ជម្លោះរវាងអ្នកនយោបាយ និងដំណោះស្រាយតាមរបៀបខ្មែរ
ចុះផ្សាយនៅថ្ងៃ៖
ស្តាប់ - ០៣:៥៧
ទំនាស់រវាងបក្សប្រឆាំងនិងរដ្ឋាភិបាលក្នុងសំណុំរឿងព្រំដែនកំពុងតែ តានតឹងខ្លាំងឡើងជាលំដាប់ក្នុងរយៈពេលចុងក្រោយនេះ។ តុលាការសាលាដំបូងរាជធានីភ្នំពេញបានផ្តន្ទាទោសលោកសម រង្ស៊ីឲ្យជាប់ពន្ធនាគារ១០ឆ្នាំ។ ចំណែកលោកសម រង្ស៊ីឯណោះវិញបានប្រកាសប្តឹងលោកនាយករដ្ឋមន្ត្រីទៅតុលាការសហរដ្ឋ អាមេរិក ក្នុងរឿងភេរវកម្មគប់គ្រាប់បែក កាលពីឆ្នាំ១៩៩៧។ នេះជាយុទ្ធសាស្ត្រវាយបករបស់មេដឹកនាំបក្សប្រឆាំងតបទៅលោកនាយក រដ្ឋមន្ត្រីហ៊ុន សែន។ តើការសម្របសម្រួលគ្នាដែលអ្នកនយោបាយខ្មែរតែងប្រើកន្លងទៅ នៅតែមានតម្លៃដែរឬទេក្នុងសំណុំរឿងព្រំដែន?
ដំណោះស្រាយក្នុងសំណុំរឿងលោកសម រង្ស៊ី កាន់តែឈានទៅរកស្ថានភាពងងឹតសូន្យសុងឡើងជាលំដាប់ក្នុងរយៈពេលចុងក្រោយនេះ។ មេដឹកនាំបក្សប្រឆាំង ដែលត្រូវបានតុលាការខេត្តស្វាយរៀងផ្តន្ទាទោសឲ្យជាប់ពន្ធនាគារ២ឆ្នាំកាលពីខែមករាកន្លងទៅ ឥឡូវនេះតុលាការរាជធានីភ្នំពេញផ្តន្ទាទោសឲ្យជាប់ពន្ធនាគារ១០ឆ្នាំទៀតក្នុងសំណុំរឿងព្រំដែនដដែល។ ពេលនេះភាគីទាំងសងខាងកំពុងបង្កើនភាពក្រអឺតក្រទមដាក់គ្នាកាន់តែខ្លាំងដោយម្ខាងអាងលើសហគមន៍អន្តរជាតិឯម្ខាងទៀតអាងលើសាលក្រមរបស់តុលាការ។
អំណាចសាលក្រមតុលាការបានធ្វើឲ្យលោកសម រង្ស៊ីក្លាយជាពិរុទ្ធជនជាថ្មីម្តងទៀតនៅពេលនេះបើទោះបីជាលោកមិនទទួលយកការកាត់ក្តីនេះក៏ដោយចុះ។ នេះបើនិយាយពីបញ្ហាផ្លូវច្បាប់ ប៉ុន្តែ បើនិយាយពីផ្លូវនយោបាយ កុំថាឡើយរឿងប៉ុណ្ណឹង រឿងធំជាងនេះដប់ដងក៏អាចដោះស្រាយបានដែរ។ ការលើកលែងទោសរបស់ព្រះមហាក្សត្រតាមសំណើរបស់នាយករដ្ឋមន្ត្រី គឺជាច្រកចុងក្រោយនិងតែមួយគត់សម្រាប់រាល់ដំណោះស្រាយបញ្ហារបស់អ្នកនយោបាយដូចដែលគេធ្លាប់បានឃើញជាហូរហែរួចហើយ។ ប៉ុន្តែ មុននឹងឈានដល់ការលើកលែងទោស ភាគីទាំងពីរត្រូវឆ្លងកាត់ដំណាក់កាលសម្របសម្រួលនយោបាយមួយដែលទាមទារឲ្យមានការធ្វើសម្បទានទៅវិញទៅមកជាចាំបាច់។
ក៏ប៉ុន្តែ ព្រឹត្តិការណ៍ដែលកំពុងតែកើតឡើងនៅពេលនេះ ហាក់ដូចជាដើរបញ្រ្ចាសទិសនៃចរន្តសម្របសម្រួល១៨០អង្សាទៅវិញ។ គណបក្សកាន់អំណាចបានប្រកាសបិទផ្លូវចំពោះការសម្របសម្រួលជាមួយលោកសម រង្ស៊ី រីឯលោកសម រង្ស៊ីវិញបានសម្រេចចិត្តសើរើរឿងចាស់ដែលលោកធ្លាប់បានសម្របសម្រួលជាមួយលោកនាយករដ្ឋមន្ត្រីម្តងរួចហើយនោះមកធ្វើជារឿងថ្មីឡើងវិញ។ នោះគឺការប្តឹងលោកនាយករដ្ឋមន្ត្រីទៅតុលាការសហរដ្ឋអាមេរិកទាក់ទិននឹងអំពើភេរវកម្មគប់គ្រាប់បែកក្នុងហ្វូងបាតុករកាលពីខែមីនាឆ្នាំ១៩៩៧ នៅមុខមន្ទីររដ្ឋសភាជាតិ។
មេដឹកនាំបក្សប្រឆាំងទំនងជាសង្ឃឹមថា ពាក្យបណ្តឹងរបស់ខ្លួនអាចយកមកធ្វើជាថ្នូរសម្រាប់ការសម្របសម្រួលនយោបាយដូចកាលពីចុងឆ្នាំ២០០៥ម្តងទៀត។ វាជារឿងធម្មតាទេដែលលោកសម រង្ស៊ីត្រូវស្វែងរកទម្ងន់ដៃដើម្បីតទល់ជាមួយគូបដិបក្ខរបស់ខ្លួន។ ប្រសិនបើយុទ្ធសាស្ត្រនេះសម្រេចផល វាជាការល្អសម្រាប់អនាគតនយោបាយរបស់មេបក្សប្រឆាំង ប៉ុន្តែ បើផ្ទុយពីនេះ លោកសម រង្ស៊ីប្រហែលជាត្រូវប្រឈមមុខនឹងការនិរទេសខ្លួនក្នុងរយៈពេលយូរតទៅទៀតពោលគឺអាចយូររហូតដល់ផុតរដូវបោះឆ្នោតឆ្នាំ២០១២និង២០១៣ខាងមុខនេះ។
ដូច្នេះ សម្រាប់កាលៈទេសៈនៃការបោះឆ្នោត ការចាប់ផ្តើមរកដំណោះស្រាយកាន់តែឆាប់ កាន់តែល្អ។ ប៉ុន្តែ ដោយហេតុថាបញ្ហាព្រំដែនជាចំណុចរសើបហើយដែលទាក់ទិនដល់ប្រជាប្រិយភាពនយោបាយផងនោះ ការសម្របសម្រួលនយោបាយប្រាកដជាមានលក្ខណៈស្មុគស្មាញជាងបញ្ហាផ្សេងទៀតជាមិនខាន។ ទោះជាយ៉ាងណា គេដូចជាគ្មានឃើញច្រកណាផ្សេងក្រៅពីវិធីដោះស្រាយតាមរបៀបខ្មែរដែលអ្នកនយោបាយធ្លាប់ប្រើកន្លងទៅនោះឡើយ។
ប៉ុន្តែ ការសម្របសម្រួលខាងនយោបាយដែលគេតែងប្រើជាហូរហែមកនោះមិនមែនសុទ្ធតែល្អនោះដែរ។ ចំណុចល្អរបស់វានៅត្រង់ថាគេអាចបញ្ចប់រាល់បញ្ហាតូចធំទាំងឡាយដែលកើតមានឡើង។ ប៉ុន្តែ វិធីសម្របសម្រួលនយោបាយក៏អាចបង្កើតទម្លាប់អាក្រក់មួយសម្រាប់អ្នកនយោបាយដែរពោលគឺអ្នកនយោបាយងាយនឹងបង្កើតបញ្ហាផ្សេងៗគ្រប់បែបយ៉ាងដើម្បីប្រជាប្រិយភាពរបស់ខ្លួនទោះជាត្រូវប្រើមធ្យោបាយអ្វីក៏ដោយ និងទោះបីជាបញ្ហានោះមានកម្រិតធ្ងន់ធ្ងរក៏ដោយពីព្រោះ ទីបំផុតទៅពួកគេអាចតថ្លៃគ្នាបានដើម្បីបញ្ចប់បញ្ហាទាំងនោះ។
ក្នុងបរិបទនេះ ការបណ្តុះវប្បធម៌ប្រជាធិបតេយ្យ និងវប្បធម៌ទទួលខុសត្រូវក្នុងចំណោមអ្នកនយោបាយប្រហែលជាការចាំបាច់ជាងដើម្បីធានាឲ្យមាននីតិរដ្ឋពិតប្រាកដមួយនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ