តុលាការផ្តន្ទាទោសដាក់ពន្ធនាគារសមរង្ស៊ី១០ឆ្នាំ
នៅថ្ងៃព្រហស្បតិ៍នេះ តុលាការក្រុងភ្នំពេញបានប្រកាសសាលក្រម ផ្តន្ទាទោសលោក សមរង្ស៊ីដាក់ពន្ធនាគាររយៈពេល ១០ ឆ្នាំ ព្រមទាំងពិន័យជាប្រាក់សរុប ៦៥ លានរៀលស្មើប្រមាណ១៥.០០០ ដុល្លារអាមេរិកក្នុងសំណុំរឿងផែនទីក្លែងក្លាយ។ចំពោះសេចក្តីសម្រេចរបស់តុលាការផ្តន្ទាទោសលោកសមរង្ស៊ីដូច្នេះ ត្រូវបានមេធាវីការពារលោកសមរង្ស៊ី និងតំណាងរាស្ត្រគណបក្សសមរង្ស៊ី ចាត់ទុកថា ជារឿងអយុត្តិធម៌ និងគ្រោងប្តឹងឧទ្ធរណ៍ប្រឆាំងនឹងការសម្រេចនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
ប្រតិកម្មរបស់លោក សម រង្ស៊ី
បន្ទាប់ពីសវនាការកាលពីថ្ងៃទី៨ ខែកញ្ញា នៅព្រឹកថ្ងៃ២៣កញ្ញានេះ លោកចៅក្រម កែ សាខន ប្រធានក្រុមប្រឹក្សាជំនុំជម្រះតុលាការក្រុងភ្នំពេញ បានប្រកាសសាលក្រមផ្តន្ទាទោសលោក សមរង្ស៊ី ដាក់ពន្ធនាគារ ១០ ឆ្នាំនិងពិន័យជាប្រាក់សរុប៦៥ លានរៀល ស្មើប្រមាណ ១៥.០០០ ដុល្លារអាមេរិក។ ក្រៅការសម្រេចផ្តន្ទាទោស ក្នុងរឿងផែនទីក្លែងក្លាយនេះ លោកសមរង្ស៊ី ដែលកំពុងរស់នៅក្រៅប្រទេស ក៏ត្រូវតុលាការ សម្រេចចេញដីកាបង្គាប់ឲ្យតាមចាប់ខ្លួនផងដែរ។
លោក សមរង្ស៊ី អាយុ ៦០ ឆ្នាំ ជាប់ចោទពីបទការក្លែងបន្លំអក្សរក្នុងឯកសារសាធារណៈនិងការផ្សាយព័ត៌មានមិនពិត តាមរយៈផែនទីក្លែងក្លាយដែលមេបក្សប្រឆាំងរូបនេះអះអាងថា ការបោះបង្គោលកំណត់ព្រំដែនកម្ពុជាវៀតណាម ក្នុងខេត្តស្វាយរៀង បានបោះចូលលើដីខ្មែរ។
លោកចៅក្រម កែ សាខន បានលើកឡើងថា លោក សមរង្ស៊ី បានលួចកែលិខិតផ្លូវការ គឺផែនទីប្រទេសកម្ពុជា ដោយសូកបញ្ចូលនូវលេខអក្សរសញ្ញា ដែលកំណត់ពីទីតាំងបង្គោលព្រំដែនលេខ ១៨៤, ១៨៥, ១៨៦ និង១៨៧ និងលើសន្លឹកផែនទីខុសពីការពិត ដោយយកទៅផ្សព្វផ្សាយជាសាធារណៈ ដើម្បីទម្លាក់កំហុសលើរដ្ឋាភិបាលកម្ពុជា ថាបានកាត់ទឹកដីឲ្យទៅប្រទេសវៀតណាម តាមរយៈការបោះតម្រុយបង្គោលព្រំដែននៅស្រុកចន្ទ្រាខេត្តស្វាយរៀង។
លោកចៅក្រម បានបន្ថែមថា ការទម្លាក់កំហុសរបស់មេបក្សប្រឆាំងនេះធ្វើឡើងដោយអសុច្ចចិត្ត ដើម្បីទទួលបានការចំណេញនយោបាយ។ ម្យ៉ាងវិញទៀត ការផ្សព្វផ្សាយឯកសារផែនទី តាមគេហទំព័រ និងការសម្ភាសន៍តាមវិទ្យុ ដែលបានផ្សព្វផ្សាយទូទាំងប្រទេសនិងជាអន្តរជាតិផងនោះ បានធ្វើឲ្យមានការយល់ច្រលំពីមជ្ឈដ្ឋានជាតិ និងអន្តរជាតិថា រាជរដ្ឋាភិបាលកម្ពុជា បានធ្វើកិច្ចការនាំឲ្យខូចប្រយោជន៍ជាតិ និងបាត់បង់ទឹកដី។
ចំពោះសេចក្តីសម្រេចរបស់តុលាការផ្តន្ទាទោសលោកសមរង្ស៊ីដូច្នេះ ត្រូវបានមេធាវីការពារលោកសមរង្ស៊ី និងតំណាងរាស្ត្រគណបក្សសមរង្ស៊ី ចាត់ទុកថា ជារឿងអយុត្តិធម៌ និងគ្រោងប្តឹងឧទ្ធរណ៍ប្រឆាំងនឹងការសម្រេចនេះ។
ក៏ប៉ុន្តែលោកមេធាវី គី តិច ដែលការពារពាក្យបណ្តឹងរបស់រដ្ឋាភិបាល បានលើកឡើងថា សាលក្រមផ្តន្ទាទោស និងពិន័យលើលោកសមរង្ស៊ីនេះ យើងអាចទទួលយកបាន ហើយតុលាការ បានផ្តល់យុត្តិធម៌ដល់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ