សិទ្ធិមនុស្សនៅឆ្នាំ២០១០គ្រាន់បើជាងនៅឆ្នាំ២០០៩
របាយការណ៍ប្រចាំឆ្នាំរបស់Amnesty International ដែលបានសិក្សាទៅលើសិទ្ធិមនុស្សក្នុងអំឡុងឆ្នាំ២០១០កន្លងទៅនេះ ត្រូវបានផ្សព្វផ្សាយជាសាធារណៈ នៅថ្ងៃសុក្រទី១៣ឧសភានេះ។ ចំពោះAmnesty International ឆ្នាំ២០១០កន្លងទៅនេះ គឺជារបត់មួយសម្រាប់សិទ្ធិមនុស្ស នៅក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ចំពោះAmnesty International ពួកអ្នកស្នេហាសិទ្ធិមនុស្សនៅក្នុងពិភពលោក បានទទួលជ័យជំនះមួយធំធេង ក្នុងអំឡុងពេលប៉ុន្មានខែចុងក្រោយនៃឆ្នាំ២០១០ កន្លងផុតទៅនេះ។ ជ័យជំនះនោះ វាបានស្តែងឡើង ជាអាទិ៍តាមរយៈការផ្តល់រង្វាន់ណូបែលផ្នែកសន្តិភាពទៅឲ្យសកម្មជនចិនLiu Xiaobo ការដោះលែងលោកស្រីAung San Suu Kyi នៅភូមានិងបដិវត្តន៍ផ្កាម្លិះនៅទុយនីស៊ី។
នៅក្នុងរបាយការណ៍ប្រចាំឆ្នាំកម្រាស់៤០០ទំព័រ Amnesty International បាននិយាយរៀបរាប់យ៉ាងលម្អិតពីស្ថានភាពសិទ្ធិមនុស្សនៅក្នុងបណ្តាប្រទេសចំនួន១៥៧នៅក្នុងលោក។ របាយការណ៍បញ្ជាក់ថា ស្ថានភាពសិទ្ធិមនុស្សក្នុងឆ្នាំ២០១០ មានលក្ខណៈប្រសើរជាងឆ្នាំ២០០៩ តែការរំលោភបំពានខ្លាំងទៅលើសិទ្ធិមនុស្សនៅតែបន្តមានតទៅទៀត នៅក្នុងប្រទេសចំនួនជាង៧០។
សម្រាប់Amnesty International សកម្មជនសិទ្ធិមនុស្សរាប់ពាន់នាក់ត្រូវបានគំរាមកំហែងឃុំខ្លួន ធ្វើទារុណកម្ម និងសម្លាប់ នៅអាហ្វហ្កានីស្ថាន អង់ហ្គោឡា ប្រេស៊ីល ចិន ម៉ិកស៊ិក អ៊ូស្បេគីស្ថាន រុស្ស៊ី អ៊ុយក្រែន បេឡារុស្ស៊ី គៀរហ្ស៊ីស្ថាន និងនីហ្សេរីយ៉ា ។ល។និង។ល។
យ៉ាងណាក៏ដោយ ក៏មានដែរការរីកចម្រើនដែលគួរឲ្យចាប់អារម្មណ៍។ Amnesty International គូសបញ្ជាក់ជាអាទិ៍ថា ប្រទេសមួយចំនួន ដូចយ៉ាងហ្កាបុងជាដើមបានលុបចោលទោសប្រហារជីវិត និងថាសិទ្ធិមនុស្សនៅឥណ្ឌូនេស៊ីព្រមទាំងនៅ សៀរ៉ាឡេអូន នៅឆ្នាំ២០១០កន្លងទៅនេះ មានលក្ខណៈប្រសើរជាងនៅឆ្នាំ២០០៩។
អង្គការការពារសិទ្ធិមនុស្សដ៏ល្បីមួយនេះ ក៏ឆ្លៀតអំពាវនាវឲ្យអ្នកដឹកនាំនៅក្នុងលោកប្រឹងប្រែងធ្វើឲ្យសិទ្ធិមនុស្សរឹងរឹតតែប្រសើរ នៅឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ