តុលាការលើកចោលបណ្ដឹងរបស់លោក អ៊ុំ វិសាល ដែលប្រឆាំងនឹងលោក អាត់ ធន់
សាលាដំបូងរាជធានីភ្នំពេញបានសម្រេចលើកចោលបណ្ដឹងរក្សាការពារ ដាក់ដោយលោក អ៊ុំវិសាល និងអ្នកស្រី រឿន ចាន់ថន ដែលបានស្នើឲ្យតុលាការព្យួរការងារលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU)។ លោក អាត់ ធន់ ត្រូវបាន លោក អ៊ុំ វិសាល ចោទថាបានដឹកនាំអង្គភាពទៅរកអស្ថិរភាព។ បច្ចុប្បន្នលោក អាត់ ធន់ រងបណ្ដឹងនៅតុលាការចំនួនដល់ទៅ៧ហើយ។
ចុះផ្សាយនៅថ្ងៃ៖
ស្តាប់ - ០១:២៥
ចៅក្រម លី លីបម៉េង នៃសាលាដំបូងរាជធានីភ្នំពេញ កាលពីសប្តាហ៍មុន បានសម្រេចលើកចោលពាក្យបណ្តឹងសុំរក្សាការពារ របស់លោក អ៊ុំ វិសាល និងអ្នកស្រី រឿន ចាន់ថន ដែលស្នើឲ្យតុលាការព្យួរការងាររបស់លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ។ លោក អាត់ ធន់ ត្រូវបានអ្នកទាំងពីរ ដែលជាស្ថាបនិកស៊ីខៅឌូ ចោទថា បានដឹកនាំអង្គភាពទៅរកអស្ថិរភាព។
មេធាវី គីម សុជាតិ ដែលការពារក្តីឲ្យលោក អាត់ ធន់(C.CAWDU) មានប្រសាសន៍ថា ការសម្រេចរបស់តុលាការជាការត្រឹមត្រូវ។ លោកអបអរសាទរ ទៅនឹងសេចក្តីសម្រេចនេះ ដោយលោកយល់ឃើញថា ការសម្រេចរបស់តុលាការត្រឹមត្រូវទៅតាមច្បាប់ ដោយគោរពតាមធម្មនុញ្ញ របស់សម្ព័ន្ធសហជីពស៊ីខៅឌូ និងអង្គហេតុពិត។
សូមបញ្ជាក់ផងដែរថា លោក អ៊ុំ វិសាល និងអ្នកស្រី រឿន ច័ន្ទថន ត្រូវបានក្រុមប្រឹក្សាតំណាង នៃសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បញ្ឈប់ជាបុគ្គលិកស្ថាបនិក ឬបុគ្គលិកសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា តាមសេចក្តីសម្រេច ចុះថ្ងៃទី៣០ ខែមិនា ឆ្នាំ២០១៤ ដោយយល់ថា សកម្មភាពអ្នកទាំងពីរ បានបង្កឲ្យមានផលប៉ះពាល់យ៉ាងធ្ងន់ធ្ងរដល់់អង្គភាព។
ទោះបីជាយ៉ាងនេះក្តី បច្ចុប្បន្ន លោក អាត់ ធន់ រងបណ្ដឹងនៅតុលាការចំនួន៧ហើយ ក្នុងនោះមានបណ្ដឹងទាក់ទងនឹងការគៃបន្លំប្រាក់កម្មករចំនួន៩ម៉ឺន៣ពាន់ដុល្លារ បណ្ដឹងរបស់សមាគមរោងចក្រកាត់ដែរនៅកម្ពុជា និងបណ្ដឹងរបស់រោងចក្រអេសអិលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ