កងទ័ពកម្ពុជាស្ថិតក្នុងលក្ខណៈត្រៀមទប់ស្កាត់បាតុករអាវលឿងជានិច្ច
នៅថ្ងៃអង្គារទី៤មករានេះ កងទ័ពកម្ពុជាកំពុងស្ថិតក្នុងសភាពប្រុងជើងការជានិច្ចដើម្បីទប់ ស្កាត់ក្រុមពូកបាតុករអាវលឿងដែលបានរុលចូលមកក្បែរចំនុចបង្គោល ព្រំដែនលេខ៤៦កម្ពុជា-ថៃ។ អាជ្ញាធរថៃបានបន្ថែមកងទ័ពឈុតខ្មៅនិងរថពាសដែកដើម្បីទប់ស្កាត់មិន អោយបាតុករអាវលឿងចូលមកដល់ចំនុចព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
នៅម៉ោង៥ល្ងាចថ្ងៃអង្គារទី៤មករានេះ ក្រុមបាតុករថៃអាវលឿងជាច្រើនរយនាក់បានរុលចូលមកដល់ចម្ងាយ៤គីឡូម៉ែត្រមុនចំនុចបង្គោលព្រំដែនលេខ៤៦ហើយក្នុងទឹកដីថៃ។ អភិបាលរងខេត្តបន្ទាយមានជ័យ លោកអ៊ឹម ភាន់សុផលបានរៀបរាប់អោយដឹងថា កងទ័ពកម្ពុជាបានស្ថិតនៅក្នុងសភាពប្រុងជើងការជានិច្ច ដើម្បីការពារបូរណភាពទឹកដី។ អភិបាលរងខេត្តបន្ទាយមានជ័យបានបញ្ជាក់ផងដែរថា ប្រជាជនថៃក្នុងខេត្តស្រះកែវក៏បានជួយទប់ស្កាត់ក្រុមបាតុករអាវលឿងផងដែរ។
ប៉ុន្តែ ដោយហេតុក្រុមអាវលឿងបានកេណ្ឌគ្នាបានយ៉ាងច្រើននៅល្ងាចថ្ងៃអង្គារនេះ អាជ្ញាធរខេត្តស្រះកែវប្រទេសថៃដែលស្ថិតនៅទល់មុខខេត្តបន្ទាយមានជ័យរបស់កម្ពុជានោះ បានពង្រាយរថពាសដែក៥គ្រឿង និងកម្លាំងកងទ័ពឈុតខ្មៅបន្ថែមទៀត នៅក្បែរចំនុចបង្គោលព្រំដែនលេខ៤៦ ដែលជាគោលដៅរបស់ក្រុមបាតុករអាវលឿង។ ចំនុចបង្គោលព្រំដែនលេខ៤៦នេះហើយដែលជនជាតិថៃ៧នាក់ដែលក្នុងនោះមានសមាជិកសភាបក្សប្រជាធិបតេយ្យរបស់លោកនាយករដ្ឋមន្ត្រីថៃអាប់ភីស៊ីត វេចាជីវ៉ាម្នាក់ និងសមាជិកក្រុមអាវលឿងម្នាក់ បានដើរឆ្លងកាត់ហើយចូលមកដល់ក្នុងភូមិរបស់កម្ពុជា ហើយដែលត្រូវបានអាជ្ញាធរកម្ពុជាចាប់ឃាត់ខ្លួនពីបទឆ្លងដែនខុសច្បាប់។
ក្រុមបាតុករអាវលឿង បានព្យាយាមស្រែកតវ៉ា ចាក់មីក្រូ ទាំងថ្ងៃ និងទាំងយប់អធ្រាត្រ នៅក្បែរស្ថានអគ្គកុងស៊ុលកម្ពុជាក្នុងស្រុកអារញ្ញតាំងពីម្សិលមិញ។ ហើយរហូតដល់រសៀលម៉ោង១នៅថ្ងៃអង្គារនេះ ទើបក្រុមអាជ្ញាធរថៃបានបំបែកពួកគេអោយត្រលប់ក្រោយវិញ។ ប៉ុន្តែពួកគេបានកែនជួបជុំគ្នា ហើយរុលមកខាងចំនុចបង្គោលព្រំដែនលេខ៤៦ដែលស្ថិតនៅក្នុងស្រុកគោកធ្យូងទល់មុខឃុំអូបីជាន់ ខេត្តបន្ទាយមានជ័យ។ មកដល់ព្រលប់ថ្ងៃអង្គារនេះ មិនទាន់មានព័ត៌មានបន្ថែមពីសភាពការណ៍ក្រុមអាវលឿងនិងអាជ្ញាធរថៃនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ