តំណាងរាស្ត្របក្សប្រឆាំង ទទួលយកញត្តិអ្នកមានជម្លោះដីធ្លីខេត្តក្រចេះ ហើយសន្យានឹងដោះស្រាយបញ្ហានេះ
អ្នកភូមិមានជម្លោះដីធ្លី ខេត្តក្រចេះ ប្រមាណជាង ១០០នាក់ បាននាំគ្នាហែរញត្តិទាមទារប័ណ្ឌកម្មសិទ្ធដីធ្លី ពីវត្តសាមគី្គរង្ស៊ី ទៅកាន់រដ្ឋសភាកម្ពុជា ក្នុងទីក្រុងភ្នំពេញនៅព្រឹកថ្ងៃច័ន្ទ ទី ១៨ សីហានេះ។ តំណាងរាស្ត្រគណបក្សសង្គ្រោះជាតិជាច្រើននាក់ បានចេញមកទទួលញត្តិរបស់ប្រជាជន ហើយសន្យាថា ពីពេលនេះតទៅ គណបក្សសង្គ្រោះជាតិ នឹងចូលរួមតាមដានបណ្តឹងរបស់ប្រជាពលរដ្ឋ ដែលមានជម្លោះដីធ្លីរហូតទទួលបានជោគជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ប្រជាជនមានជម្លោះដីធ្លីមកពីខេត្តក្រចេះ ដែលបានកំពុងស្នាក់នៅក្នុងវត្តសាមគ្គីរង្ស៊ី ក្នុងរាជធានីភ្នំពេញអស់រយៈពេលជាង១ ខែមកហើយនោះ បាននាំគ្នាដើរដង្ហែរក្បួនដោយថ្មើរជើង ទៅកាន់រដ្ឋសភាកម្ពុជា ដើម្បីដាក់ញត្តិ និងទាមទារឲ្យអាជ្ញាធរខេត្តក្រចេះចេញប័ណ្ឌកម្មសិទ្ធិដីធ្លីឲ្យពួកគេ។ ប័ណ្ឌកម្មសិទ្ធិដីធ្លី ដែលក្រុមយុវជនស្ម័គ្រចិត្តរបស់លោកនាយករដ្ឋមន្ត្រី ហ៊ុន សែន បានចុះធ្វើការវ៉ាស់វែងជូនដល់អ្នកភូមិទាំងអស់ កាលពីឆ្នាំ ២០១។ហើយបន្ទាប់មក ដីអស់ទាំងនោះ ក្លាយជាដីជម្លោះ ដោយសារតែមានក្រុមហ៊ុនឯកជនមួយអះអាងថា ដីនោះត្រូវបានរដ្ឋាភិបាលកាត់ឲ្យក្រុមហ៊ុន តាមរយៈដីសម្បទានសេដ្ឋកិច្ច។
លោក សួន វិច្ឆិកា តំណាងប្រជាពលរដ្ឋមានជម្លោះដីធ្លីនៅក្នុងខេត្តក្រចេះនេះ បានបញ្ជាក់ថា តាមលោក អ៊ឹម ឈុនលឹម រដ្ឋមន្ត្រីក្រសួងដែនដី និងនគររូបនីយកម្ម ដែលបានចុះទៅខេត្តក្រចេះ ហើយធ្វើការសាកសួរជាមួយនឹងប្រជាពលរដ្ឋ កាលពីពេលកន្លងទៅបានបញ្ជាក់ថា ក្រុមហ៊ុនដែលមានជម្លោះដីធ្លីជាមួយនឹងប្រជាពលរដ្ឋនោះ ពុំបានចុះបញ្ជីត្រឹមត្រូវតាមច្បាប់នោះទេ។ ប៉ុន្តែបើទោះបីជាយ៉ាងនេះ ក៏ដោយ ក៏លោក សួន វិច្ឆិការ បញ្ជាក់ថា រហូតមកទល់នឹងពេលនេះ អាជ្ញាធរខេត្តក្រចេះ ក៏នៅតែមិនទាន់ចេញប័ណ្ឌកម្មសិទ្ធដីធ្លីឲ្យប្រជាជនដដែល។
បន្ទាប់ពីរង់ចាំ ដោយលើកបដា និងស្រែកតាមឧឃ្ទោសស័ព្ទនៅមុខរដ្ឋសភាហើយ ក៏មានតំណាងរាស្ត្រគណបក្សប្រឆាំង លោកស៊ុន ឆ័យ លោកហូរ វណ្ណ និងលោក រៀល ខេមរិន្ទ្រជាដើមបានចេញមកទទួលយកញត្តិរបស់អ្នកភូមិមកពីខេត្តក្រចេះ។ ក្នុងនោះលោក ស៊ុន ឆ័យ បានបង្ហាញពីជំហររបស់គណបក្សថា ចាប់ពីពេលនេះ តទៅតំណាងរាស្ត្របក្សសង្គ្រោះជាតិ និងចូលរួមតាមដានរាល់បណ្តឹងរបស់ប្រជាពលរដ្ឋទាក់ទងនឹងបញ្ហាដីធ្លី រហូតទទួលបានជោគជ័យ ហើយត្រូវត្រូតពិនិត្យឡើងវិញ រាល់ដីសម្បទានសេដ្ឋកិច្ច ដែលរដ្ឋាភិបាលបានផ្តល់ឲ្យក្រុមហ៊ុននានា ដើម្បីធ្វើការអភិវឌ្ឍន៍។
សូមបញ្ជាក់ថា បន្ទាប់ពីដាក់ញត្តិនៅរដ្ឋសភារួចមក ប្រជាពលរដ្ឋទាំងអស់ បានបន្តទៅកាន់ខុទ្ទកាល័យនាយករដ្ឋមន្ត្រីជាបន្តទៅទៀត ប៉ុន្តែការធ្វើដំណើររបស់ពួកគេត្រូវបានសម្លាំងសម្ថតិកិច្ច រារាំង ដោយមិនឲ្យចូលទៅជិតគេហដ្ឋានរបស់លោកនាយករដ្ឋមន្ត្រីនោះឡើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ