ចៅក្រមស៊ើបអង្កេតសួរចម្លើយបន្ថែមលើជនជាតិថៃ៧នាក់នៅថ្ងៃនេះ
ពេញមួយថ្ងៃព្រហស្បតិ៍នេះ ចៅក្រមស៊ើបអង្កេតនៃសាលារាជធានីភ្នំពេញបានសួរចម្លើយជនជាតិថៃទាំង៧នាក់។ ជាការសាកសួរបន្ថែម ក្រោយពីចៅក្រមស៊ើបបានទទួលសំណុំរឿងពីព្រះរាជអាជ្ញា។ ព្រះរាជអាជ្ញាបានចោទប្រកាន់ជនជាតិថៃទាំង៧នាក់ ពីបទឆ្លងដែនខុសច្បាប់ និងចូលក្នុងទីលានយោធាក្នុងបំណងទុច្ចរិត។
ចុះផ្សាយនៅថ្ងៃ៖
សេចក្តីរាយការណ៍របស់ លាង ដឺលុច
ចៅក្រមស៊ើបអង្កេតសាលារាជធានីភ្នំពេញលោកស្រីចាំង ស៊ីណាតបានសួរចម្លើយជនជាតិថៃទាំង៧នាក់ពេញមួយថ្ងៃនៅថ្ងៃនេះ។ នេះគឺជាការអនុវត្តនីតិវិធីតុលាការ បន្ទាប់ពីព្រះរាជអាជ្ញាបានសួរចម្លើយ ហើយបានចោទប្រកាន់ជនជាតិថៃទាំងនេះពីបទឆ្លងដែនចូលដីខ្មែរខុសច្បាប់ និងចូលក្នុងទីលានយោធាក្នុងបំណងទុច្ចរិត។
នៅក្នុងដំណាក់នៃការសួរចម្លើយពីសំណាក់ចៅក្រមស៊ើបសួរនេះ យោងតាមនិតិវិធីចៅក្រមអាចនឹងសម្រេចលើកលែងការចោទប្រកាន់ ប្រសិនបើចៅក្រមរកមិនឃើញបទល្មើសនោះ។ ផ្ទុយទៅវិញ ក្នុងករណីចៅក្រមស៊ើបអង្កេតរកឃើញមានបទល្មើសថ្មីនោះ ចៅក្រុមស៊ើបនឹងចោទប្រកាន់បន្ថែមទៀត។ មកដល់ល្ងាចម៉ោង៦ថ្ងៃព្រហស្បតិ៍នេះ ការសាកសួរនៅមិនទាន់ចប់នៅឡើយទេ។
នៅពេលដែលតុលាការកម្ពុជាកំពុងសួរចម្លើយបន្ថែមទៅលើជនជាតិថៃទាំង៧នាក់នោះ ស្ថានភាពនៅព្រំដែនត្រង់ចំនុចបង្គោលព្រំដែនលេខ៤៦ដែលមានបញ្ហានោះបានស្រាកស្រានទៅវិញហើយនៅថ្ងៃនេះ។ ប្រភពយោធាពីចំនុចព្រំដែនបានបញ្ជាក់អោយដឹងថា គេមិនឃើញមានវត្តមានក្រុមបាតុករអាវលឿងព្យាយាមរុលមកចំនុចបង្គោលព្រំដែនទៀតនោះទេ។ ប្រភពដដែលបានបន្តថា គេក៏មិនបានឃើញក្រុមទាហានឈុតខ្មៅថៃ ដាក់ពង្រាយកម្លាំងរបស់ខ្លួននៅតាមព្រំដែនទៀតដែរ។
គួររម្លឹកថា ក្រុមបាតុករអាវលឿងបានព្យាយាមរុលមកចំនុចព្រំដែនលេខ៤៦ ដើម្បីតវ៉ាអោយកម្ពុជាដោះលែងជនជាតិថៃទាំង៧នាក់ដែលអាជ្ញាធរកម្ពុជាបានចាប់ខ្លួនតាំងពីថ្ងៃទី២៩ធ្នូ។ អាជ្ញាធរថៃបានដាក់ពង្រាយកម្លាំងកងទ័ពជាច្រើនដើម្បីទប់ស្កាត់ និងបំបែកក្រុមបាតុករមិនអោយពួកគេចូលមកជិតចំនុចព្រំដែន ដើម្បីចៀសវាងការបង្កបញ្ហាកាន់តែធ្ងន់ធ្ងរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ