ប៉ូលីសអាំងទែប៉ូល កំពុងតាមចាប់លោក ឈូក បណ្ឌិត
ប៉ូលីសអាំងទែប៉ូល បានចេញនិវេទក្រហមឲ្យប្រទេសជាង១៩០លើពិភពលោក តាមចាប់លោក ឈូក បណ្ឌិត។ នេះជាអ្វីដែលអ្នកនាំពាក្យអគ្គស្នងការនគរបាលជាតិ ប្រកាសកាលពីថ្ងៃអង្គារ ទី២៨កក្កដា ម្សិលមិញ។ គួរជម្រាបជូនថា ការប្រកាសរបស់អគ្គស្នងការនគរបាលជាតិយ៉ាងដូច្នេះ ធ្វើឡើងតែមួយថ្ងៃប៉ុណ្ណោះ បន្ទាប់ពីកម្មការិនីរងគ្រោះនៅខេត្តស្វាយរៀងទាំង៣នាក់ បានដាក់ញត្តិទៅកាន់រដ្ឋសភានិងរាជរដ្ឋាភិបាល ដើម្បីស្នើសុំអន្ដរាគមន៍ឲ្យតាមចាប់អតីតអភិបាលក្រុងបាវិត លោក ឈូក បណ្ឌិត យកមកផ្ដន្ទាទោសតាមច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅក្នុងវីដេអូឃ្លីបរយៈពេលជាង៤នាទី លោក គៀត ច័ន្ទថារិទ្ធិ អ្នកនាំពាក្យនគរបាលជាតិ បានអះអាងថា ក្រសួងមហាផ្ទៃនិងអគ្គស្នងការនគរបាលជាតិ មិនមានការធ្វេសប្រហែស ឬបន្ធូរដៃក្នុងការស្រាវជ្រាវ ដើម្បីស្វែងរកចាប់ខ្លួនលោក ឈូក បណ្ឌិត យកមកផ្ដន្ទាទោស ដូចការចោទប្រកាន់ពីសាធារណៈមតិមួយចំនួននោះទេ។ បើតាមអ្នកនាំពាក្យរូបនេះ កន្លងមក នាយកដ្ឋាននគរបាលព្រហ្មទណ្ឌបានខិតខំប្រឹងប្រែងស្វែងរកចាប់ខ្លួនលោក ឈូក បណ្ឌិត ដែរ ប៉ុន្តែចេះតែឃ្វាង។ យ៉ាងណាក៏ដោយ យុទ្ធនាការស្វែងរកចាប់ខ្លួននៅតែបន្ត គ្មានការបន្ធូរដៃទេ។
លោក គៀត ច័ន្ទថារិទ្ធិ បានគូសបញ្ជាក់បន្ថែមថា សមត្ថកិច្ចបានស្នើទៅអគ្គលេខាធិការដ្ឋាននគរបាលអន្ដរជាតិ អាំងទែប៉ូល ដើម្បីចេញនិវេទក្រហម ស្វែងរកចាប់ខ្លួនលោក ឈូក បណ្ឌិត។ និវេទក្រហមរបស់អាំងទែប៉ូល បានចេញរួចរាល់ហើយកាលពីខែមីនាកន្លងទៅ ដោយតម្រូវឲ្យប្រទេសជាង១៩០លើពិភពលោក តាមចាប់អតីតចៅហ្វាយក្រុងបាវិត។ អតីតចៅហ្វាយក្រុងបាវិត លោក ឈូក បណ្ឌិត ដែលត្រូវតុលាការកាត់ទោសពីបទបាញ់ប្រហារកម្មការិនីរោងចក្រឲ្យរងរបួសធ្ងន់។
ជាមួយគ្នានេះ លោក គៀត ច័ន្ទថារិទ្ធិ អ្នកនាំពាក្យនគរបាលជាតិក៏បានអំពាវនាវឲ្យប្រជាពលរដ្ឋ ជូនដំណឹងដល់សមត្ថកិច្ច ប្រសិនបើបានប្រទះឃើញលោក ឈូក បណ្ឌិត។ ការចាប់ខ្លួនពិរុទ្ធជន ឈូក បណ្ឌិត យកមកផ្ដន្ទាទោស ត្រូវបានអ្នកនាំពាក្យរូបនេះចាត់ទុកថា ជាការរកយុត្តិធម៌ជូនកម្មការិនីរងគ្រោះ។
គួរជម្រាបជូនថា ការប្រកាសនិងសេចក្ដីអំពាវនាវរបស់អ្នកនាំពាក្យអគ្គស្នងការនគរបាលជាតិយ៉ាងដូច្នេះ ធ្វើឡើងតែមួយថ្ងៃប៉ុណ្ណោះ បន្ទាប់ពីកម្មការិនីរងគ្រោះនៅខេត្តស្វាយរៀងទាំង៣នាក់ បានដាក់ញត្តិទៅកាន់រដ្ឋសភានិងរាជរដ្ឋាភិបាល ដើម្បីស្នើសុំអន្ដរាគមន៍ឲ្យតាមចាប់លោក ឈូក បណ្ឌិត មកផ្ដន្ទាទោសតាមច្បាប់។ លោក ឈូក បណ្ឌិត អតីតអភិបាលក្រុងបាវិត ត្រូវបានតុលាការកម្ពុជា កាត់ទោសឲ្យជាប់ពន្ធនាគាររយៈពេល១ឆ្នាំកន្លះ ពីបទបាញ់ប្រហារទៅលើកម្មារិនី៣នាក់ឲ្យរងរបួស។ លោក ឈូក បណ្ឌិត ក៏ត្រូវបានតុលាការបង្គាប់ឲ្យបង់ប្រាក់សំណងដល់ជនរងគ្រោះទាំង៣នាក់ ចំនួន៣៨លានរៀលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ