ប្រមុខការទូតថៃស្នើរដ្ឋាភិបាលពិចារណាលើទំនាក់ទំនងកម្ពុជា ថៃ
កាសែតថៃបានផ្សាយថា រដ្ឋមន្ត្រីការបរទេសថៃ លោកកាស៊ីត ភិរម្យបានស្នើទៅរដ្ឋាភិបាលខ្លួនអោយពិចារណាអំពីទំនាក់ទំនងរបស់ថៃ ជាមួយកម្ពុជាឡើងវិញ ប្រសិនបើកម្ពុជាមិនព្រមសម្រួលស្ថានការណ៍នៃការចាប់ខ្លួនជនជាតិថៃ ទាំង៧នាក់នោះ។ ចំពោះកម្ពុជាវិញ យោងតាមការអះអាងរបស់អ្នកនាំពាក្យក្រសួងការបរទេស កម្ពុជាមិនយកបញ្ហាចាប់ខ្លួនជនជាតិថៃនេះ ទៅឡូកឡំជាមួយទំនាក់ទំនងការទូតនោះឡើយ។ នៅថ្ងៃស្អែក ជនជាតិថៃទាំង៧នាក់នឹងត្រូវតុលាការរាជធានីសាកសួរបន្ថែមទៀត។
ចុះផ្សាយនៅថ្ងៃ៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
កាសែតថៃ The Nation បានផ្សាយនៅថ្ងៃពុធទី៥មករានេះថា ប្រមុខការទូតថៃលោកកាស៊ីត ភិរម្យបានថ្លែងប្រាប់រដ្ឋាភិបាលរបស់ខ្លួនថា លោកមិនអាចដោះស្រាយបញ្ហាការចាប់ខ្លួនជនជាតិថៃទាំង៧ ពីសំណាក់អាជ្ញាធរកម្ពុជានោះទេ។ ហើយលោករដ្ឋមន្ត្រីការបរទេសថៃរូបនេះ បានស្នើអោយរដ្ឋាភិបាលថៃពិនិត្យមើលទំនាក់ទំនងកម្ពុជាថៃឡើងវិញ។ កាសែតថៃដែលបានដកស្រង់ប្រភពមិនបញ្ចេញឈ្មោះរបស់រដ្ឋាភិបាលថៃ មិនបានបញ្ជាក់លំអិតអំពីអត្ថន័យនៃការពិចារណាលើទំនាក់ទំនងកម្ពុជាថៃ ដែលស្នើដោយរដ្ឋមន្ត្រីការបរទេសថៃនោះឡើយ។
ប៉ុន្តែ ទោះយ៉ាងណាក៏ដោយ កម្ពុជាមិនខ្វល់ពីសំដីរបស់លោកកាស៊ីតនោះទេ។ អ្នកនាំពាក្យក្រសួងការបរទេសកម្ពុជាលោកកុយ គួងបានបញ្ជាក់ប្រាប់ថា កម្ពុជានៅមានជំហរដដែលគឺថា ការចាប់ខ្លួនជនជាតិថៃទាំង៧នាក់គឺជារឿងដោយឡែកមួយដែលមិនពាក់ព័ន្ធនឹងទំនាក់ទំនងកម្ពុជាថៃនោះឡើយ។ លោកកុយ គួងបន្តថា លោករដ្ឋមន្ត្រីការបរទេសថៃក៏បានយល់ដូចគ្នាអំពីបញ្ហានេះ នៅពេលដែលលោកបានមកជួបលោករដ្ឋមន្ត្រីការបរទេសខ្មែរ មួយថ្ងៃក្រោយការចាប់ខ្លួនជនជាតិថៃទាំងនោះ។
នៅថ្ងៃព្រហស្បតិ៍ទី៦មករាស្អែកនេះ តុលាការរាជធានីភ្នំពេញ នឹងកោះហៅសាកសួរជនជាតិថៃទាំង៧នាក់ នេះបើតាមការបញ្ជាក់របស់លោករស់ អូន មេធាវីមួយរូបរបស់ជនជាតិថៃទាំង៧នាក់នេះ។ មេធាវីរូបនេះបន្តថា បន្ទាប់ពីការសាកសួរនេះ លោកនឹងធ្វើសំណើសុំដោះលែងកូនក្តីរបស់លោកអោយនៅក្រៅឃុំបណ្តោះអាសន្ន។
ទាក់ទងនឹងការចាប់ខ្លួនជនជាតិថៃទាំង៧នាក់នេះដដែល តាំងពីថ្ងៃម្សិលមិញបណ្តាញសារព័ត៌មានអនឡាញជាច្រើនបានផ្សព្វផ្សាយវីដេអូក្លីបដែលបង្ហាញពីសកម្មភាពជនជាតិថៃទាំង៧ដើរចូលទឹកដីកម្ពុជា។ ខ្សែវីដេអូដដែលបានបង្ហាញថា សមាជិកសភាលោក ផានិច វីគីតស្រេតបានកំពុងនិយាយទូរស័ព្ទជាមួយមនុស្សម្នាក់ ហើយប្រាប់អោយមនុស្សម្នាក់នោះប្រាប់ទៅជំនួយការលោកនាយករដ្ឋមន្ត្រីថៃថា លោកបានចូលដល់ទឹកដីកម្ពុជាហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ