ក្រុមប្រឹក្សាជាតិប្រឆាំងអំពើពុករលួយកើតចេញជារូបរាង
សមាសភាពក្រុមប្រឹក្សាជាតិប្រឆាំងអំពើពុករលួយ ចំនួន ១១ រូប ត្រូវបានប្រកាស និងបង្ហាញមុខចូលរួមកិច្ចប្រជុំជាលើកដំបូង នៅព្រឹកថ្ងៃអង្គារ ទី១៥ ខែមិថុនានេះ។ ឥស្សរជនទាំង១១ រូបនោះ ក៏បានបោះឆ្នោតជ្រើសរើសប្រធាន និងអនុប្រធានស្ថាប័នកំពូល ប្រឆាំងអំពើពុករលួយ។ ជាលទ្ធផល លោក តុប សំ អតីតសមាជិកក្រុមប្រឹក្សាធម្មនុញ្ញត្រូវបានជ្រើសតាំងជាប្រធាន ក្រុមប្រឹក្សាជាតិប្រឆាំងអំពើពុករលួយ។ ចំណែកលោក ប្រាក់ សុខ ជាអតីតសមាជិកក្រុមប្រឹក្សាធម្មនុញ្ញ ក៏ត្រូវបានជ្រើសតាំងជាអនុប្រធានក្រុមប្រឹក្សាជាតិប្រឆាំង អំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លី ម៉េងហួរពីទីក្រុងភ្នំពេញ
នៅក្នុងកិច្ចប្រជុំដំបូង នៅព្រឹកមិញ (អង្គារ ទី ១៥ ខែ មិថុនា ២០១០) លោក ហេងវង្ស ប៊ុនឆាត សមាជិកក្រុមប្រឹក្សាជាតិប្រឆាំងអំពើពុករលួយ ដែលមានវ័យចាស់ជាងគេ បានដឹកនាំអង្គប្រជុំ និងបានប្រកាសពីសមាសភាពក្រុមប្រឹក្សាជាតិប្រឆាំងអំពើពុករលួយទាំង ១១ រូប ដែលទើបត្រូវបានព្រះមហាក្សត្រ ឡាយព្រះហស្តលេខាលើព្រះរាជក្រឹត្យតែងតាំង ដើម្បីប្រយុទ្ធប្រឆាំងនឹងអំពើពុករលួយ។
ឥស្សរជនទាំង ១១ រូបនោះ គឺ ទី១-លោក គុយ សុផល តែងតាំងដោយ ព្រះមហាក្សត្រ ទី២-លោក ប្រាក់ សុខ ជ្រើសតាំងដោយ ព្រឹទ្ធសភា ទី៣-លោក តុប សំ ជ្រើសតាំងដោយ រដ្ឋសភា ទី៤-លោក ច័ន្ទ តានី ជ្រើសតាំងចេញពី រាជរដ្ឋាភិបាល ទី៥-លោក អ៊ុត ឈន ជ្រើសតាំងចេញពី អាជ្ញាធរសវនកម្មជាតិ ទី៦-លោកស្រី សោម គឹមសួរ ជ្រើសតាំងចេញពីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ទី៧-លោក ហេងវង្ស ប៊ុនឆាត ជ្រើសតាំងចេញពី ក្រុមប្រឹក្សាអ្នកច្បាប់ ទី៨-លោក ស៊ុយ ម៉ុងលាង ជ្រើសតាំងចេញពី ក្រុមប្រឹក្សាកំណែទម្រង់ច្បាប់ និងប្រព័ន្ធយុត្តិធម៌, ទី៩-លោក ជីវ កេង តែងតាំងចេញពី ឧត្តមក្រុមប្រឹក្សានៃអង្គចៅក្រម ទី១០-លោក កែវ រ៉េមី តែងតាំងចេញពី គណៈកម្មាធិការសិទ្ធិមនុស្សកម្ពុជា និងទី១១-លោក ឱម យិនទៀង ប្រធានអង្គភាពប្រឆាំងអំពើពុករលួយ។
សមាសភាពទាំង ១១ រូបនេះ បានធ្វើការបោះឆ្នោតជាសម្ងាត់ ដើម្បីជ្រើសរើសប្រធាន និងអនុប្រធានក្រុមប្រឹក្សាជាតិប្រឆាំងអំពើពុករលួយ។ ជាលទ្ធផល ក្រោយពីបោះឆ្នោតជាសម្ងាត់ ដោយបិទទ្វារ គឺលោក តុប សំ ត្រូវបានជ្រើសតាំងជាប្រធាន រីឯលោក ប្រាក់ សុខ ជាអនុប្រធាន។
ជាការកត់សម្គាល់ សមាសភាពក្រុមប្រឹក្សាជាតិប្រឆាំងអំពើពុករលួយ ទាំង ១១ រូបនេះ សុទ្ធតែជាមន្ត្រីជាន់ខ្ពស់ក្នុងជួររដ្ឋាភិបាល និងជាសមាជិកគណបក្សប្រជាជនកម្ពុជា។ ចំពោះកិច្ចប្រជុំបោះឆ្នោតជ្រើសតាំងប្រធាន និងអនុប្រធាន របស់ក្រុមប្រឹក្សាជាតិប្រឆាំងអំពើពុករលួយនេះ ត្រូវបានលោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ ដែលទើបជាប់ឆ្នោតប្រកាសថា ចាប់ពីពេលនេះទៅ យន្តការសម្រាប់អនុវត្តច្បាប់ប្រឆាំងអំពើពុករលួយ បានបង្កើតហើយ។ លោកបានចាត់ទុកថា ជាព្រឹត្តិការណ៍ប្រវត្តិសាស្ត្រ សម្រាប់កម្ពុជា។
ក្នុងនាមជាប្រធានក្រុមប្រឹក្សាជាតិប្រឆាំងអំពើពុករលួយ លោក តុប សំ អតីតសមាជិកក្រុមប្រឹក្សាធម្មនុញ្ញបានបញ្ជាក់ថា សមាជិកក្រុមប្រឹក្សានេះ ត្រូវអនុវត្តតាមច្បាប់ ប្រឆាំងអំពើពុករលួយ ដែលបានកំណត់ពីភារកិច្ច ៧ ចំណុច ដើម្បីពិគ្រោះយោបល់ និងផ្តល់អនុសាសន៍លើការងារប្រយុទ្ធប្រឆាំងអំពើពុករលួយ។
នៅក្នុងសន្និសីទកាសែតព្រឹកមិញ លោក ឱម យិនទៀង ប្រធានអង្គភាពប្រឆាំងអំពើពុករលួយ និងជាសមាជិកក្រុមប្រឹក្សាជាតិប្រឆាំងអំពើពុករលួយ បានឲ្យដឹងថា ការងារប្រកាសទ្រព្យសម្បត្តិ ជាកិច្ចការទី១ ដែលក្រុមប្រឹក្សាថ្មីនេះ ត្រូវធ្វើ និងឲ្យបានលឿនទៀតផង។ នោះគឺការពិនិត្យពីទម្រង់បែបបទ កំណត់មុខសញ្ញា និងរបៀបប្រកាសទ្រព្យសម្បត្តិ ។ល។ និង។ល។
ដើម្បីឲ្យការងាររលូន មិនបង្កើតការសង្ស័យ ឬបង្កើតការភ័យខ្លាច។ ការប្រកាសទ្រព្យសម្បត្តិ ត្រូវធ្វើជាសម្ងាត់ លើមន្ត្រីរាជការ ដែលតែងតាំងដោយអនុក្រឹត្យ ពោលគឺចាប់ពីថ្នាក់ប្រធាននាយកដ្ឋាន រហូតដល់នាយករដ្ឋមន្ត្រី។
សមាសភាពក្រុមប្រឹក្សាជាតិប្រឆាំងអំពើពុករលួយ ដែលត្រូវបានប្រកាសនៅថ្ងៃនេះ ត្រូវបានសង្គមស៊ីវិល និងគណបក្សប្រឆាំង ប្រតិកម្មដូចពេលមុនៗ។ នោះគឺសមាសភាពទាំង១១រូបនេះ ត្រូវបានជ្រើសចេញពីគណបក្សនយោបាយ និងចេញពីជួររាជរដ្ឋាភិបាល។ ម្យ៉ាងទៀត សមាសភាពស្ថាប័នប្រឆាំងអំពើពុករលួយ មុខដដែលៗ និងធ្វើការប្រឆាំងអំពើពុករលួយយូរឆ្នាំមកហើយ តែមិនបានលទ្ធផលជាដុំកំភួនអ្វីសោះ។ ដូច្នេះសកម្មជនអង្គការសង្គមស៊ីវិល និងគណបក្សប្រឆាំង សម្តែងការសង្ស័យថា ក្រុមប្រឹក្សានេះ មិនអាចឯករាជ្យ និងធ្វើការមិនមានប្រសិទ្ធិភាពបានទេ។
យ៉ាងណាក៏ដោយ លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ បានស្នើឲ្យក្រុមអ្នកព្រួយបារម្ភ កុំទាន់អាលប្រញាប់ប្រញាល់វាយតម្លៃ និងរង់ចាំមើលការអនុវត្តន៍របស់ក្រុមប្រឹក្សាជាតិប្រឆាំងអំពើពុករលួយនេះ ដែលលោកអះអាងថា ឥស្សរជនទាំង ១១ រូប នឹងខិតខំបំពេញភារកិច្ច តាមច្បាប់កំណត់។
សមាសភាពទាំង ១១ រូប នឹងចូលធ្វើសច្ចាប្រណិធាន ស្បថចូលកាន់តំណែង នៅមុខព្រះភ័ក្ត្រព្រះមហាក្សត្រ ក្នុងព្រះបរមរាជវាំង នាព្រឹកថ្ងៃទី១៧ ខែមិថុនា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ