តួនាទីសភាកម្ពុជា៖ចំណុចក្តៅសម្រាប់របាយការណ៍សិទ្ធិមនុស្ស U.N ឆ្នាំ ២០០១
ចុះផ្សាយនៅថ្ងៃ៖
ស្តាប់ - ០៣:៥៩
លោក ស៊ូយ៉ា បា្រសាទ ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាបានបញ្ចប់បេសកកម្មស្វែងរកការពិតស្តីពីបញ្ហាសិទ្ធិមនុស្សលើកទី៥នៅកម្ពុជា កាលពីរសៀលថ្ងៃទី៣ខែមិថុនាឆ្នាំ២០១១ បន្ទាប់ពីលោកបានស្ថិតនៅលើទឹកដីកម្ពុជារយៈពេល៥ថ្ងៃ ចាប់ពីថ្ងៃទី៣០ឧសភា ដល់ថ្ងៃទី៣ខែមិថុនា។ បេសកកម្មលើកនេះរបស់លោកស៊ូប៊ែឌី គឺផ្តោតសំខាន់លើតួនាទីរបស់សភាកម្ពុជាដែលជាស្ថាប័នសំខាន់ជាងគេមួយក្នុងការលើកស្ទួយសិទ្ធិមនុស្ស ជាពិសេស សិទ្ធិរបស់ប្រជាពលរដ្ឋ។ ប៉ុន្តែ តួនាទីសភាកម្ពុជាទទួលបានការវាយតម្លៃទាបពីអ្នករាយការណ៍ពិសេសខាងសិទ្ធិមនុស្សរបស់សហប្រជាជាតិរូបនេះ។
នៅក្នុងសេចក្តីថ្លែងការណ៍មុនពេលចាកចេញពីកម្ពុជា លោកស៊ូយ៉ា ប្រាសាទ ស៊ូប៊ែឌី អ្នករាយការណ៍ពិសេសស្តីពីបញ្ហាសិទ្ធិមនុស្សរបស់អង្គការសហប្រជាជាតិប្រចាំកម្ពុជាបានផ្តោតសំខាន់ជាងគេទៅលើតួនាទីរបស់រដ្ឋសភា ដែលលោកចាត់ទុកថា ជាស្ថាប័នជាតិសំខាន់ជាងគេមួយនៅក្នុងការលើកស្ទួយសិទ្ធិមនុស្ស។
ជាបឋម លោកស៊ូប៊ែឌី បានកោតសរសើរដោយពេញចិត្តចំពោះការបង្កើតបាននូវវិធានអនុវត្តរបស់រដ្ឋសភាក្នុងអំឡុងពេលដ៏ខ្លីមួយ។ លោកកត់សម្គាល់ថា ប្រទេសកម្ពុជាទើបតែស្គាល់ស្ថិរភាពនយោបាយគិតចាប់តាំងពីឆ្នាំ២០០៣មកតែប៉ុណ្ណោះ។ ដូច្នេះហើយ រាល់សមិទ្ធផលដែលកម្ពុជាក៏ដូចជារដ្ឋសភាសម្រេចបានគឺជារឿងគួរឲ្យកោតសរសើរបំផុត។ ប៉ុន្តែនៅក្នុងការបំពេញមុខនាទីរបស់ខ្លួន រដ្ឋសភាកម្ពុជានៅមានការឆកល្វែងមួយចំនួន។ ចំណុចរិះគន់សំខាន់ៗចំពោះរដ្ឋសភាដែលមានក្នុងរបាយការណ៍របស់លោកស៊ូប៊ែឌី មានដូចជា កង្វះតម្លាភាពនៅក្នុងការធ្វើច្បាប់ ការគោរពមិនទាន់បានត្រឹមត្រូវនូវរបបសេរីនិយមពហុបក្ស ពោលគឺលោកចង់សំដៅទៅលើមតិភាគច្រើនដែលគាបសង្កត់ទៅលើមតិភាគតិចនៅក្នុងសភា ការអនុម័តច្បាប់មួយចំនួនដែលបានរឹតត្បិតវិសាលភាពនៃសិទ្ធិសេរីភាពរបស់ពលរដ្ឋ កង្វះប្រសិទ្ធិភាពនៃការត្រួតពិនិត្យលើនីតិប្រតិបត្តិ និងសេរីភាពបញ្ចេញមតិរបស់តំណាងរាស្ត្រមកពីគណបក្សភាគតិចក្នុងសភានៅមានកម្រិត។
អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្សនៅកម្ពុជាក៏បានលើកឡើងអំពីទ្រឹស្តីមួយចំនួនទាក់ទងនឹងការកសាងលទ្ធិប្រជាធិបតេយ្យផងដែរ ដូចជាថាលទ្ធិប្រជាធិបតេយ្យគឺសំដៅដល់កិច្ចសន្ទនា និងការជជែកដេញដោលគ្នារាល់បញ្ហាដែលជាផលប្រយោជន៍ជាតិ។ លោកលើកថា សភាគឺជាទីកន្លែងដែលតំណាងរាស្ត្រគ្រប់រូបអាចជជែកដេញដោលដោយសេរីអំពីបញ្ហាជាតិ។ ត្រង់ចំណុចនេះ លោកស៊ូប៊ែឌី កត់សម្គាល់ថា សមាជិកសភាកម្ពុជាមួយចំនួនត្រូវបានគេដកអភ័យឯកសិទ្ធិដោយសារតែការបញ្ចេញមតិ។ ទោះជាលោកមិនបានបញ្ចេញឈ្មោះ តែគេអាចយល់បានថា លោកស៊ូប៊ែឌីចង់សំដៅទៅលើករណីលោកសម រង្ស៊ី និងលោកស្រីមួរ សុខហួរដែលកំពុងបាត់បង់អភ័យឯកសិទ្ធិរបស់ខ្លួនក្នុងរឿងក្តីក្តាំនៅឯតុលាការ។
បើពិនិត្យជារួមទៅលើសេចក្តីថ្លែងការណ៍របស់លោកស៊ូប៊ែឌី អំពីស្ថានភាពសិទ្ធិមនុស្សទូទៅ និងជាពិសេសអំពីស្ថានភាពរបស់សភាកម្ពុជា គេឃើញថា ការរិះគន់មានសភាពធ្ងន់ធ្ងរទោះបីជាលោកបានលើកសរសើរចំណុចល្អមួយចំនួនក្តី។ តាមរយៈសេចក្តីថ្លែងការណ៍បែបនេះ គេជឿជាក់ថា របាយការណ៍សិទ្ធិមនុស្សប្រចាំឆ្នាំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិឆ្នាំ ២០១១នេះប្រាកដជាមិនល្អសោះឡើយសម្រាប់កម្ពុជា។ មន្ត្រីរដ្ឋាភិបាលបានបញ្ចេញប្រតិកម្មខ្លាំងៗតបទៅនឹងការរិះគន់របស់លោកស៊ូប៊ែឌីដែលបានវាយតម្លៃទាបអំពីតួនាទីរបស់សភាកម្ពុជា។
ស្ថានភាពនេះបានធ្វើឲ្យគេមើលឃើញថា ភាពតានតឹងរវាងរដ្ឋាភិបាលកម្ពុជាជាមួយអ្នករាយការណ៍ពិសេសសហប្រជាជាតិស្តីពីបញ្ហាសិទ្ធិមនុស្សច្បាស់ជានឹងកើតឡើងយ៉ាងខ្លាំងម្តងទៀត ហើយវត្តមានការិយាល័យសិទ្ធិមនុស្សរបស់សហប្រជាជាតិនៅកម្ពុជាក៏អាចក្លាយជាចំណោទជាថ្មីទៀតដែរ។ អ្វីដែលគេអាចកត់សម្គាល់បានគឺ រដ្ឋាភិបាលកម្ពុជា និងភាគីសហប្រជាជាតិនៅតែធ្វើការមិនចុះសម្រុងគ្នាចំពោះប្រធានបទស្តីពីសិទ្ធិមនុស្ស។ តាមទ្រឹស្តី វត្តមានការិយាល័យសិទ្ធិមនុស្សរបស់សហប្រជាជាតិនៅកម្ពុជា គឺដើម្បីឃ្លាំមើលការរំលោភសិទ្ធិមនុស្ស និងជាពិសេសគឺជួយកែលម្អស្ថានភាពសិទ្ធិមនុស្សនៅក្នុងប្រទេសនេះ។
ប៉ុន្តែ កង្វះកិច្ចសហការរវាងភាគីទាំងពីរហាក់មិនអាចជួយកែប្រែអ្វីបានឡើយ។ រាល់ការរិះគន់ជាចំហរបស់ការិយាល័យនេះមិនខុសអ្វីពីការចាក់សាំងទៅលើភ្លើងនោះឡើយ។ ដូច្នេះរដ្ឋាភិបាលកម្ពុជា និងអង្គការសហប្រជាជាតិគួរតែក្លាយជាដៃគូក្នុងការកែលម្អចំណុចខ្វះខាតទាំងឡាយស្តីពីបញ្ហាសិទ្ធិមនុស្សជាជាងការប្រឈមមុខដាក់គ្នាក្នុងនាមជាគូបដិបក្ខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ