អ្នករាយការណ៍ពិសេស អ.ស.ប. វាយតម្លៃថា រដ្ឋសភាកម្ពុជា នៅឆកល្វែងមួយចំនួន
អ្នករាយការណ៍ពិសេស អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា លោក សុរិយា ប្រាសាទ ស៊ូប៊ែឌី បានកត់សម្គាល់ថា រដ្ឋសភាកម្ពុជា នៅមានការឆកល្វែងមួយចំនួន នៅក្នុងការបំពេញមុខងារ។ នោះគឺការមានអំណាចតិចតួចក្នុងការកែច្បាប់ ដែលតាក់តែងដោយរដ្ឋាភិបាល។ រដ្ឋសភាក៏បានអនុម័តច្បាប់មួយចំនួន ដែលរឹតត្បិតសេរីភាពបញ្ចេញមតិរបស់ប្រជាពលរដ្ឋ និងជាពិសេសរដ្ឋសភា បានបង្កើតច្បាប់រឹតត្បិតលើសេរីភាពរបស់សមាជិកសភាខ្លួនឯងថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
លោក ស៊ូប៊ែឌី បានបិទបញ្ចប់បេសកកម្មស្វែងរកការពិត ស្តីពី សិទ្ធិមនុស្ស លើកទី៥ របស់លោក នៅថ្ងៃសុក្រនេះ។ បេសកកម្មរយៈពេល ៥ ថ្ងៃ ចាប់ពីថ្ងៃទី៣០ឧសភា អ្នករាយការណ៍ពិសេសអង្គការសហប្រជាជាតិ បានផ្តោតលើការបន្តពិនិត្យតួនាទីរបស់សភា។
ក្នុងសន្និសីទកាសែត នៅប៉ុន្មានម៉ោងមុននេះ លោក ស៊ូប៊ែឌី បានសម្តែងការពេញចិត្ត ដោយឃើញការរីកចម្រើន ដែលប្រទេសកម្ពុជា សម្រេចបាន ក្នុងការបង្កើតវិធានអនុវត្តន៍របស់សភា នៅក្នុងអំឡុងពេលដ៏ខ្លីមួយ។ ក៏ប៉ុន្តែអ្នករាយការណ៍ពិសេសរូបនេះ បានកត់សម្គាល់ថា កម្ពុជាក៏នៅមានការឆកល្វែងមួយចំនួននៅក្នុងការបំពេញមុខងាររបស់សភាជាទូទៅ ហើយជាពិសេស គឺរដ្ឋសភា។
ជាបឋម លោកស៊ូប៊ែឌី លើកឡើងថា ដំណើរការធ្វើច្បាប់គ្រប់ដំណាក់កាលទាំងអស់ គួរតែមានតម្លាភាពជាងនេះ។ ក្នុងនោះ ក៏មានច្បាប់មួយចំនួន ដែលបានអនុម័ត ដោយរដ្ឋសភា កាលពីពេលកន្លងមក មាននិន្នាការរឹតត្បិតដល់វិសាលភាពនៃសិទ្ធិរបស់ប្រជាពលរដ្ឋ។ សភានៅកម្ពុជា ក៏មានលទ្ធភាពតិចតួចបំផុត ក្នុងការរារាំងរដ្ឋាភិបាល ចំពោះការបង្កើតច្បាប់ ដែលរឹតត្បិតសិទ្ធិប្រជាពលរដ្ឋ។
លោក ស៊ូប៊ែឌី ដែលបានជួបជាមួយប្រធានរដ្ឋសភា នៅព្រឹកមិញ ក៏បានលើកឡើងថា វិធាន និងនីតិវិធីផ្ទៃក្នុងមួយចំនួនរបស់រដ្ឋសភា មិនផ្តល់លទ្ធភាពងាយស្រួលឲ្យសមាជិកគ្រប់រូប ប្រើប្រាស់សេរីភាពនៃការបញ្ចេញមតិរបស់ខ្លួននោះទេ។ ក្នុងរយៈពេលថ្មីៗនេះ វិសាលភាពសម្រាប់សមាជិកសភា ក្នុងការចូលរួមជជែកដេញដោលត្រូវបានកម្រិត និងមានសមាជិកសភាមួយចំនួន ត្រូវបានដកអភ័យឯកសិទ្ធិ សូម្បីតែការបញ្ចេញមតិអំពីបញ្ហានានា ដែលជាផលប្រយោជន៍ជាតិក្តី។
យ៉ាងណាក៏ដោយ លោក ជាម យៀប សមាជិករដ្ឋសភា មកពីគណបក្សប្រជាជនកម្ពុជា បានជំរុញឲ្យលោកស៊ូប៊ែឌី ត្រូវតែស្វែងយល់ការពិត និងធ្វើរបាយការណ៍ មានតុល្យភាព។ ទោះបីជាទទួលស្គាល់ថា ការអនុវត្តន៍ និងការគោរពច្បាប់នៅកម្ពុជា នៅមានខ្វះចន្លោះខ្លះ ក៏ប៉ុន្តែលោក ជាម យៀប អះអាងថា ស្ថានភាពរដ្ឋសភាកម្ពុជា មិនដូចអ្វីដែលលោកស៊ូប៊ែឌីបានលើកឡើងនោះទេ។
អំពីករណីការដកអភ័យឯកសិទ្ធិសមាជិកសភាគណបក្សប្រឆាំង ក៏ត្រូវបានលោក ជាម យៀប លើកឡើងថា រដ្ឋសភាគ្រាន់តែអនុវត្តច្បាប់ និងម្យ៉ាងទៀត ដោយសារតែសមាជិកសភា ដូចជាលោកសមរង្ស៊ី បានប្រព្រឹត្តកំហុស ដែលនាំដល់ការប្តឹងផ្តល់នៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ