យន្តការប្រឆាំងអំពើពុករលួយមិនទាន់ទទួលបានទំនុកចិត្ត
ចុះផ្សាយនៅថ្ងៃ៖
ស្តាប់ - ០៤:០៦
សមាសភាព១១រូបនៃក្បាលម៉ាស៊ីន ដឹកនាំដើម្បីប្រយុទ្ធប្រឆាំងនឹងអំពើពុករលួយត្រូវបានកើតចេញជា រូបរាងហើយនៅក្នុងសប្តាហ៍នេះ។ វា គឺជាជំហានថ្មីមួយទៀតនៅក្នុងដំណើរការប្រយុទ្ធប្រឆាំងនឹងអំពើ ពុករលួយនៅកម្ពុជា។ ប៉ុន្តែ មនុស្សជាច្រើនបានសម្តែងការមិនទុកចិត្តចំពោះយន្តការនេះរួចជា ស្រេចទោះបីជាវាទើបតែប្រសូតនិងមិនទាន់ទាំងបានបំពេញការងារអ្វីសោះ ក៏ដោយ។ តើបុរេវិនិច្ឆ័យទៅលើ ស្ថាប័នជាតិប្រឆាំងអំពើពុករលួយនេះពិតជាត្រឹមត្រូវដែរឬទេ?
ក្រុមអ្នកតាមដានការវិវត្តន៍នៃច្បាប់ប្រឆាំងអំពើពុករលួយបានសម្តែងអារម្មណ៍ខុសៗគ្នាចំពោះការកើតចេញជារូបរាងនៃក្បាលម៉ាស៊ីនសម្រាប់ដំណើរការប្រយុទ្ធប្រឆាំងនឹងអំពើពុករលួយ។អ្នកខ្លះបានទះដៃអបអរសាទរខណៈដែលអ្នកខ្លះទៀតគ្រវីក្បាលឬអ្នកខ្លះទៀតជ្រួញចិញ្ចើម។
មនុស្សជាច្រើនហាក់ដូចជាច្បាស់ក្នុងចិត្តរួចទៅហើយថាស្ថាប័ននេះនឹងគ្មានប្រសិទ្ធភាពក្នុងការកម្ចាត់អំពើពុករលួយឡើយដោយហេតុថាសមាសភាពដែលត្រូវបានគេបង្ហាញកាលពីថ្ងៃអង្គារទំនងជាមិនអាចនឹងចៀសផុតពីការស្ថិតនៅក្រោមឥទ្ធិពលរបស់អ្នកមានអំណាចនោះឡើយ។បើដូច្នេះតើគេអាចរំពឹងថាយន្តការនេះអាចប្រយុទ្ធប្រឆាំងនឹងអំពើពុករលួយនៅក្នុងជួរមន្ត្រីមានអំណាចក្នុងរដ្ឋាភិបាលបានយ៉ាងដូចម្តេចនឹងកើត?នេះជាចំណោទទី១។
ចំណោទទី២គឺទាក់ទងនឹងឆន្ទៈរបស់រដ្ឋាភិបាលក្នុងការប្រយុទ្ធប្រឆាំងនឹងអំពើពុករលួយតែម្តង។តើរដ្ឋាភិបាលពិតជាមានសេចក្តីក្លាហានគ្រប់គ្រាន់ក្នុងការផ្តល់សិទ្ធិអំណាចពេញលេញដល់ស្ថាប័នជាតិប្រឆាំងអំពើពុករលួយដើម្បីឲ្យស្ថាប័នបំពេញការងារប្រកបដោយឯករាជភាពតាមវិជ្ជាជីវៈដែរឬទេ? ចំណោទទាំងនេះឯងដែលបានពូនផ្តុំបង្កើតបានជាបុរេវិនិច្ឆ័យអំពីកង្វះប្រសិទ្ធភាពនៃស្ថាប័នប្រឆាំងអំពើពុករលួយដ៏ក្មេងខ្ចីតែប្រកបដោយសមាសភាពអ្នកដឹកនាំចាស់។
យ៉ាងណាក៏ដោយការកកើតឡើងនៃច្បាប់ប្រឆាំងអំពើពុករលួយនិងការរៀបចំឲ្យមានយន្តការសម្រាប់បំបាត់អំពើពុករលួយនៅពេលនេះត្រូវគេមើលឃើញថាជាជំហានថ្មីមួយទៀតក្នុងកិច្ចខិតខំប្រឹងប្រែងរំដោះសង្គមខ្មែរឲ្យចាកផុតពីអំពើពុករលួយដ៏រ៉ាំរ៉ៃ។យ៉ាងហោចណាស់វាក៏ជាស្នូរជួងមួយដែលបន្លឺឡើងសម្រាប់ដាស់អារម្មណ៍ជនពុករលួយមិនឲ្យជិះសេះលែងដៃដូចពីមុនទៀតដែរ។
ម៉្យាងទៀតការវិនិច្ឆ័យទុកជាមុនមិនមែនសុទ្ធតែត្រូវទាំងអស់នោះទេ។អ្នកដឹកនាំរបស់យន្តការប្រឆាំងនឹងអំពើពុករលួយបានសំណូមពរឲ្យអ្នករិះគន់កុំអាលប្រញាប់ប្រញាល់ក្នុងការធ្វើសេចក្តីសន្និដ្ឋានខ្លាំងពេកដោយត្រូវរង់ចាំមើលការងាររបស់ពួកគេសិន។សំណូមពរនេះពិតជាសមហេតុផលហើយគេគួរទុកពេលឲ្យក្រុមការងារប្រឆាំងអំពើពុករលួយបញ្ចេញស្នាដៃរបស់ខ្លួនសិនមុននឹងធ្វើសេចក្តីសន្និដ្ឋានអំពីលទ្ធផល។
ដូច្នេះពីអំណឹះតទៅមានតែស្ថាប័នប្រឆាំងអំពើពុករលួយខ្លួនឯងទេដែលត្រូវបង្ហាញថាតើការទស្សទាយស្តីពីភាពកម្សោយរបស់ស្ថាប័ននេះពិតជាត្រឹមត្រូវឬក៏ជាការខុសស្រឡះពីការពិត។គេពិតជាអាចយល់បានពីការប្រយ័ត្នប្រយែងរបស់រដ្ឋាភិបាលក្នុងការអនុវត្តន៍ច្បាប់ប្រឆាំងអំពើពុករលួយពីព្រោះនេះជាបញ្ហាដ៏រសើបបំផុតមួយដែលអាចនឹងប៉ះពាល់ដល់ស្ថិរភាពនយោបាយផ្ទៃក្នុងរបស់រដ្ឋាភិបាល។ប៉ុន្តែអ្វីដែលគេមិនអាចយល់បាននោះគឺជុំវិញសំណួរថាតើរដ្ឋាភិបាលពិតជាមានឆន្ទៈពិតប្រាកដក្នុងការលុបបំបាត់អំពើពុករលួយដែរឬទេ?
ប្រសិនបើមានឆន្ទៈពិតប្រាកដរដ្ឋាភិបាលនឹងជំរុញស្ថាប័នប្រឆាំងអំពើពុករលួយដែលទើបតែកកើតឡើងនៅពេលនេះឲ្យអនុវត្តការងារប្រកបដោយប្រសិទ្ធភាពតាមរយៈការដាក់ទោសជនពុករលួយដោយមិនអត់អោននិងមិនរើសមុខ។បើធ្វើដូច្នេះបានមែនរដ្ឋាភិបាលមិនត្រឹមតែបំបាក់មុខក្រុមអ្នករិះគន់ប៉ុណ្ណោះទេតែក៏អាចធ្វើឲ្យប្រទេសជាតិអភិវឌ្ឍទៅមុខយ៉ាងលឿនទៀតផង។
ផ្ទុយទៅវិញប្រសិនបើស្ថាប័នប្រឆាំងអំពើពុករលួយបែរជាមិនអាចធ្វើអ្វីកើតសោះដូចការទាយទុកមែននោះវាប្រាកដណាស់ថាស្ថាប័ននេះមិនខុសអ្វីពីថូផ្កាឥតវិញ្ញាណដែលគេដាក់តាំងសម្រាប់លម្អតុប្រជុំនោះឡើយ។ឥឡូវនេះបាល់ស្ថិតក្នុងដៃរបស់ស្ថាប័នជាតិប្រឆាំងអំពើពុករលួយហើយ។តើពួកគេត្រូវធ្វើឲ្យអ្នករិះគន់ភ្លឺភ្នែកម្តងឬមួយក៏ទុកឲ្យបុរេវិនិច្ឆ័យនៅពេលនេះក្លាយជាការពិត?ទាំងនេះជាអ្វីដែលយើងត្រូវតាមដានមើលទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ