបិទកម្មវិធីនេះចោលតែម្តង ប្រសិនបើគ្មានការកែប្រែនោះទេ។ នេះគឺជាការគូសបញ្ជាក់ពីអ្នកនាំពាក្យរបស់ក្រសួងព័ត៌មាន លោក អ៊ុក គឹមសេង ដែលបានថ្លែងប្រាប់វិទ្យុបារាំងក្រោយកិច្ចប្រជុំនៅថ្ងៃចន្ទនេះ។ សូមរំលឹកថាសាធារណៈមតិ បានរិះគន់យ៉ាងខ្លាំងចំពោះកម្មវិធីស្រ៊ីស្ព្រីងរបស់វិទ្យុអេប៊ីស៊ី បន្ទាប់ពីពិធីករ ពិធីការនីក្នុងកម្មវិធី បានបង្កភាពរញ៉េរញ៉ៃគ្មានសណ្តាប់ធ្នាប់និងអសីលធម៌ទាំងកាយវិការ និងពាក្យពេចន៍។
បើទោះបីជាបែបណាក៏ដោយ វិទ្យុអេប៊ីស៊ីដែលជាអ្នករងការរិះគន់បានបកស្រាយថា អ្វីដែលពួកគេធ្វើនោះគឺជាកម្មវិធីបែប“ខ្លឹម ថ្លុក និងDrama” ដែលពិធីករមិនមែនអង្គុយដូចគល់ឈើនោះឡើយ ព្រោះថា កម្មវិធីនេះគឺព័ត៌មានលាយជាមួយការកំសាន្ត ការអប់រំ ខឹង រិះគន់ និងពិចារណាជាដើម។
ទន្ទឹមនឹងនេះលោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានបញ្ជាក់ ទាំងចំណេះដឹង និងវិជ្ជាជីវៈនៃអ្នកសារព័ត៌មានជារួមនៅកម្ពុជា រួមទាំងពិធីករ ពិធីការនី នៅមានកម្រិតដែលត្រូវការបំពេញបន្ថែមយ៉ាងច្រើន។ លោក ហ៊ុយ វណ្ណៈ ក៏គាំទ្រចំពោះចំណាត់ការផ្លូវច្បាប់របស់ក្រសួងព័ត៌មានផងដែរ ហើយថាអ្នកសារព័ត៌មានរបស់កម្ពុជាមួយចំនួន បានដើរហួសព្រំដែនកំណត់ ឬក្រមប្រតិបត្តិរបស់ខ្លួន ខណៈដែលវិស័យមួយចំនួនមានដូចជាវិស័យពេទ្យ និងវិស័យមេធាវីដែលអ្នកមិនគោរពក្រមសីលធម៌ត្រូវតែមានទោស។
ក្រោយការិះគន់ខ្លាំង រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ស្នើឱ្យពិធីករ ពីធីការនីក្នុងវិទ្យុ និងទូរទស្សន៍ត្រូវរក្សាសេចក្តីថ្លៃថ្នូ និងប្រកាន់វិជ្ជាជីវៈរបស់ខ្លួន។ លោកបានសរសេរក្នុងហ្វេសប៊ុកលោកថា “បណ្តុះបណ្តាលពិធីករពិធីការិនីវិទ្យុ ទូរទស្សន៍ មិនមែនជាការលេងទេ ហើយរឹតតែមិនមែនងាយទៀត បណ្តុះបណ្តាល អ្នកនិយាយព័ត៌មាន ព្រោះមិនមែនគ្រាន់តែនិយាយឱ្យលឺនោះទេ ត្រូវមានទាំងសីលធម៌ មានទាំងចំនេះដឹង ។ លោកបានសង្កត់ធ្ងន់ថា៖ “សូមថែរក្សាអាជីពនេះអោយថ្លៃថ្នូរ បើមិនដូចនេះទេ អាជីពនេះសូមធាក់អ្នកចេញហើយ !”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ