សំណុំរឿងសាសា-សុខ ប៊ុន បានគាស់រំលឹកសំណុំរឿងឈូក បណ្ឌិត-កម្មការិនី៣នាក់
ចុះផ្សាយនៅថ្ងៃ៖
ស្តាប់ - ០៤:៥៣
តាមរយៈអន្តរាគមន៍របស់ប្រមុខរដ្ឋាភិបាលកម្ពុជាលើករណីអំពើហិង្សារបស់លោកឧកញ៉ា សុខ ប៊ុន ទៅលើកញ្ញា សាសា ធ្វើឲ្យចរន្តនៃការទាមទារឲ្យ អនុវត្តដូចគ្នាលើករណីលោក ឈូក បណ្ឌិត អតីតអភិបាលក្រុងបាវិត ដែលបានជាប់ទោស១ឆ្នាំកន្លះនិងត្រូវបង់ប្រាក់ជម្ងឺចិត្តជិត៤០លានរៀលនោះ កាន់តែផុលផុស។ ជនរងគ្រោះជាកម្មការិនីរោងចក្រកៅវ៉េ ដែលរងការបាញ់ប្រហារពីលោក ឈូក បណ្ឌិត បានស្នើសុំតាមរយៈប្រធានរដ្ឋសភា ជម្រុញឲ្យរដ្ឋាភិបាលជួយរកយុត្តិធម៌ដល់ពួកគេ ខណៈការរិះគន់នៅបន្តហឹងត្រចៀកនៅឡើយថាមានការអនុវត្ត ស្តង់ដារពីរខុសគ្នា លើសំណុំរឿងព្រហ្មទណ្ឌដូចគ្នា។
អស់រយៈពេល៣ឆ្នាំកន្លងទៅនេះរឿងរ៉ាវអតីតអភិបាលក្រុងបាវិត លោក ឈូក បណ្ឌិត នៅមិនទាន់ហោះហើរទៅណាឆ្ងាយទេ ដោយសាររឿងរ៉ាវលើកកាំភ្លើងបាញ់ប្រហារទៅលើ កម្មការិនីបីនាក់ឲ្យរងរបួសនេះ បានក្លាយទៅជាកម្មវត្ថុនៃការប្រៀបធៀបទៅហើយ ទាក់ទងទៅនឹងនិទណ្ឌភាពនៅប្រទេសកម្ពុជា។
បន្ទាប់ពីប្រមុខរដ្ឋាភិបាលកម្ពុជា និងរដ្ឋមន្ត្រីក្រសួងមហាផ្ទៃ ប្រតិកម្មចុងក្រោយបំផុតទៅលើលោកឧកញ៉ា សុខ ប៊ុន ដែលបានប្រើអំពើហិង្សាលើអតីតពិធីការិនីទូរទស្សន៍CTN កញ្ញា សាសា សាធារណៈជននានាបានបាញ់ចំរុះមតិ លើការពិចារណារឿងនេះ ធៀបទៅនឹងឈូក បណ្ឌិត ដែលបានរត់គេចខ្លួនពីការដាក់ទោសរបស់ច្បាប់។
បណ្តាញផ្សព្វផ្សាយសង្គមហ្វេសប៊ុកបានបន្តកន្ទុយគ្នាបង្ហោះ រូបភាពអតីតចៅហ្វាយក្រុងបាវិតរូបនេះ និងកម្មការិនី ៣នាក់ ទន្ទឹមគ្នា និងរូបភាពអ្នកមានធនធាន សុខ ប៊ុន និងកញ្ញា សាសា។ អត្ថាធិប្បាយបែបប្រៀបធៀប និងវាយប្រហារខ្លាំងៗទៅលើការអនុវត្តច្បាប់មួយ ស្តង់ដារពីរបណ្តាក់គ្នាឥតដាច់។
មិនយូរប៉ុន្មាន ការតវ៉ាមួយទៀតបានកើតឡើងភ្លាមពីសំណាក់កម្មការិនីបីនាក់ ដែលរងការបាញ់ឲ្យរបួសពីឈូក បណ្ឌិត នៅថ្ងៃចន្ទម្សិលមិញ។ ដោយជនរងគ្រោះបានដាក់ពាក្យបណ្តឹងទៅកាន់លោក ហេង សំរិន ប្រធានរដ្ឋសភាជាតិ ដើម្បីជម្រុញឲ្យប្រមុខដឹកនាំអំណាច នីតិប្រតិបត្តិ ចាប់ឈូក បណ្ឌិត យកមកទទួលទោសតាមច្បាប់។
ការស្នើនេះគឺយោងតាមអនុសាសន៍របស់លោកនាយករដ្ឋមន្ត្រីហ៊ុន សែន និងលោករដ្ឋមន្រ្តីក្រសួងមហាផ្ទៃ ស ខេង ដែលបានអន្តរាគមន៍លើករណីជម្លោះរបស់កញ្ញា សាសា ជាមួយលោកឧកញ៉ា សុខ ប៊ុន។ អ្នកទាំងបីបានស្រែកទាមទាររកយុត្តិធម៌ ដោយសារតែអ្នកប្រព្រឹត្តកំពុងតែរស់នៅក្រៅសំណាញ់ច្បាប់នៅឡើយ។
តាមរយៈរឿងរ៉ាវ ដែលទើបតែកើតឡើងថ្មីៗនេះ រឿងឈូក បណ្ឌិត ក៏ត្រូវគេគាស់រំលើងមកដែរ នេះមិនទាន់គិតពីតារាចម្រៀង និងតារាភាពយន្ត មេដឹកនាំសហជីពកម្មករមួយចំនួនទៀត ដែលរងការបាញ់ប្រហារកន្លងមក ហើយអ្នកដៃដល់នៅមិនទាន់បាននាំមកប្រឈមមុខតាមផ្លូវច្បាប់នៅឡើយ។
បញ្ហាទាំងអស់នេះ បានក្លាយទៅជាប្រធានបទសង្គម ដ៏គួរឲ្យចាប់អារម្មណ៍មួយនាពេលនេះនិងមានតម្លៃនយោបាយទៅអនាគតប្រសិនបើស្ថានភាពទាក់ទងទៅនឹងអតីតអភិបាលក្រុង បាវិតលោក ឈូក បណ្ឌិត មិនមានអ្វីប្រែប្រួល។
អ្នកវិភាគនយោបាយនិងសង្គមនៅក្នុងប្រទេសកម្ពុជាយល់ឃើញថាសំណុំរឿង សាសា- សុក ប៊ុន និងសំណុំរឿង ឈូក បណ្ឌិត-កម្មការិនី មិនគួរត្រូវបានអនុវត្តខុសគ្នា ខណៈពេលដែលប្រទេសកំពុងតែអះអាងពីកំណែទម្រង់ប្រព័ន្ធយុត្តិធម៌ដូច្នេះទេ។
ម្យ៉ាងទៀត វាជាប្រធានបទរ៉ាំរ៉ៃ ដែលបានកើតឡើងនៅក្នុងសង្គមជាក់ស្តែង ហើយដែលអាចយកទៅបំរើផលប្រយោជន៍នយោបាយបាន នៅរាល់ពេលមានការបោះឆ្នោត។ ដូច្នេះចង់មិនចង់ ប្រធានបទដែលគេយកមកប្រៀបផ្ទឹមគ្នានេះ បានរំលេចឡើងនូវដំណើរការអនុវត្តប្រព័ន្ធយុត្តិធម៌របស់រដ្ឋាភិបាល ដែលប្រជាជនសាមញ្ញមើលដឹងដោយងាយៗ។
ទោះយ៉ាងនេះក្តីរដ្ឋាភិបាលតែងអះអាងថា សមត្ថកិច្ចក៏បានចាត់វិធានការតាមចាប់ខ្លួនលោក ឈូក បណ្ឌិត យកមកឲ្យទទួលទោស ក៏ប៉ុន្តែបន្ទាប់ពីចេញសាលក្រមជាបន្តបន្ទាប់ចាប់ពីសាលាដំបូងខេត្តស្វាយរៀង ការតម្កល់សាលក្រមសាលាដំបូងដោយ សាលាឧទ្ធរណ៍ ដោយដាក់ទោសឈូក បណ្ឌិត ឲ្យជាប់ពន្ធនាគារ១ឆ្នាំកន្លះ និងសងជម្ងឺចិត្តកម្មការិនីរោងចក្រកៅវ៉េទាំងបីនាក់៣៨លានរៀល កាលពីឆ្នាំ២០១៣។ ហើយនៅឆ្នាំ២០១៤ តុលាការកំពូលក៏បានសម្រេចតម្កល់សាលក្រមសាលាឧទ្ធរណ៍ឲ្យនៅដដែល ទៅហើយក៏ដោយនោះក៏ស្រមោលជនដៃដល់រូបនេះនៅមិនទាន់រកឃើញនៅឡើយ។
ការដែលរក ឈូក បណ្ឌិត មិនឃើញ ហើយសមត្ថកិច្ចអាចតាមចាប់ហេង ពៅ អតីតមេប៉ូលីសក្រុងភ្នំពេញ ចាប់ឧកញ៉ា សុខ ប៊ុន ចាប់ឧកញ៉ា ថោង សារ៉ាត់ជាដើម ទោះអ្នកទាំងនេះរត់ទៅក្រៅប្រទេសក៏ដោយនោះ ត្រូវគេមើលឃើញថាជាការអនុវត្តច្បាប់មិនស្មើភាពគ្នា។ ហើយរឿងនេះបានក្លាយជាលេសនៃការរិះគន់ពីសំណាក់សាធារណៈជន និងបក្សនៅក្រៅរដ្ឋាភិបាល និងមានការលើកឡើងថាករណី ឈូក បណ្ឌិត ត្រូវពឹងផ្អែកលើឆន្ទៈ របស់រដ្ឋាភិបាលផងដែរ។
ផ្ទុយទៅវិញ ការបោះឆ្នោតសកលនៅឆ្នាំ២០១៣ កន្លងមក បង្ហាញថាករណីនេះ ទំនងជាមិនប៉ះពាល់ដល់ប្រជាប្រិយភាពធ្ងន់ធ្ងរ របស់រដ្ឋាភិបាលដែលដឹកនាំដោយគណបក្សប្រជាជននោះទេ ដោយសារគណបក្សកាន់អំណាចនៅតែមានឥទ្ធិពលបានកាន់អំណាចដដែល គ្រាន់តែអាសនៈមានការធ្លាក់ចុះ ក៏ប៉ុន្តែវាមិនច្បាស់ដូចការលើកឡើងថាករណីឈូក បណ្ឌិត អាចជាហេតុផលមួយនៃការបាត់សម្លេងគាំទ្រនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ