សហជីពប្រជុំអនុម័តសំណើរួម ទៅលើសេចក្ដីព្រាងច្បាប់ស្ដីពីសហជីព
នៅសណ្ឋាគារហ្គ្រីនផាលេស សហជីពនៅកម្ពុជា សហការជាមួយក្រុមប្រឹក្សាសហជីព ITUC-CC និងអង្គការពាក់ព័ន្ធ បានជួបប្រជុំគ្នានៅព្រឹកថ្ងៃចន្ទ ទី១៤កក្កដានេះ ដើម្បីផ្ដល់យោបល់លើសេចក្ដីព្រាងច្បាប់សហជីព។ ក្រៅពីនោះ សហជីពដែលចូលរួម ក៏មានឱកាសបន្តពិភាក្សាគ្នា អំពីការកំណត់ទូរលេខ ដើម្បីចរចាលើប្រាក់ឈ្នួលអប្បបរមាសម្រាប់កម្មករកាត់ដេរផងដែរ។
ចុះផ្សាយនៅថ្ងៃ៖
ស្តាប់ - ០១:៤៥
តំណាងសហជីពជាតិ និងអន្ដរជាតិជាង៥០ ជួបប្រជុំគ្នានៅថ្ងៃចន្ទ ទី១៤កក្កដានេះ ដើម្បីផ្ដល់យោបល់ និងអនុម័តនូវមាត្រាមួយចំនួនដែលសហជីពស្នើសុំឲ្យមានការកែប្រែ មុននឹងបញ្ជូនសំណើនេះទៅកាន់ក្រសួងការងារ ដើម្បីដាក់បញ្ចូលទៅក្នុងសេចក្ដីព្រាងច្បាប់ស្ដីពីសហជីព។
កន្លងមក ក្រុមសហជីពបានបរិហារថា សេចក្ដីព្រាងច្បាប់ស្ដីពីសហជីពនេះ បានរឹតត្បឹតសិទ្ធិសេរីភាពរបស់ពួកគេនៅក្នុងការបញ្ចេញមតិ និងចូលរួមតវ៉ាក្នុងសកម្មភាពផ្សេងៗ ដើម្បីបម្រើផលប្រយោជន៍កម្មករ។ ប៉ុន្តែលោកអ៊ិត សំហេង រដ្ឋមន្ត្រីក្រសួងការងារធ្លាប់បានថ្លែងថា រដ្ឋាភិបាលគ្មានគំនិតរឹតបន្តឹងសហជីពទេ។ ហើយថា ច្បាប់ស្តីពីសហជីព នឹងត្រូវស្នើសុំឱ្យរដ្ឋសភា អនុម័តបញ្ចប់នៅក្នុងឆ្នាំនេះ បើសិនជាគ្មានការចម្រូងចម្រាស ដើម្បីរក្សាបាននូវសុខុដុមរមនា ក្នុងវិស័យការងារ។
ដោយឡែក ក្រៅពីការប្រជុំឲ្យយោបល់ទៅលើសេចក្ដីព្រាងច្បាប់ស្ដីពីសហជីព ក៏មានផងដែរ ការជជែកពិភាក្សាគ្នាបន្ថែមទៀត អំពីការកំណត់ប្រាក់ឈ្នួលអប្បបរមា សម្រាប់កម្មករកាត់ដេរ មុននឹងលើកសំណើប្រាក់ឈ្នួលរួមនេះ ទៅដាក់នៅក្នុងកិច្ចប្រជុំត្រីភាគី ដែលបានកំណត់ធ្វើនៅខែកញ្ញាខាងមុខ។ តំណាងសហជីពឲ្យដឹងពីជំហរបស់ខ្លួនថា ការទាមទារប្រាក់ឈ្នួលអប្បបរមា គឺស្ថិតនៅចន្លោះពី ១០០ដុល្លារ ទៅ ១៦០ ដុល្លារ។
បញ្ហាប្រាក់ឈ្នួលនេះ នៅតែមានភាពចម្រូងចម្រាស់។ កាលពីចុងខែមិថុនាកន្លងទៅ គណៈកម្មការប្រឹក្សាការងារ បានបោះឆ្នោតជាសម្ងាត់ កំណត់យកថ្ងៃទី០១ ខែមករា ឆ្នាំ២០១៥ ជាថ្ងៃកំណត់ប្រាក់ឈ្នួលកម្មករនិយោជិត សម្រាប់ឆ្នាំ២០១៥។ ក៏ប៉ុន្តែ ក្រុមសហជីពបានប្រឆាំងនឹងការសម្រេចនេះ ដោយស្នើឲ្យយកថ្ងៃទី០១ ខែតុលា ឆ្នាំ២០១៤ ជាកាលបរិច្ឆេទកំណត់ប្រាក់ឈ្នួលអប្បបរមា សម្រាប់ឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ