សហជីពកម្មករធំៗ ព្រមព្រៀង ទាមទារដំឡើងប្រាក់ខែកម្មករកាត់ដេរ ១៧៧ ដុល្លារ
ក្រុមសហជីពកម្មករធំៗ របស់លោក អាត់ ធន់ លោក ជាមុនី លោក ប៉ាវ ស៊ីណា លោក សោម អូន និងសហជីពរបស់លោក ជួន មុំថុល ជាដើម បានព្រមព្រៀងគ្នាថា នឹងទាមទារដំឡើងប្រាក់ខែកម្មកររោងចក្រកាត់ដេរ ទាបបំផុត ១៧៧ ដុល្លារ។ ការសម្រេចដូច្នេះ បានធ្វើឡើង ក្នុងកិច្ចប្រជុំសហជីព កាលពីថ្ងៃទី៣១ កក្កដា។ សហជីពកម្មករ នឹងយកសំណើទាមទារឡើងប្រាក់ខែនេះ ទៅដាក់លើតុប្រជុំជាមួយថៅកែរោងចក្រ ក្នុងខែសីហានេះ ព្រមទាំងកិច្ចប្រជុំត្រីភាគីរវាងសហជីព ថៅកែរោងចក្រ និងរដ្ឋាភិបាល នៅខែកញ្ញា។ រីឯកិច្ចប្រជុំគណៈកម្មការប្រឹក្សាការងារ ដើម្បីសម្រេចប្រាក់ឈ្នួលអប្បបរមា ផ្នែកវាយនភ័ណ្ឌកាត់ដេរសម្លៀកបំពាក់ និងផលិតស្បែកជើង សម្រាប់ឆ្នាំ២០១៥ នឹងធ្វើឡើងនៅដើមខែតុលារ។
ចុះផ្សាយនៅថ្ងៃ៖
ស្តាប់ - ០២:៥២
ជាការសម្រេចថ្មី ទើបតែធ្វើឡើង ក្នុងកិច្ចប្រជុំរវាងមេដឹកនាំសហជីពកម្មករធំៗជាង ១០ ស្ថាប័ន កាលពីថ្ងៃ៣១កក្កដាម្សិលមិញ។ នោះគឺសហភាពសម្ព័ន្ធសហជីពកម្មករ បានឯកភាពគ្នា ទាមទារតម្លើងប្រាក់ខែកម្មកររោងចក្រកាត់ដេរ ទាបបំផុត ១៧៧ ដុល្លារ ខុសពីជំហរដើម ដែលសហជីពកម្មករទាមទារដំឡើងត្រឹម ១៦០ ដុល្លារ។
អគ្គលេខាធិការ សហភាពការងារកម្ពុជា លោក បានពន្យល់ពីការឯកភាពថ្មីរបស់ក្រុមសហជីព លើការទាមទារឡើងប្រាក់ខែនេះថា មកពីការរកឃើញថ្មីបង្ហាញថា ថៅកែរោងចក្រ និងក្រុមទីផ្សារបញ្ជាទិញធំៗ ទទួលបានប្រាក់ចំណេញច្រើន ហើយមួយទៀត ប្រាក់ខែកម្មករកាត់ដេរ នៅកម្ពុជា ក៏ទាបជាងគេច្រើន បើធៀបនឹងប្រទេសថៃ វៀតណាម ឬក៏ឥណ្ឌូនេស៊ី។
ការសម្រេចរបស់សហជីព លើប្រាក់ខែកម្មកររោងចក្រកាត់ដេរ ឲ្យបានទាបបំផុត ១៧៧ ដុល្លារ នឹងត្រូវដាក់លើតុប្រជុំពិភាក្សា ជាមួយក្រុមថៅកែរោងចក្រកាត់ដេរនៅក្នុងខែសីហានេះ មុននឹងជួបប្រជុំពិភាក្សាត្រីភាគី រវាងសហជីព ថៅកែរោងចក្រ និងមន្ត្រីរដ្ឋាភិបាល នៅខែកញ្ញា។ ដោយឡែកតាមសេចក្តីសម្រេចរបស់គណៈកម្មការប្រឹក្សាការងារ កិច្ចប្រជុំត្រីភាគី រវាងតំណាងរដ្ឋាភិបាល ថៅកែរោងចក្រកាត់ដេរ និងសហជីពកម្មករ ដើម្បីសម្រេចលើការដំឡើងប្រាក់ឈ្នួលអប្បបរមា ដល់កម្មកររោងចក្រកាត់ដេរ សម្រាប់ឆ្នាំ២០១៥ នឹងត្រូវធ្វើឡើង នៅដើមខែតុលា។
ចំពោះការទាមទារថ្មីរបស់សហជីពដូច្នេះ ត្រូវបានលោក ជាតិ ខេមរ៉ា មន្ត្រីជាន់ខ្ពស់សមាគមរោងចក្រកាត់ដេរនៅកម្ពុជា បានលើកឡើងថា ប្រហែលជាពិបាកនឹងទទួលបាន ព្រោះការទាមទារពីមុន ដំឡើងប្រាក់ខែត្រឹមតែ ១៦០ ដុល្លារ គឺថៅកែរោងចក្រ មិនទាន់យល់ព្រមផង។ តំណាងថៅកែរោងចក្រ បានជំរុញឲ្យកម្មករអភិវឌ្ឍន៍ខ្លួនឯង ឲ្យមានជំនាញថែមទៀត ដើម្បីបង្កើនផលិតផល នៅពេលនោះ ប្រាក់ខែ នឹងកើនឡើងដែរ។
យ៉ាងណាក៏ដោយ មកដល់ពេលនេះ ភាគីថៅកែរោងចក្រ និងសហជីពកម្មករ មិនទាន់កំណត់ថ្ងៃជួបប្រជុំនឹងគ្នានៅឡើយទេ។ ប៉ុន្តែលោកជាតិខេមរ៉ា លើកឡើងថា អង្គការ ILO និងធនាគារពិភពលោក កំពុងតែសិក្សាពីប្រាក់ខែកម្មករ ដើម្បីធ្វើជាគោល ក្នុងការពិភាក្សា ឡើងប្រាក់ខែកម្មករកាត់ដេរ។
សូមរម្លឹកថា កម្មកររោងចក្រកាត់ដេរ សព្វថ្ងៃ ទទួលបានប្រាក់ខែទាបបំផុត ១០០ ដុល្លារ។ ការសម្រេចនេះ បានអនុវត្ត ចាប់ពីខែកុម្ភៈ ឆ្នាំ២០។ ប៉ុន្តែសហជីព និងកម្មករមួយចំនួន បានតវ៉ា ទាមទារឡើងដល់ ១៦០ ដុល្លារ ដោយមានទាំងបាតុកម្មទ្រង់ទ្រាយធំ កាលពីចុងខែធ្នូ ឆ្នាំ២០១៣ និងដើមខែមករា ឆ្នាំ២០។ ប៉ុន្តែកម្មកររោងចក្រ បានត្រឹមតែរបួស ស្លាប់ និងមួយចំនួន ត្រូវចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ