ប្រធានរដ្ឋសភាមិនអនុញ្ញាតអោយតំណាងរាស្ត្រ សមរង្ស៊ី ទៅមើលព្រំដែន
មិនចប់ឡើយសំណុំរឿងព្រំដែនកម្ពុជាវៀតណាមចំពោះ គណបក្សសម រង្ស៊ី។ នៅថ្ងៃទី៣១ឧសភា ម្សិលមិញ តំណាងរាស្ត្រគណបក្ស សម រង្ស៊ី ១៦រូប បានដាក់លិខិតជូនដំណឹងទៅលោក ហេង សំរិន ប្រធានរដ្ឋសភាអំពីការធ្វើដំណើររបស់ពួកគេទៅភូមិអញ្ចាញ ឃុំជ័យជោគ ស្រុកបូរីជលសារ ខេត្តតាកែវនៅថ្ងៃទី៣មិថុនា ដើម្បីពិនិត្យមើលដំណើរបោះបង្គោលព្រំដែនកម្ពុជាវៀតណាមលេខ២៧០។ បង្គោលលេខ២៧០ដែលតំណាងរាស្ត្រគណបក្សសម រង្ស៊ីអះអាងថា បានទទួលដំណឹងអំពីការបោះចូលក្នុងដីកម្ពុជាទៀត។ ប៉ុន្តែក្រុមតំណាងរាស្ត្រគណបក្ស សម រង្ស៊ី មិនបានទទួលចម្លើយពេញចិត្តពីប្រធានរដ្ឋសភានៅថ្ងៃ ទី១មិថុនានេះ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លាង ដឺលុច
នៅលើលិខិតជូនដំណឹងរបស់អ្នកតំណាងរាស្ត្រគណបក្ស សម រង្ស៊ី ដែលត្រូវបានផ្ញើទៅលោក ហេង សំរិន កាលពីថ្ងៃទី៣១ឧសភាម្សិលមិញ លោក ហេង សំរិន ប្រធានរដ្ឋសភាបានចារចម្លើយលើលិខិតនោះថា មិនអនុញ្ញាត និងមិនទទួលខុសត្រូវទេ។ ហើយបន្ថែមពីលើចំណារនេះ លោក ឡេង ប៉េងឡុង ដែលជាអគ្គលេខាធិការរដ្ឋសភាក៏បានធ្វើលិខិតឆ្លើយតបផ្លូវការមកតំណាងរាស្ត្រគណបក្ស សម រង្ស៊ី ស្តីពីចម្លើយបដិសេធរបស់ប្រធានរដ្ឋសភាដែរ។ ហើយនៅក្នុងលិខិតឆ្លើយតបនោះ លោក ឡេង ប៉េងឡុង បានសរសេរថា ប្រសិនបើគណបក្ស សម រង្ស៊ី ចង់ជ្រាបច្បាស់អំពីបញ្ហាព្រំដែននេះ គឺសូមអោយអ្នកតំណាងរាស្ត្រធ្វើសំណើអោយរដ្ឋាភិបាលឆ្លើយបំភ្លឺទៅ។
ក្រុមអ្នកតំណាងរាស្ត្រគណបក្សសម រង្ស៊ី បានសំដែងអារម្មណ៍សោកស្តាយចំពោះការសម្រេចចិត្តរបស់ប្រធានរដ្ឋសភាយ៉ាងនេះ។ លោក យឹម សុវណ្ណ អ្នកនាំពាក្យរបស់គណបក្ស សម រង្ស៊ី បានអត្ថាធិប្បាយថា នេះគឺជាការកំហិតសិទ្ធិរបស់អ្នកតំណាងរាស្ត្រ។ ទោះយ៉ាងណានេះក្តី បើតាមលោក យឹម សុវណ្ណ ក្រុមតំណាងរាស្ត្ររបស់លោកទាំង១៦រូបដែលបានចុះហត្ថលេខាលើលិខិតជូនដំណឹងទៅប្រធានរដ្ឋសភានោះ ពួកគេនឹងនៅតែចុះទៅពិនិត្យមើលបង្គោលព្រំដែនលេខ២៧០នៅឯខាងឃុំជ័យជោគ ស្រុកបូរីជលសារ ខេត្តតាកែវ នៅថ្ងៃទី៣មិថុនាតាមគម្រោងរបស់ពួកគេ។ លោក យឹម សុវណ្ណ ពន្យល់ថា ក្រុមតំណាងរាស្ត្ររបស់លោកនៅតែចុះទៅមើលបង្គោលព្រំដែននេះ ដើម្បីបំពេញកាតព្វកិច្ចជាអ្នកតំណាងរាស្ត្រ។
ទាក់ទងនឹងសំណុំរឿងព្រំដែនកម្ពុជាវៀតណាមដដែល ក្រុមតំណាងរាស្ត្រគណបក្ស សម រង្ស៊ី ក៏បានធ្វើលិខិតមួយ នៅថ្ងៃ១មិថុនានេះ ស្នើរកព្រះរាជអន្តរាគមន៍របស់សម្តេចឪ នរោត្តម សីហនុ។
នៅក្នុងលិខិតដែលតំណាងរាស្ត្រគណបក្ស សម រង្ស៊ី សរសេរទូលថ្វាយព្រះមហាវរក្សត្រនោះ តំណាងរាស្ត្រគណបក្សសម រង្ស៊ីសរសេរថា ខ្លួនបានដឹងតាមរយៈសារព័ត៌មានកន្លងមកថា សម្តេចឪ នរោត្តម សីហនុ ព្រះអង្គគ្រោងនឹងធ្វើព្រះរាជទស្សនកិច្ចនៅប្រទេសវៀតណាម។
តំណាងរាស្ត្រគណបក្ស សម រង្ស៊ី សរសេរថាដោយសារកន្លងមក គណបក្ស សម រង្ស៊ី ធ្លាប់បានស្នើអោយរដ្ឋាភិបាល និងរដ្ឋសភាដោះស្រាយបញ្ហាមិនប្រក្រតីក្នុងការបោះតម្រុយបង្គោលព្រំដែនកម្ពុជាវៀតណាមរួចហើយ តែមិនមានលទ្ធផលអ្វីសោះនោះ ដូច្នេះតំណាងរាស្ត្រគណបក្សសម រង្ស៊ី គិតថា មានតែសម្តេចឪ នរោត្តម សីហនុ ទេ ដែលអាចលើកយកបញ្ហាបន្ទាត់ព្រំដែនទៅពិភាក្សាជាមួយភាគីវៀតណាមបាន។ ធ្វើយ៉ាងណាអោយប្រទេសវៀតណាមគោរពអោយបានខ្ជាប់ខ្ជួនបូរណភាពទឹកដីកម្ពុជា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ