សង្គមស៊ីវិលនិងជនរងគ្រោះរីករាយចំពោះការអនុវត្តទោសលើលោក ឈូក បណ្ឌិត
សង្គមស៊ីវិលនិងសហជីពមួយចំនួន ដែលបានតាមដានសំណុំរឿង និងជំរុញឲ្យមានការអនុវត្តទោសចំពោះលោក ឈូក បណ្ឌិត នោះ បានអបអរសាទរ ចំពោះចំណាត់ការរបស់សមត្ថកិច្ច នៅថ្ងៃសៅរ៍នេះ។ ចំណែកជនរងគ្រោះម្នាក់ក្នុងចំណោមបីនាក់ ថ្លែងក្តីរីករាយចំពោះការបញ្ចូនខ្លួនរបស់លោក ឈូក បណ្ឌិត ទៅអនុវត្តទោសតាមសាលាក្រមរបស់តុលាការ ប៉ុន្តែនាងនៅតែបញ្ជាក់ថា របួសដើមទ្រូងនៅមិនទាន់ជាសះស្បើយនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
លោក ឈូក បណ្ឌិត ស្មគ្រចិត្តចូលខ្លួនសារភាពនៅអគ្គស្នងការដ្ឋាននគរបាលជាតិរាជធានីភ្នំពេញ គឺបន្ទាប់ពីបានគេចខ្លួនពីសំណាញ់ច្បាប់ អស់រយៈពេលជាង៣ឆ្នាំមកហើយ។ ការសារភាពនេះ ក៏ធ្វើឡើងបន្ទាប់ពីប្រតិកម្មរបស់ប្រមុខរដ្ឋាភិបាលលោក ហ៊ុន សែន កាលពីដើមសប្តាហ៍ដែរ។
ទន្ទឹងនឹងនេះ អ្នកនាង កែវ នា ជាកម្មការិនីរងគ្រោះ មានការរំជួលចិត្តជាខ្លាំងពេលទទួលដំណឹងនេះ។ នាងជាជនរងគ្រោះម្នាក់នៅក្នុងចំណោម៣នាក់ ដែលរងគ្រាប់កាំភ្លើង របស់លោក ឈូក បណ្ឌិត កាលពីឆ្នាំ២០១២។ កម្មការិនីរោងចក្រកៅវេរូបនេះ បានថ្លែងក្តីរំភើបរីករាយតាមទូរស័ព្ទពីនៅខេត្តស្វាយរៀងមកថា នាងសប្បាយចិត្តណាស់! ពីមុនមក នាងអស់សង្ឃឹម និងគ្មានជំនឿថានឹងបានទទួលយុត្តិធម៌នោះទេ! ពេលនេះ នាងមានក្តីសង្ឃឹមឡើងវិញហើយ។ ទោះយ៉ាងនេះក្តី កែវ នា បញ្ជាក់ថា របួសនៅដើមទ្រូងរបស់នាងនៅចុក ហើយនាងត្រូវលេបថ្នាំជាប្រចាំរាល់ថ្ងៃ។
ជាមួយគ្នានេះ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា បានថ្លែងក្តីរីករាយប្រាប់វិទ្យុបារាំងអន្តរជាតិផងដែរ។ លោកស្វាគមន៍ចំពោះការប្រគល់ខ្លួនរបស់ជនល្មើសឈូក បណ្ឌិត ទៅសមត្ថកិច្ចនិងតុលាការ។ តាមតំណាងសហជីពរូបនេះ ការចូលខ្លួនសារភាពរបស់ពិរុទ្ធជនគឺមិនអាចទៅរួចទេ បើគ្មានប្រសាសន៍ប្រតិកម្មរបស់ប្រមុខរដ្ឋាភិបាលកម្ពុជា។
ចំណែកលោកប្រធានផ្នែកបច្ចេកទេសស៊ើបអង្កេតរបស់អង្គការលីកាដូ ក្រៅតែការស្វាមគមន៍ចំពោះចំណាត់ការរបស់សមត្ថកិច្ច លោក អំ សំអាត យល់ឃើញថា ការចូលសារភាពរបស់លោក ឈូក បណ្ឌិត នៅពេលនេះ គឺដើម្បីលុបបំបាត់ភាពអាម៉ាស់របស់ខ្លួនលោកផ្ទាល់ ហើយចំណេញដល់ខាងសមត្ថកិច្ចនិងប្រមុខរដ្ឋាភិបាលកម្ពុជាផង។ ពោលគឺបានបំបាត់ភាពអាម៉ាស់និងការរិះគន់ ចំពោះការអនុវត្តច្បាប់មិនស្មើគ្នា រវាងករណីឧកញ៉ា សុខ ប៊ុន និង អតីតអភិបាលក្រុងបាវិត ឈូក បណ្ឌិត ផ្ទាល់តែម្តង។ តាមមន្ត្រីសិទ្ធមនុស្សរូបនេះ នៅកម្ពុជា ច្បាប់គឺស្ថិតនៅលើតែបបូរមាត់របស់នាយករដ្ឋមន្ត្រីតែប៉ុណ្ណោះ ហើយដែលអាចបង្ហាញថា អង្គនីតិប្រតិបត្តិមានឥទ្ធិពលលើសលុបសង្កត់លើអំណាចតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ