បញ្ហាព្រំដែន ៖ អធិករណ៍ដែលមិនអាចរំលត់បាន ?
ចុះផ្សាយនៅថ្ងៃ៖
ស្តាប់ - ០៣:៥១
ការប្រទូសរ៉ាយបានកើតឡើងមួយឈុត ទៀតកាលពីថ្ងៃទី៣មិថុនារវាងតំណាងរាស្រ្តគណបក្សសមរង្ស៊ីជាមួយ នឹងក្រុមប្រជាពលរដ្ឋដែលគាំទ្រគណបក្សប្រជាជនដោយមានអាជ្ញាធរនៅពី ក្រោយខ្នង។ ការប្រទូសរ៉ាយនេះ បានកើតឡើងខណៈពេលដែលតំណាងរាស្រ្តគណបក្សសមរង្ស៊ីមួយក្រុមបាន ចុះទៅពិនិត្យបង្គោលព្រំដែនក្នុងស្រុកបូរីជលសាខេត្តតាកែវប៉ុន្តែពួកគេត្រូវបានក្រុមអ្នកគាំទ្រគណបក្សកាន់អំណាចរារាំងដំណើរ។ នេះជាសញ្ញានៃការផ្ទុះឡើងនូវអធិករណ៍ ថ្មីទៀតជុំវិញបញ្ហាព្រំដែន ក្នុងខេត្តតាកែវខណៈដែលបញ្ហានៅឯស្វាយរៀងមិនទាន់ទាំងដោះស្រាយ ចប់ផង។
ការមិនចុះសម្រុងគ្នាស្តីពីការបោះបង្គោលព្រំដែនជាមួយប្រទេសវៀតណាមគឺជាជំងឺដ៏រ៉ាំរ៉ៃមួយសម្រាប់អ្នកនយោបាយខ្មែរ។ជំងឺនេះចេះតែរាលដាលពីកន្លែងមួយទៅកន្លែងមួយទៀតឥតឈប់ឈរនិងតែងក្លាយជាដើមចមនៃជម្លោះដ៏ជូរចត់រវាងអ្នកនយោបាយខ្មែរដែលម្នាក់ៗសុទ្ធតែអះអាងថាខ្លួនជាអ្នកស្នេហាជាតិនិងការពារទឹកដីមិនឲ្យបាត់បង់។
អស់ពីខេត្តស្វាយរៀងឥឡូវនេះជំងឺព្រំដែនបានរាលដាលដល់ខេត្តតាកែវទៀតហើយ។តំណាងរាស្រ្តគណបក្សសមរង្ស៊ីមួយក្រុមដែលបានចុះទៅពិនិត្យការបោះបង្គោលព្រំដែននៅស្រុកបូរីជលសាកាលពីថ្ងៃព្រហស្បតិ៍ត្រូវបានរារាំងឃាំងដំណើរដោយក្រុមអ្នកភូមិដែលគាំទ្រគណបក្សកាន់អំណាច។ការរារាំងនេះបណ្តាលឲ្យកើតរឿងរ៉ាវតឹងសរសៃកដាក់គ្នាតែមិនបណ្តាលឲ្យមានអំពើហិង្សាអ្វីទេ។យ៉ាងណាក៏ដោយសម្រាប់ក្រុមអ្នកតាមដានស្ថានការណ៍នយោបាយប្រទេសកម្ពុជានេះជាសញ្ញានៃការរាលដាលដំបៅចាស់ស្តីពីបញ្ហាព្រំដែន។
មកដល់ត្រង់នេះគេគួរងាកក្រោយបន្តិចទៅមើលអ្វីដែលបានកើតឡើងក្នុងខេត្តស្វាយរៀង។កាលពីថ្ងៃទី២៥តុលាឆ្នាំ២០០៩លោកសមរង្ស៊ីមេដឹកនាំបក្សប្រឆាំងបាននាំអ្នកភូមិមួយក្រុមទៅដកបង្គោលឈើដែលគេបោះបណ្តោះអាសន្នដើម្បីកំណត់ដែនសីមារវាងកម្ពុជានិងវៀតណាមនៅក្នុងភូមិកោះក្បានកណ្តាលស្រុកសំរោងខេត្តស្វាយរៀង។បង្គោលឈើទាំងនោះត្រូវបានមេដឹកនាំបក្សប្រឆាំងនិងពលរដ្ឋអមដំណើរដកគ្រវាត់ចោលដោយពួកគេចោទថាបានបោះនៅលើដីរបស់កសិករខ្មែរ។
ផ្តើមចេញពីការដកបង្គោលនេះលោកសមរង្ស៊ីត្រូវបានតុលាការខេត្តស្វាយរៀងកាត់ទោសឲ្យជាប់ពន្ធនាគារពីរឆ្នាំរីឯអ្នកភូមិពីរនាក់ទៀតត្រូវបានផ្តន្ទាទោសឲ្យជាប់ពន្ធនាគារមួយឆ្នាំ។ជាផលវិបាកលោកសមរង្ស៊ីត្រូវនិរទេសខ្លួនឯងទៅជ្រកកោននៅឯបរទេសរីឯកសិករពីរនាក់ដែលគ្មានលទ្ធភាពចេញទៅក្រៅប្រទេសកំពុងជាប់ក្នុងពន្ធនាគារ។រឿងរ៉ាវមិនបានបញ្ចប់ត្រឹមនេះឡើយ។លោកសមរង្ស៊ីត្រូវបានមេធាវីរាជរដ្ឋាភិបាលប្តឹងបន្ថែមទៀតពីបទក្លែងបន្លំឯកសារសាធារណៈ។ពាក្យបណ្តឹងនេះត្រូវបានដាក់ចូលទៅតុលាការរាជធានីភ្នំពេញបន្ទាប់ពីលោកសមរង្ស៊ីបានផ្សព្វផ្សាយឯកសារផែនទីដែលបង្ហាញពីការបាត់បង់ទឹកដីខ្មែរដោយសារការបោះបង្គោលព្រំដែន។ប៉ុន្តែអំណះអំណាងនេះត្រូវបានរដ្ឋាភិបាលចាត់ទុកជាការក្លែងបន្លំ។
ឥឡូវនេះរឿងភាគនៃបញ្ហាព្រំដែនបានរាលដាលដល់ខេត្តតាកែវហើយ។ពិតណាស់ថារដ្ឋាភិបាលមានអំណះអំណាងថាគេមិនចង់ឲ្យបក្សប្រឆាំងទៅឆាឆៅការងាររបស់គេឡើយព្រោះគេជាអ្នកដឹកនាំប្រទេស។ប៉ុន្តែការរារាំងតំណាងរាស្រ្តបក្សប្រឆាំងមិនឲ្យទៅពិនិត្យមើលបង្គោលដែលគេបានបោះរួចទៅហើយនោះវាហាក់ដូចជាបើកឧិកាសឲ្យគណបក្សប្រឆាំងមានមន្ទិលសង្ស័យអំពីតម្លាភាពនៃការបោះបង្គោលព្រំដែនទៅវិញទេហើយបានប្រើប្រាស់ក្តីមន្ទិលនេះដើម្បីវាយប្រហាររដ្ឋាភិបាល។
សុភាសិតបុរាណមួយបានពោលថា«មាសសុទ្ធមិនខ្លាចភ្លើង» យ៉ាងណាមិញរដ្ឋាភិបាលក៏គ្មានអ្វីដែលត្រូវខ្លាចឬលាក់បាំងឡើយប្រសិនបើការងាររបស់ខ្លួនពិតជាត្រឹមត្រូវតាមបច្ចេកទេសហើយនោះ។ផ្ទុយទៅវិញការបិទបាំងគឺជាប្រភពនៃក្តីមន្ទិលសង្ស័យគ្រប់បែបយ៉ាងជាពិសេសបញ្ហាព្រំដែនដែលជារឿងដ៏រសើបបំផុតមួយនោះក្តីមន្ទិលសង្ស័យងាយនឹងក្លាយជាបញ្ហាធំបាន។
សរុបមកវិញនៅក្នុងសំណុំរឿងព្រំដែនដ៏រសើបនិងជាបញ្ហារួមរបស់ជាតិទាំងមូលរដ្ឋាភិបាលនិងបក្សប្រឆាំងគួរតតាំងគ្នាតាមលក្ខណៈបច្ចេកទេសជាជាងការតតាំងតាមបែបនយោបាយ។ការលាក់បាំងមិនមែនជាដំណោះស្រាយឡើយតែវាបែរជាបង្កើនការសង្ស័យកាន់តែខ្លាំងទៅវិញទេ។រីឯការប្រែក្លាយបញ្ហាព្រំដែនឲ្យទៅជារឿងនយោបាយក៏រឹតតែធ្វើឲ្យខាតប្រយោជន៍ប្រទេសជាតិថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ